Romebi 15

Kebaawora asheŋ a par basa pɔtɛ be asheŋ

1A daga fanɛ anyi, bumo nɛ an kɔ eleŋ yirda na to na e baa chɛ bepɔshipo na to a keni bumo be asheŋ nɛ a bee pɔɔ bumo so to. An sa maa wɔtɔ a de anyi gbagba be aparsheŋ so. 2Anyi be ekama e baa wora mo braana bebɛsopo asheŋ lela nɛ a bee par bumo nɛ loŋ e tiŋ n sa bumo eleŋ nɛ k beeŋ yɛr bumo anishito ashi yirda na to. 3Ŋkpal manɛ so, Kristo gba daa maŋ de mo gbagba be aparsheŋ so, ama loŋ nɛ abɔrɛsibɛ na bee kaŋɛ fanɛ e bee kaŋɛ le na: “Katege nɛ basa tege menyi na kikɛ laŋɛ ma kumu so.” 4Abɔrɛsibɛ kama malɛ nɛ b daŋ sibɛ dra dra kikɛ n nase na, b daŋ sibɛ amo nna nɛ a baa ŋini anyi asheŋ, saŋɛ na so, anyeeŋ bɔla kanyiti nɛ kananɛ abɔrɛsibɛ na bee leŋ anyi to na to a kɔ tama. 5Ebɔrɛ nɛ e bee sa anyi kanyiti nsaa leŋ anyi to na e shin nɛ men nya kagbene koŋwuleso be kebaawɔtɔ a wɔ abar so a bɛ Kristo Yesu so. 6Saŋɛ na so menyi kikɛ beeŋ ta ebɔl koŋwule n di Ebɔrɛ an Nyɛnpe Yesu Kristo mo Tuto na epaŋ.

Nnyamase ka bee maŋkura Ebɔrɛ be asheŋ

7To, men baa sɔ abar fanɛ kananɛ Kristo sɔ menyi na nɛ Ebɔrɛ e nya kemaŋkura. 8Ŋkpal manɛ so, ma e kaŋɛ menyi na fanɛ Kristo ki Juwebi be kenya nna ŋkpal Ebɔrɛ be kashenteŋ na so, saŋɛ na so, e beeŋ shin nɛ nnɔ nɛ Ebɔrɛ nase n sa benananyɛngboŋana na e bɔla ekpa. 9Loŋ e naaŋ shin nɛ nnyamase e maŋkura Ebɔrɛ ŋkpal mbe kuwɔr so fanɛ kananɛ abɔrɛsibɛ na bee kaŋɛ le na:

“Ŋkpal le so meeŋ baa wɔ nnyamase to a di fo Ebɔrɛ epaŋ.

Meeŋ boŋ nshɛ n dele fo ketre.”

10Le nɛ abɔrɛsibɛ na kraŋ naa kaŋɛ:

“Nnyamase, men tu Ebɔrɛ be basa laraso

n shin nɛ menyi be ŋgbene e fuli menyi.”

11Amo koŋwule na kraŋ naa kaŋɛ le:

“Menyi nnyamase kikɛ, men di Enyɛnpe na epaŋ,

nɛ menyi basa yiri kikɛ men boŋ nshɛ n di mo epaŋ.”

12Ade malɛ gba kikɛ be kaman le nɛ anebi Aizaaya yɛ:

“Jɛsi be kenanabi beeŋ ba kachako

m ba lar n ji nnyamase so kuwura

nɛ b ta bumo be tama kikɛ n deŋi mo so.”

13Ebɔrɛ nɛ e bee sa anyi tama na e shin nɛ kagbenefuli nɛ kagbenewushi e bɔlɔ menyi to ashi menyi be keyirda mo ere to, saŋɛ na so menyi be tama beeŋ bɔla Kiyoyu Cheeŋ na be eleŋ to m bɔlɔ menyi to felɛlɛ n ya kaa wurge.

