Aŋasa 24
24
Kuduakpanusopo
1Sa maa besa belubiworapo eyur,
ŋko a yɛlga kebaa tu bumo a wora asheŋ.
2Asheŋ lubi nawule be asheŋ nɛ baa fɛ saŋkama.
Bumo be mmalga kikɛ la kananɛ baaŋ wora kulubi nna.
Adunyɔsopo
3Kanyiasheŋ e naa pɔr kowu,
nɛ kenu n sa abar malɛ bee shin nɛ k bee yili.
4Kenyi malɛ e naa shin nɛ asɔ lela
nɛ yawu kpakpaso be asɔ bee bɔlɔ laŋ.
Adunyɔ nɛ kako
5Enyiashempo e la elempo.
Kenyi bee shin nɛ esa be eleŋ nɛ yuku bee ti so nna.
6Ŋkpal manɛ so kasotoji lela
nɛ kebela ase nɛnɛ e naa shin nɛ baa kɔ kena a pɔɔ so.
Adunyɔ nɛ anyɔ
7Ewulpo maaŋ tiŋ m pin kanyiasheŋ be mmalga to.
B baa malga kenishipere be mmalga ewulpo maŋ kɔ shɛŋ a kaŋɛ.
Adunyɔ nɛ asa
8Esa nɛ e bee kre alubisheŋ
nɛ baa tre alubiworapo.
9Ewulpo be nfɛra fɛso kikɛ maŋ walɛ.
Basa kishi ewulpo nɛ e bee wora basa eyur to ga.
Adunyɔ nɛ ana
10Kesɔ kapɔshi be tɔrɔ be jemanɛ
bee shin nɛ esa be eleŋ bee kuso nna.
Adunyɔ nɛ anu
11Sɔ bumo nɛ b gberge a yɔ nɛ b ya mɔ
kenyanyaŋɛso na n yige.
12Nɛ fo kaŋɛ fanɛ k maŋ la fo asheŋ,
Ebɔrɛ nɛ e nyi nfɛra nɛ aworbi na bre nyi
kusɔ so so nɛ fee wora kusɔ kama.
Mo alɛ e naŋ ka fo kusɔ kama nɛ fo wora be kukɔ.
Adunyɔ nɛ ashe
13M pibi, baa ji mushoŋ ŋkpal manɛ so mushoŋ walɛ.
Kananɛ mushoŋ wɔ ebel kudonduloŋ so na,
14loŋ nɛ kanyiasheŋ gba walɛ n sa fo kiyoyu.
Fo baŋ nya kumo fo alɛ nya echefoso be tama
nɛ k maaŋ loge kikɛ.
Adunyɔ nɛ ashunu
15Sa maa kɔ kumu kpakpaso
fanɛ belubiworapo nɛ baa yuri basa lela be asɔ,
ŋko a suge bumo be nwu na.
16Basa niŋiso bee tɔr alɛ damta nsaa koso
ama tɔrɔ baŋ ba alubiworapo bre so
nɛ e tɔr kela koŋwule gba
e maaŋ naŋ tiŋ n niŋi to kikɛ.
Adunyɔ nɛ aburwa
17Sa maŋ shin nɛ fo doŋ be tɔrɔ e baa fuli fo kagbene.
Fo doŋ baŋ fiti n tɔr, sa maa mushe.
18Mannɛ a loŋ Enyɛnpe Ebɔrɛ beeŋ wu kumo be loŋ,
nseŋ kilgi mbe tɔrɔ na m ba fo so.
Adunyɔ nɛ akpanu
19Sa maŋ shin nɛ belubiworapo be asheŋ e baa tir fo
ŋko a besa fo.
20Ŋkpal manɛ so alubiworapo maŋ kɔ echefoso be tama.
Mo alɛ beeŋ choŋ fanɛ kananɛ fitila beeŋ duŋ na.
Adesa
21M pibi, baa ŋana Enyɛnpe Ebɔrɛ na
nsaa ŋana bewura gba,
sa maa tu amukpakpaso wuraana a wora asheŋ.
22Wanɛ e nyi tɔrɔ nɛ Enyɛnpe Ebɔrɛ ŋko ewura beeŋ sa bumo?
Aŋasa ko gba nde
23Kanyiasheŋ be mmalga ko gba nde:
A maŋ daga demujipo ka bee kpɛa to.
24Fo baŋ kaŋɛ fanɛ esa nɛ e wora n jija e kɔ kashenteŋ,
basa beeŋ sho fo kɔnɔ,
nɛ efuli pɔtɛ so ebi gba e kishi fo.
25Ama demujipo nɛ e bee gberge belubiworapo kusoe bre
beeŋ nya nɛfa nna nɛ asheŋ e baa nite nɛnɛ a sa mo.
26Kashenteŋ be atuwebi e la kashenteŋ be keteri be tɔɔnɛ.
27Nase kudɔ n du fo adɔjibi
pɔɛŋ nsaa pɔr kowu.
28Sa maŋ kaŋ ji efɛ be shɛda ŋ gbiti fo barkasa
ŋko ŋ ku efɛ ŋ deŋi mo.
29Sa maŋ kaŋɛ fanɛ: “Meeŋ wora mo n tal to.”
30Ŋ ka bɔla ewulpo tɔlpo be ndɔ
nɛ mbe ndibi sɔrso be dɔkar,
31nɛ afitiri nɛ ewi sɔ kudɔ na kikɛ,
nɛ ajembu be egbal nɛ e pɔr ŋ kulti kumo na kikɛ tɔr.
32Nɛ n yili ŋ keni kudɔ na,
nseŋ fɛ kumo be asheŋ ŋ koya kusɔ ko
ashi kusɔ nɛ n wu na to.
33Edi gbrɛbi, ewushi gbrɛbi
nɛ enɔ be kefar n chena gbrɛbi,
34nɛ ketir ba fo so fanɛ eyu na,
nɛ asheŋ kikɛ e ki fo so kpakpa.
Currently Selected:
Aŋasa 24: GJNb
Highlight
Share
Compare
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
