Levitikɔs 1
1
Sarga chɔɔso be asheŋ
1Ndoŋ nna nɛ Enyɛnpe Ebɔrɛ na tre Mosis ashi Enyɛnpe be wajɛbu na to nseŋ kaŋɛ mo le: 2“Kaŋɛ Israɛl be basa na fanɛ nɛ ekama baa bar sarga nɛ e ba sa Enyɛnpe Ebɔrɛ na, e bar kena ŋko kubolpɔ ŋko kaboe.”
3“Nɛ fanɛ kena nɛ e bee ta a lara sarga chɔɔso na, a daga k baa la gbolu nɛ e maŋ kɔ ndulgi kikɛ kumo be eyur so. Amodoŋwura malɛ beeŋ bar kumo wajɛbu na be kabuna ase, saŋɛ na so Enyɛnpe Ebɔrɛ na beeŋ sɔ sarga na. 4Esa nɛ e lara sarga na beeŋ ta mbe enɔ n deŋi gbolu na be kumu so, saŋɛ na so, k beeŋ baa la alubi be ketampaŋ be sarga n sa mo. 5Kumo be kaman nɛ e mɔ kumo Enyɛnpe Ebɔrɛ na be anishito nɛ Ɛɛrɔn be mbinyɛnsobi nɛ b la bɔrɛmatapoana na be beko e suse kumo be ŋklaŋ ŋ ŋmenyaŋ bɔrɛsure nɛ k wɔ Enyɛnpe be wajɛbu na be kabuna to na be mba ana na kikɛ so ŋ kulti. 6Kumo be kaman nɛ e bɛ kusɔbɔya na nseŋ kuya kumo to. 7Kumo alɛ be kaman nɛ bɔrɛmatapoana na malɛ e bela ndibi n deŋi bɔrɛsure na so n nya edɛ n wɔtɔ amo to 8nseŋ bela kusɔbɔya na be eblaŋ na nɛ kumo be kumu nɛ nfɔ kikɛ n wɔtɔ edɛ na to. 9Nɛ esa nɛ e bee lara sarga na e fɔr kusɔbɔya na be apuntosɔ nɛ kaman to be aya kikɛ so nɛ bɔrɛmatapoana na e chɔɔ amo kikɛ bɔrɛsure na so m mur. Ŋkpal manɛ so, sarga na la sarga chɔɔso nɛ kumo be efɛa bee par Enyɛnpe Ebɔrɛ na nna.
10Nɛ fanɛ esa na bee lara kubolpɔ ŋko kaboe nna, a daga k baa la kenyɛnso nɛ k maŋ kɔ ndulgi kikɛ kumo be eyur so. 11E beeŋ mɔ kusɔbɔya na bɔrɛsure na be kelargato be esoso ase, ashi Enyɛnpe Ebɔrɛ na be anishito, nɛ bɔrɛmatapo na e suse ŋklaŋ na ŋ ŋmanyaŋ bɔrɛsure na be mba ana na so ŋ kulti. 12Kumo be kaman nɛ e kuya eblaŋ na to nɛ bɔrɛmatapo na e bela amo nɛ kumu na nɛ nfɔ na kikɛ n wɔtɔ edɛ na to ashi bɔrɛsure na so. 13A daga e fɔr apuntosɔ nɛ kaman to be aya na so nɛ bɔrɛmatapo na e chɔɔ amo alɛ gba bɔrɛsure na so. Ŋkpal manɛ so, sarga na la sarga chɔɔso nɛ kumo be efɛa bee par Enyɛnpe Ebɔrɛ na nna.
14Nɛ fanɛ kabuibi nɛ esa na kɔ a lara sarga na, a daga k baa la lepɔ ŋko keli. 15Bɔrɛmatapo na beeŋ bar lepɔ ŋko keli na bɔrɛsure na ase nseŋ ba kii kumo be kubɔ to m mɔ. Kumo be kaman nɛ e chɔɔ kumo be kumu na bɔrɛsure na so nseŋ chise ŋklaŋ na malɛ n wurge bɔrɛsure na be kaba koŋwule so 16nseŋ lara kumo be kepe nɛ asɔ nɛ a wɔ kumo to kikɛ n lɛ ashi bɔrɛsure na be kaba nɛ k bee laŋɛ epeŋilarkpa be kaba so, kakpa nɛ baa lɛ nsunɔ na. 17Kumo be kaman nɛ e pɛ kabuibi na be aba to m baŋɛ kumo to nsaa maŋ chuge aba na to, nseŋ chɔɔ kumo kikɛ bɔrɛsure na so. Ŋkpal manɛ so, k la sarga chɔɔso nɛ kumo be efɛa bee par Enyɛnpe Ebɔrɛ na nna.”
Currently Selected:
Levitikɔs 1: GJNb
Highlight
Copy
Compare
Share
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
