Aŋasa 23
23
Keshesopo
1Ewura baŋ tre fo fanɛ fo ba tu mo n ji,
fo koli fo kumu nɛnɛ.
2Nɛ fee ji ga fo ku fo epun so,
3nsaa maa fin fanɛ fo ji
kusɔ nɛ k wɔ ndoŋ kikɛ.
Mannɛ ajibi na kikɛ e deŋ fo.
Keshunusopo
4Sa maa mɔ fo kumu a fin kedii dama.
Ba nyi fo eleŋ be ekar.
5Ŋkpal manɛ so fo amansherbi beeŋ tiŋ n loge epul to,
fanɛ kananɛ kusore beeŋ yili epul to n firgi n choŋ na.
Keburwasopo
6Sa maa tu Miiriworaana a ji,
ŋko a yɛlga mbe ajibi lela.
7E beeŋ kaŋɛ fanɛ fo ji kananɛ fee sha,
ama kumo be loŋ maŋ shi mbe kagbene to.
8Feeŋ kwiɛ ajibi nɛ fo ji na kikɛ,
nɛ kechɔrɔ nɛ fo chɔrɔ mo na e ki jiga.
Kekpanusopo
9Sa maŋ jija saŋɛ a ŋini ewulpo asheŋ.
E maaŋ ta fo kanyiasheŋ be mmalga na n shuŋ.
Kudusopo
10Sa maa lɔŋɛ egbaŋ to be kedulgijembu dra a yili,
ŋko a dɔ a luri amunibi be kasawule to.
11Enyɛnpe Ebɔrɛ gbagba e naa kɔ a mɔlga bumo.
Mo alɛ beeŋ yili bumo be katelamu
n ji bumo be demu n sa bumo.
Kudukakosopo
12Baa kaŋ kusoe a nu keŋini
nsaa wora ania a koya asheŋ.
Kuduanyɔsopo
13Sa maŋ yige kegberge fo kebia kusoe ŋ ŋini mo asheŋ.
Fo gberge mo kusoe e maaŋ wu.
14Kuya kebia so ŋ ŋini mo asheŋ,
nɛ kumo be loŋ e mɔlga mo
ashi luwu to kachako so.
Kuduasasopo
15Ma kebia, nɛ fo baa nyi asheŋ
k bee fuli ma kagbene nna.
16M ba nu fo ka bee ji kashenteŋ malɛ,
ma kumu bee tin nna.
Kuduanasopo
17Sa maŋ shin nɛ belubiworapo be asheŋ
e baa keta fo kayɛlga,
ama shin nɛ kabɔrɛŋana be kebaawɔtɔ e pere fo kenishi.
18Nɛ fo wora loŋ bre,
asheŋ beeŋ nyalɛ n sa fo echefoso.
Kuduanusopo
19M pibi, nu nfe,
ta kanyiasheŋ a bɛ ekpa niŋiso so.
20Sa maa tu basa nɛ baa wu nsa a choŋ a gben,
ŋko n wu ajibi a choŋ a gben a wora asheŋ.
21Ketir beeŋ pɛ besanuupo nɛ bejibishapo,
baaŋ baa dese a di nna,
nsaa buu asɔ farbi.
Kuduashesopo
22Baa nu fo tuto be mmalga,
mo e kurge fo.
Sa maŋ kplaŋ fo nio so ashi mbe mbel to.
23Jija amansherbi ŋ koya kashenteŋji
nɛ kanyiasheŋ nɛ kamootiŋ.
Sa maŋ yige amo n lɛ kikɛ.
24Esa nɛ e bee wora asheŋ niŋiso kikɛ,
mo tuto be kagbene bee fuli mo nna.
Kebia nyiashempo be asheŋ bee par mo kurgepo nna.
25Shin nɛ fo tuto nɛ fo nio be ŋgbene
e baa fuli bumo.
Shin nɛ eche nɛ e kurge fo be kumu e saŋɛ mo.
Kuduashunusopo
26M pibi baa kaŋ kusoe a nu ma mmalga,
nsaa wora ma asheŋ woraso.
27Sakaleche du fanɛ kejamaŋ chiŋgeliŋ nna,
nɛ eche nɛ e bee lar mo kul be kaman
malɛ du fanɛ ketirbu chiŋgeliŋ na.
28Baa jo fo nna fanɛ eyu na,
nɛ b da fo n lɛ alubiworapoana to.
Kuduaburwasopo
29Wanɛ e naa luri asheŋ to saŋkama?
Wanɛ e naa kɔ kolu saŋkama?
Wanɛ e naa tɔr a margaso?
Wanɛ be anishi e pere kpaw ŋkpal kasanuu so?
30Basa nɛ baa nuu nsa
n ya kaa fo kiidiso na.
31Sa maŋ keni kananɛ nsa pere nsaa walɛ,
ŋko a kpa edɛ glashi to,
ŋko a wushi ebɔl to so.
32Amo be lalaloge du fanɛ kuwɔ ka duŋ fo,
n ta kumo be kɔrtɔ lubi n wɔtɔ fo to nna.
33Nsa beeŋ tiŋ n shin nɛ fo anishi e baa kurge,
nɛ fo nfɛra e baa wul fo to.
34A bee wora fo fanɛ fo ka wɔ nchu so be kuloŋ to
ashi teku so nna, nɛ afu bee ber fo a yɔ a ba na.
35Feeŋ pira nɛ fo maŋ pin
kananɛ fo wora m pira.
Feeŋ baa dese a fin kananɛ feeŋ koso ŋ gben,
ama nsaa fin kananɛ kare beeŋ cha
nɛ fo naŋ nya nsa n nu.
Currently Selected:
Aŋasa 23: GJNb
Highlight
Share
Compare
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
