Romebi 14

Kananɛ k maŋ daga fo ka bee wu fo barkasa kulubi be asheŋ

1Men baa sɔ ekama nɛ e maŋ kɔ eleŋ ashi yirda na to na a wɔtɔ menyi to, ama menyi nɛ mo e sa maa ji emɔrɔ a yɔ mbe asheŋ fɛso be kaplɛa so. 2Esa ko bee kaa yirda fanɛ e beeŋ tiŋ n ji kusɔ kikɛ be epo, ama emo nɛ mbe yirda maŋ kɔ eleŋ bre bee ji afantaŋ nawule be epo nna. 3Nɛ ekama malɛ nɛ e bee ji kusɔ kikɛ e sa maa fɛl emo nɛ e maa wora loŋ. Emo nɛ mo alɛ maa ji kusɔ kikɛ na malɛ e sa maa kaŋɛ fanɛ emo nɛ e bee ji kusɔ kikɛ na bee foe ekpa nna, ŋkpal manɛ so, Ebɔrɛ e sɔ amodoŋwura na. 4Manɛ be ekpa nɛ fo alɛ kɔ nɛ fo tiŋ n ji esa pɔtɛ be kayɛrbi demu? Mo nyɛnpe gbagba be anishito nɛ e beeŋ tiŋ n ji n lar ŋko n ji n tɔr, mo alɛ beeŋ ji n lar malɛ, ŋkpal manɛ so, Enyɛnpe beeŋ tiŋ n shin nɛ e ji n lar.

5An ta fanɛ nchɛ le. Esa ko kutɔ nchɛ ko la nchɛgboŋ nna, ama esa ko malɛ kutɔ nchɛ kikɛ sasa nna. A daga fanɛ ekama e baa pin mbe kagbene to geeŋ fanɛ le be kesheŋ ere e daga ŋ ka wora ŋko n sa maŋ wora. 6Esa kama nɛ e bee ta kachɛ ko fanɛ kachɛgboŋ, bee wora loŋ nna a sha kebunyaŋ Enyɛnpe. Nɛ ekama malɛ nɛ e bee ji kejibi ko, bee ji kumo nna a bunyaŋ Enyɛnpe na, ŋkpal manɛ so, amodoŋwura gba bee kaa di Ebɔrɛ epaŋ nna pɔɛŋ nsaa ji. Nɛ ekama malɛ nɛ e bee kini kejibi ko be keji, bee wora loŋ nna a bunyaŋ Enyɛnpe na nsaa di Ebɔrɛ epaŋ nna na. 7Ŋkpal manɛ so, anyi be ekama maŋ wɔtɔ nna ŋkpal mo gbagba be kumu so so. Anyi be ekama malɛ maa wu a sa mo gbagba be kumu so. An baa wɔ ŋkpa to, Enyɛnpe nɛ an wɔ ŋkpa to a sa nɛ anyi alɛ naŋ wu gba, Enyɛnpe na nɛ anyee wu a sa. 8Amoso, nɛ an baa wɔ ŋkpa to ŋko an wu gba, an wɔ Enyɛnpe na be enɔ to nna. 9Loŋ so nɛ Kristo na wu nseŋ naŋ lar luwu to m ba na, saŋɛ na so e beeŋ baa la basa nɛ b wu nɛ bumo nɛ b kraa wɔ ŋkpa to be Enyɛnpe.

10To, nɛ a ji nuso nna nɛ fee wu fo barkasa kulubi? Nɛ fo alɛ, manɛ e ba nɛ fee keni fo barkasa a bɔl? Ŋkpal manɛ so, kachako an kikɛ beeŋ yili Ebɔrɛ be demuji be echenakpa nɛ e ji anyi demu. 11Ŋkpal manɛ so, loŋ gbagba nɛ abɔrɛsibɛ na bee kaŋɛ fanɛ Ebɔrɛ kaŋɛ le na:

“Ma, Enyɛnpe ka baa wɔ ŋkpa to ere bre,

ekama beeŋ ba gbir ma kumuli kacha ko,

ekama malɛ beeŋ ba bugi kɔnɔ ŋ kaŋɛ fanɛ

ma e la Ebɔrɛ.”

