Levitikɔs 2
2
Ayu be sargajibi be asheŋ
1Nɛ esa ta ayu nɛ e ba lara sarga n sa Enyɛnpe Ebɔrɛ na, a daga e kɔr amo nɛ a pe nɛnɛ. Kumo be kaman e ta ɔlif be ŋku m baga amo nseŋ ta duwu n ti so 2m ba sa Ɛɛrɔn be mbinyɛnsobi nɛ b la bɔrɛmatapoana na. Nɛ bumo be ekoŋwule e jɔ nyifu nɛ ɔlif be ŋku be wea to na enɔ be bɔlɔ nseŋ ta duwu na n ti so n chɔɔ bɔrɛsure na so a ŋini fanɛ amo kikɛ la sarga chɔɔso nɛ amo be efɛa bee par Enyɛnpe Ebɔrɛ na nna. 3Amo be amo nɛ a beeŋ ka kusɔ to na kikɛ la bɔrɛmatapoana na peya nna. Amo alɛ la ajibi nɛ a du cheembi ga nna ŋkpal a ka shi ajibi nɛ b ta n lara sarga n sa Enyɛnpe Ebɔrɛ na to so.
4Nɛ fanɛ b ta ayu na n wora bodobodo nna, kumo ere a sa maa kɔ yiisi amo to. Ama a beeŋ tiŋ a la bodobodo nɛ b ta nyifu nɛ a pe nɛnɛ nseŋ ta ɔlif be ŋku n wea amo to n wora, ŋko ekrakashi nɛ b ta ɔlif be ŋku m baga amo.
5Nɛ fanɛ b ta ayu na a wora abuibi nna, kumo ere b ta nyifu nɛ a pe nɛnɛ nseŋ ta ɔlif be ŋku n wea amo to n wora nɛ e sa maa kɔ yiisi. 6Kumo be kaman nɛ b pupur amo to nseŋ n chulgi ɔlif be ŋku n wurge amo so n ta n lara sarga na.
7Nɛ fanɛ b ta ayu na a wora akare nna, kumo ere b ta nyifu nɛ e pe nɛnɛ nseŋ ta ɔlif be ŋku n wea amo to n wora. 8Kumo be kaman nɛ b ta amo m ba sa bɔrɛmatapo na fanɛ sarga n sa Enyɛnpe Ebɔrɛ na nɛ bɔrɛmatapo na e ta amo n yɔ bɔrɛsure na ase. 9E beeŋ ta amo be ako shɛda so n chɔɔ bɔrɛsure na so a ŋini fanɛ sarga na la sarga chɔɔso nɛ kumo be efɛa bee par Enyɛnpe Ebɔrɛ na nna. 10Amo be amo nɛ a beeŋ ka na beeŋ baa la bɔrɛmatapoana peya nna. Amo alɛ la ajibi nɛ a du cheembi ga nna ŋkpal a ka shi ajibi nɛ b ta n lara sarga n sa Enyɛnpe Ebɔrɛ na to so.
11Ayu be sarga kama nɛ menyeeŋ lara n sa Enyɛnpe Ebɔrɛ na maŋ daga e baa kɔ yiisi kumo to. Menyi alɛ e sa maŋ kaŋ ta yiisi ŋko mushoŋ n wea ayu be sarga kama to n chɔɔ n lara sarga n sa Enyɛnpe Ebɔrɛ na. 12A daga fanɛ men jɔ ayu nɛ menyeeŋ juŋkpar n teŋi kafɛ to n lara sarga n sa Enyɛnpe Ebɔrɛ na, ama men sa maŋ chɔɔ amo bɔrɛsure so. 13A daga men baa wɔtɔ men be ayu be sargajibi kikɛ to nfɔl, ŋkpal manɛ so, nfɔl yili nna n sa menyi nɛ Ebɔrɛ be kɔnɔkoŋwule be ŋkre na.
14Kafɛ to be ayu nɛ menyeeŋ juŋkpar n teŋi nseŋ jɔ amo m ba lara sarga n sa Enyɛnpe Ebɔrɛ na daga a baa la ayu nɛ b ke ŋko n yarga nna. 15Menyi alɛ beeŋ ta ɔlif be ŋku n wea amo to nseŋ ta duwu n ti so m ba, ŋkpal manɛ so, e la ayu be sargajibi nna. 16Bɔrɛmatapo na beeŋ jɔ nyifu nɛ b baga amo ɔlif be ŋku na shɛda so nseŋ ta duwu na kikɛ n ti so n chɔɔ bɔrɛsure na so fanɛ ayu be sargajibi n sa Enyɛnpe Ebɔrɛ na.
Currently Selected:
Levitikɔs 2: GJNb
Highlight
Copy
Compare
Share
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
