Aŋasa 22
22
1Ketre lela bɔ kedamaya.
Ketre lela chɔ shuwa nɛ gbiti.
2Enyɛnpe Ebɔrɛ na e to etirpo nɛ damawura kikɛ.
3Enyiashempo baaŋ wu kenishipere ka bee ba e bee gelge kumo nna,
ama esa nɛ e maa pin asheŋ to manaŋ manaŋ bre bee suse kumo to nna;
kumo be kaman nɛ e wora n daa nyi nna.
4Kamoobarase nɛ kabɔrɛŋana e naa sa esa kanya
nɛ kemaŋkura nɛ ŋkpa tenteŋ.
5Ewi nɛ ajigbelɛ e wɔ belubiworapo be ekpa to,
ama esa nɛ e bee kuŋ mbe kumu bre
bee gelge amo nna.
6Ŋini kebia ekpa nɛ k daga fanɛ e bɔla so,
saŋɛ na so, e kaŋ daŋ
e maaŋ kpele ashi kumo so.
7Damawuraana e naa ji betirpo so kuwura,
nɛ basa nɛ baa paŋ asɔ bee ki
bumo nɛ b paŋ bumo kutɔ na be anya.
8Bekama nɛ baa duu alubi beeŋ nya amo be tɔnɔ.
Bumo be agbo lubi e naŋ yɛr bumo kemur to.
9Esa kama nɛ e bee bugi kagbene a kɛ beeŋ nya nɛfa,
ŋkpal mo nɛ betirpo ka bee barga mbe kusɔ jiso to so.
10Ju esa nɛ e bee wora basa eyurto n lar,
nɛ kolu, nɛ katege, nɛ asheŋ wurbi e loge.
11Fo baa sha asheŋ niŋiso nsaa kɔ kamalga belbelso,
kumo ere feeŋ tiŋ n ji ewura kenekpa.
12Enyɛnpe Ebɔrɛ be anishi yuu beshenteŋjipo kikɛ so nna,
ama e maa sa befɛpo bre be malga kashuli.
13Etɔlpo e naa kaŋɛ fanɛ buluŋ wɔ kowushina,
amoso e maaŋ lar kowu nɛ buluŋ na e pɛ mo.
14Eche nɛ e bee lar mo kul kaman be mmalga du fanɛ kemaŋ chiŋgeliŋ nna,
nɛ bumo nɛ Enyɛnpe Ebɔrɛ be agbo wɔ so na
bee tɔr kumo to.
15Kasogberge be kuchuchɔ
e naa ju kawulisheŋ nɛ k bɔlɔ kebia to.
16Basa nɛ baa puni betirpo a dii dama na,
nɛ bumo nɛ baa kɛ damawuraana asɔ na,
beeŋ ki betirpo.
Benyiashempo be keŋini
17Kaŋ kusoe n nu benyiashempo be mmalga ere,
nsaa ta bumo be keŋini a wɔtɔ kagbene to.
18Nɛ fee nyiŋi amo nsaa kute amo to,
fo kagbene beeŋ fuli fo.
19Mee ŋini fo kesheŋ ere kabre nna,
saŋɛ na so feeŋ ta fo yirda n wɔtɔ Enyɛnpe Ebɔrɛ na to.
20M maŋ sibɛ mmalgamu adesa n sa fo,
nɛ a baa ŋini fo asheŋ nsaa sa fo lakal, 21a shin nɛ fo baa tiŋ a pin asheŋ to,
m ba kaa kute kusɔ nɛ b shuŋi fo fanɛ fo ya wora na be kashenteŋ a?
Sososo
22Sa maŋ puni esa ŋkpal e ka la etirpo so,
ŋko m mutir esa ashi demujikpa
ŋkpal e ka maŋ kɔ shɛŋ so.
23Ŋkpal manɛ so Enyɛnpe Ebɔrɛ na e naŋ chɛ bumo to,
nseŋ tɔrɔ bekama nɛ b tɔrɔ bumo na n tal to.
Kenyɔsopo
24Saa maa ji basa nɛ baa nya agbo manaŋ manaŋ kenekpa,
25nɛ mannɛ aloŋ fo alɛ gba beeŋ ki kananɛ b du na
nsaa maŋ naŋ tiŋ n chɛrga.
Kesasopo
26Sa maa sɔ beko be akɔ a deŋi fo kumu,
27nɛ fo baŋ maŋ tiŋ ŋ ka amo,
baaŋ sɔ fo asɔ kikɛ n ta fo gedo gba n ti so n tal to.
Kenasopo
28Sa maa lɔŋɛ fo nɛ basa be egbaŋ to
be kedulgijembu dra nɛ fo nananyɛnana yuu na a yuu.
Kenusopo
29Nɛ fo baa shuŋ fo kushuŋ nɛnɛ,
bewura nɛ feeŋ baa shuŋ a sa mannɛ bebɔlpo.
Currently Selected:
Aŋasa 22: GJNb
Highlight
Share
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
