Aŋasa 25
25
Ewura Sɔlɔmɔn be aŋasa ko nde
1Ewura Sɔlɔmɔn be aŋasa nɛ Ewura Hɛzekaya be ekrachi sibɛ na nde.
2Ebɔrɛ bee nya bunyaŋ nna
ŋkpal e ka kɔ ashiri so,
nɛ bewura malɛ bee nya kemaŋkura
ŋkpal bumo be kebaa bugi asheŋ to so.
3Wanɛ e naa tiŋ a pin ewura be nfɛra?
Ewura be nfɛra du chiŋgeliŋ nna
fanɛ kasawule be nchiŋ
ŋko awɔlpa be kufɔ na.
4Baa lara gbiti be eyurpi nna pɔɛŋ
nsaa ta kumo a lɔŋɛ asɔ lela.
5Lara besoetojipo lubi ashi ewura kutɔ
nɛ e ji kuwura ekpa niŋiso so.
6Sa maa maŋ fo kumu so
ashi ewura be anishito,
ŋko a ta fo kumu a yili basagboŋ be eyilikpa.
7Ewura gbagba ka ta fo n yili esagboŋ be eyilikpa
bɔ fo gbagba ka ta fo kumu n yili ndoŋ nɛ e ŋaba fo.
8Sa maa kuse a ta asheŋ a yɔ demujikpa.
Mannɛ aloŋ b baŋ ji m bri fo
anishinyɔr beeŋ pɛ fo.
9Nɛ fo nɛ fo barkasa bee ji emɔrɔ,
fo sa maa lara mbe ashiri.
10Mannɛ aloŋ basa beeŋ kaŋɛ fanɛ fo maŋ kɔ ashiri
nsaa maŋ naa yirda fo.
11Kemalga kamalga nɛ k daga saŋɛ nɛ k daga
du nna fanɛ b ka ta shuwa m mata gbiti so na.
12Kenu enyiashempo be kasotoji
du fanɛ shuwa be akonde, ŋko abitasɔ nna.
13Kabɔ nɛ e bee ji kashenteŋ
du fanɛ kebleŋ to be nchu wushiso nna.
14Esa nɛ e bee nase kɔnɔ
nsaa maa tia kumo
du fanɛ kuwɔlpa nɛ k maa bar bɔrɛ nna.
15Kenyiti nɛ kɔnɔ lela
e naŋ tiŋ n shin nɛ ewura e chɛrga mbe nfɛra
nseŋ shuli n sɔ kusɔ nɛ fee kaŋɛ mo na.
16Sa maŋ kpal mushoŋ ka wɔ ebel so
n ji amo m baŋ fo kumu so,
mannɛ aloŋ feeŋ kwiɛ amo.
17Sa maa tir fo kurgepo to ga,
mannɛ aloŋ fo asheŋ beeŋ fi mo
nɛ e kishi fo.
18Keji efɛ be shɛda ŋ gbiti esa
du nna fanɛ fo ka da mo kasaŋɛ
ŋko ketanyembi ŋko ŋ ŋe mo kedibi nna.
19Keta yirda n deŋi efɛpo so ashi awurfoŋ be saŋɛ
du fanɛ fo ka na keya koŋwule so
ŋko fo kenyi ka bee besa fo nna.
20Keboŋ kashɛ n sa esa nɛ mbe kagbene jija
du nna fanɛ fo ka sɔ esa be wajɛ awo to
ŋko fo ka ta nfɔl be nchu n wurge kuchuu popɔr so na.
21Nɛ akoŋ kɔ fo doŋ fo sa mo ajibi nɛ e ji,
nɛ achukoŋ kɔ mo
fo sa mo nchu nɛ e nuu.
22Nɛ fo wora loŋ,
kumo ere kedɛmurmur nɛ fo muu n deŋi mbe kumu so na.
Ebɔrɛ malɛ beeŋ nɛfa fo.
23Kananɛ kebɔrɛfito be afu bee bar bɔrɛ na,
aloŋ nɛ ŋkuli bee bar agbo.
24Kedese kuchoŋi be awɔlto bɔ
ketu eche elushapo a wɔ ebu to.
25Baru lela nɛ k shi kufɔ
bee wushi kagbene nna,
fanɛ kananɛ nchu wushiso bee wushi eyur na.
26Esa nɛ e bee wora asheŋ niŋiso baŋ yige mbe kumu to n sa esa lubi,
e bee ki fanɛ nchu nɛ a fɔnɔto ŋko eboŋ nɛ b bɔ kumo kesa nna.
27Kananɛ mushoŋ maŋ daga keji m baŋ so na,
aloŋ nɛ k maŋ daga esa ka bee fin fanɛ basa e baa fur mo saŋkama.
28Esa nɛ e maŋ kɔ kanyiti
du nna fanɛ kade nɛ kumo egbal bure
nɛ basa beeŋ tiŋ n luri kumo to ŋ kɔ kumo na.
Currently Selected:
Aŋasa 25: GJNb
Highlight
Share
Compare
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