12Amoso, kachako anyi be ekama beeŋ kaŋɛ Ebɔrɛ asheŋ nɛ an wora kikɛ nyam nɛ kusɔ nɛ k ba nɛ an wora amo.

Kesa maŋ shin nɛ fo barkasa e tɔr be asheŋ

13Amoso, men shin nɛ an yige kebaawu abar alubi be asheŋ n lɛ. Kusɔ nɛ k daga fanɛ men baa wora e la fanɛ men sa maŋ kaŋ ta shɛŋ shɛŋ ŋ kagle men niopibi kama ekpa nɛ e fiti n tɔr kulubi to. 14Ŋ ka wɔ Enyɛnpe Yesu to so m baa nyi nna geeŋ fanɛ kejibi kikɛ gbagba maŋ lubi so, ama nɛ esa kama baa ta kejibi kama fanɛ kejibi lubi, kumo ere k beeŋ baa la kejibi lubi n sa amodoŋwura kashenteŋto. 15Nɛ kusɔ kama malɛ nɛ fee ji nɛ k bee tɔrɔ fo niopibi be nfɛra, kumo ere mannɛ kasha be kesheŋ nɛ fee wora na. Sa maŋ kaŋ shin nɛ fo niopibi nɛ Kristo wu n sa na e foe ekpa ŋkpal kusɔ nɛ fee ji so. 16Sa maŋ shin nɛ kusɔ nɛ fee tre kusɔ lela e nya ketre lubi fanɛ k maŋ walɛ so. 17Ŋkpal manɛ so, Ebɔrɛ be kuwura na to be asheŋ maŋ la kebaaji nɛ kebaanuu be asheŋ nna. K la alelasheŋ nɛ kagbenewushi nɛ kagbenefuli nɛ a bee shi Kiyoyu Cheeŋ na kutɔ na be kebaawɔtɔ be asheŋ nna. 18Ŋkpal manɛ so, ekama nɛ e bee shuŋ Kristo le be ekpa so be kebaawɔtɔ bee par Ebɔrɛ nna nɛ basa pɔtɛ gba e ji mbe kebaawɔtɔ lela na be shɛda n sa abar. 19Amoso, men shin nɛ an baa wora ania saŋkikɛ a wora asheŋ nɛ a bee bar kagbenewushi nɛ asheŋ nɛ a beeŋ tiŋ n chɛ to n shin nɛ an baa leŋ abar to. 20Sa maŋ kpal ajibi so n jija Ebɔrɛ be kushuŋ. Kejibi kama walɛ so nna, ama a maŋ daga fanɛ esa kikɛ ka ji kejibi kama nɛ k bee shin nɛ esa pɔtɛ bee foe ekpa na. 21Nɛ fo nyi fanɛ fo we eblaŋ ko ŋko n nuu nsa ŋko n wora kusɔ kama nɛ k beeŋ shin nɛ fo niopibi e foe ekpa bre, fo ka maŋ wora amo be kekama bɔ. 22Amoso, kusɔ kama nɛ fo yirda a yɔ le be asheŋ ere be kaplɛa so, fo shin nɛ k baa wɔ fo nɛ Ebɔrɛ be nferinto. Kagbenefuli malɛ la esa kama nɛ e maa wu mo gbagba be kumu kedoŋ ashi kusɔ nɛ e bee yirda be ekpa so na peya nna. 23Nɛ esa baa shin nɛ e ji kejibi kama nsaa wora shikashika nseŋ ji kumo, amodoŋwura wora n da so ashi Ebɔrɛ be anishito, ŋkpal manɛ so, e maŋ kɔ yirda kesheŋ nɛ e bee wora na to nna na. Kusɔ kama malɛ nɛ fo maŋ ta yirda n wora kumo la kulubi nna.

Currently Selected:

Romebi 14: GJNb

Highlight

Copy

Compare