Ekpa nɛ Pɔɔl kɔ n tiŋ n sibɛ le be asheŋ ere be asheŋ

14Ŋ kurgepoana, ma alɛ gba baa nyi geeŋ fanɛ alelasheŋ e baŋ bɔlɔ menyi alɛ gbagba to nseŋ naa nyi fanɛ men kɔ kanyiasheŋ kikɛ nɛ men gbagba e tiŋ ŋ ŋini abar asheŋ. 15Ama kawɔl ere to m malga asheŋ ko nɛ amo be ekpa so n sa menyi fanɛ ŋ ka bee nyiŋi menyi amo be asheŋ na. N nya kenyɛn nna m malga amo kikɛ ŋkpal kuwɔr nɛ Ebɔrɛ wu ma n shin nɛ ŋ ki Yesu Kristo be kenya a shuŋ a sa nnyamase na so. 16Mee shuŋ nna fanɛ bɔrɛmatapo a wɔtɔ a bɔ baru lela nɛ a shi Ebɔrɛ kutɔ na nna a sa nnyamase, saŋɛ na so, baaŋ baa du fanɛ kakɛ nɛ k bee par mo ere Ebɔrɛ nɛ Kiyoyu Cheeŋ na lara m bɔɔ mo enɔ na. 17Ŋkpal kɔnɔkoŋwule nɛ k wɔ ma nɛ Kristo Yesu be kefɛato so mee puchi nna ŋkpal ŋ ka bee shuŋ Ebɔrɛ so. 18Meeŋ baa kɔ kenyɛn nawule a malga asheŋ nɛ Kristo na wora ashi ma to nɛ loŋ e tiŋ n shin nɛ m bɔla mmalga nɛ ashuŋ shunso to n shin nɛ nnyamase e ba kaa nu a sa Ebɔrɛ. 19Kiyoyu na be eleŋ to nɛ m bɔla n shin nɛ b wu etɔɔnɛ nɛ emamachisheŋ. Amoso, baŋ yili Jerusalɛm be kade to n ta ŋ kulti n ya fo Ilirikem kikɛ m bɔ Kristo be baru lela na nɛnɛ n sa basa. 20Kusɔ nɛ m baŋ yili ma kagbene to fanɛ meeŋ baa wora e la fanɛ saŋkikɛ m baa bɔ baru lela na a sa basa nɛ b wɔ mboŋ nɛ ndoŋebi maŋ naŋ nu Kristo na be asheŋ kikɛ na, saŋɛ na so, m maaŋ baa du fanɛ esa nɛ e bee pɔr egbal a yuu esa pɔtɛ ko be gbaltɔlase so. 21Kusɔ nɛ abɔrɛsibɛ na bee kaŋɛ le na nɛ m baa sha:

“Basa nɛ b daa maŋ kaŋɛ mbe asheŋ n sa na beeŋ wu mo kenishiso

nɛ bumo nɛ b daa maŋ nu mbe asheŋ na e pin to.”

22Ade so nɛ m maŋ nya ekpa ale damta nɛ m ba menyi kutɔ na.

Pɔɔl ka bee fɛ keyɔ Rom be asheŋ

23Ama naniere ŋ ka maŋ naa kɔ kakpa ashi nsawule ere so nfe nɛ n shuŋ ere nɛ ŋkpal kananɛ ŋ kɔ nfɛ damta nɛ a choŋ ere kikɛ nɛ n wu menyi ere so, 24n yili kumo nna fanɛ ŋ kaa yɔ Speen be efuli so, meeŋ wu menyi. Ŋ kaŋ wu menyi m moɛ gbrɛ nɛ n shin nɛ men chɛ ma to ashi ma enite na to. 25Naniere bre, ma aya kraa wɔ Jerusalɛm be ekpa to nna ŋkpal Ebɔrɛ be basa nɛ b wɔ ndoŋ so. 26Masɛdonia nɛ Akaya be efuliana so be asɔriana e yili kumo bumo gbagba be keparso n to amansherbi be toto nɛ n ta n ya sa Ebɔrɛ be basa nɛ b la betirpo a wɔ Jerusalɛm be asɔri to na. 27Bumo gbagba e yili kumo loŋ n wora. Kumo alɛ kashenteŋto bre, a daga b ka chɛ loŋ be betirpo na to, ŋkpal manɛ so, kananɛ nnyamase baŋ bɔla Juwebi so n nya abɔrɛsheŋ be nɛfa na koŋwule na a daga fanɛ nnyamase gba ka ta bumo be durnya ere to be asɔ be ako a chɛ Juwebi to. 28Amoso, m baŋ ta le be toto ere n sa bumo nseŋ shuŋ ma kushuŋ na n loge, meeŋ pɛ Speen be efuli so be ekpa nseŋ gbɛ n chɔrɔ menyi. 29M baa nyi fanɛ ŋ kaŋ ba menyi kutɔ ma nɛ Kristo be nɛfa kikɛ nyam e naaŋ ba menyi to.

30Amoso, ŋ kurgepoana, mee kpal Enyɛnpe Yesu Kristo so nɛ kasha nɛ Kiyoyu na bee sa na so a kule menyi fanɛ men tu ma a kule Ebɔrɛ kpakpa a sa ma. 31Men baa kule Ebɔrɛ fanɛ Judiya be efuli so be basa nɛ b maŋ kɔ yirda na maaŋ ya wora ma shɛŋ nseŋ naŋ kule mo fanɛ kushuŋ nɛ mee yɔ nɛ n ya shuŋ Jerusalɛm ere beeŋ par Ebɔrɛ be basa ndoŋ. 32Saŋɛ na so nɛ k la Ebɔrɛ be kepar nɛ m ba menyi kutɔ nɛ kagbenefuli, nɛ ma nɛ menyi kikɛ be keba abar so e leŋ anyi to. 33Ebɔrɛ nɛ kagbenewushi kikɛ bee shi mo kutɔ na e baa wɔ menyi kikɛ to. Amɛn.

Currently Selected:

Romebi 15: GJNb

Highlight

Copy

Compare