Levitikɔs 15

Keche nɛ kenyɛn be kedi be eyurpisheŋ be asheŋ

1Nɛ Enyɛnpe Ebɔrɛ na ta mbraana ere n sa Mosis nɛ Ɛɛrɔn 2fanɛ b ta n sa Israɛl be basa na. E yɛ: “Enyɛn kikɛ nɛ mbe kenyɛnsɔ nya kulɔ a lar nchu maŋ walɛ so. 3Nɛ nchu na bee lar mbe kenyɛnsɔ na to nna ŋko a shir a wɔ kumo to nna, esa na wora eyurpi nna na. 4Kusɔ deseso kama nɛ enyɛn na dese so ŋko n chena so gba wora eyurpi nna na. 5Esa kama malɛ nɛ e beta mbe kusɔ deseso daga e fɔr mbe asɔbuuso nseŋ m bɛr nchu. Mo alɛ kraa beeŋ baa wɔ eyurpi to hale n ya fo kaaseso. 6Esa kama malɛ nɛ e chena kakpa nɛ enyɛn na chena gba daga fanɛ e fɔr mbe asɔbuuso nseŋ bɛr nchu, ama mo alɛ kraa beeŋ baa wɔ eyurpi to n ya fo kaaseso. 7Esa kama malɛ nɛ e beta kanyɛn na daga fanɛ e fɔr mbe asɔbuuso nseŋ bɛr nchu, ama mo alɛ kraa beeŋ baa wɔ eyurpi to n ya fo kaaseso. 8Loŋ be esa baaŋ tu echɔl n lɛ esa nɛ e walɛso so, amodoŋwura daga fanɛ e fɔr mbe asɔbuuso nseŋ bɛr nchu, ama mo alɛ kraa beeŋ baa wɔ eyurpi to n ya fo kaaseso. 9Gaare kama ŋko kusɔ chenaso kama nɛ kanyɛn na chena so wora eyurpi nna na. 10Esa kama nɛ e beta kusɔ kama nɛ e chena so beeŋ baa wɔ eyurpi to n ya fo kaaseso. Esa kama malɛ nɛ e sulɔ kusɔ kama nɛ e chena so daga fanɛ e fɔr mbe asɔbuuso nseŋ bɛr nchu, ama mo alɛ kraa beeŋ baa wɔ eyurpi to n ya fo kaaseso. 11Nɛ esa nɛ mbe kenyɛnsɔ bee lar nchu na maŋ fɔr enɔ nseŋ beta esa, a daga esa nɛ e beta na ka fɔr mbe asɔbuuso nseŋ bɛr nchu, ama mo alɛ kraa beeŋ baa wɔ eyurpi to n ya fo kaaseso. 12Kapuya kama nɛ kanyɛn na beta daga kebure nɛ e beta kusɔ kama nɛ b ta kedibi n shɛl malɛ, a daga fanɛ b fɔr kumo so.

13Nɛ enyɛn na nya alenfia ashi mbe kulɔ na to gba, e beeŋ jo nchɛnshunu be kaman nseŋ fɔr mbe asɔbuuso m bɛr kechubu to be nchu pɔɛŋ nseŋ nyalɛ so daŋkare be ekpa so. 14Kachɛ burwasopo na nɛ e ta elepɔ anyɔ ŋko ali anyɔ m ba sa bɔrɛmatapo na ashi wajɛbu na be kabuna ase. 15Bɔrɛmatapo na beeŋ ta ekoŋwule n lara kulubi be sarga nseŋ ta kumo nɛ k ka na n lara sarga chɔɔso. Kananɛ e beeŋ wora enyɛn nɛ e nya alenfia na be kenyalɛso be kesheŋ wora nna na.

16Enyɛn kama nɛ enyɛn be nchu lar mo to, daga fanɛ e bɛr nchu nɛnɛ, ama mo alɛ kraa beeŋ baa wɔ eyurpi to n ya fo kaaseso. 17Wajɛ ŋko kusɔbɔya be kawɔl be kusɔ kama nɛ enyɛn be nchu na beta daga kefɔr, ama kumo alɛ kraa beeŋ baa wɔ eyurpi to n ya fo kaaseso. 18Nɛ enyɛn nɛ eche di abar nɛ enyɛn na ba eyur nɛ nchu lar mo to, enyɛn nɛ eche na kikɛ daga kebɛr nchu, ama bumo alɛ kraa beeŋ baa wɔ eyurpi to n ya fo kaaseso.

19Nɛ eche lar ntaman nna, e beeŋ wora eyurpi nchɛ ashunu. Esa kama malɛ nɛ e beta mo gba beeŋ wora eyurpi n ya fo kaaseso. 20Kusɔ kama nɛ eche na chena so ŋko n dese so jemanɛ nɛ e bee lar ntaman na kikɛ wora eyurpi nna. 21-23Esa kama nɛ e beta mbe kusɔ deseso ŋko kusɔ chenaso nɛ e dese so ŋko n chena so daga fanɛ e fɔr mbe asɔbuuso nseŋ bɛr nchu, ama mo alɛ kraa beeŋ baa wɔ eyurpi to n ya fo kaaseso. 24Nɛ enyɛn di eche nɛ e bee lar ntaman, eche na be eyurpi na suse enyɛn na nna na. Enyɛn na gba beeŋ baa wɔ eyurpi to nchɛ ashunu nɛ kusɔ kama nɛ e dese so gba a wora eyurpi.

25Nɛ eche bee shile ŋklaŋ nɛ jemanɛ nɛ e bee lar ntaman maŋ naŋ fo ŋko kachɛ nɛ ŋklaŋ na daga e ka kuu na baŋ so, e kraa wɔ eyurpi to nna n ya fo fanɛ ŋklaŋ na ka beeŋ ku fanɛ kananɛ e bee wora eyurpi kufɔl kikɛ to na. 26Kusɔ kama nɛ e dese so ŋko n chena so loŋ be jemanɛ na wora eyurpi nna na. 27Esa kama nɛ e beta kusɔ deseso ŋko kusɔ chenaso na gba wora eyurpi nseŋ daga fanɛ e fɔr mbe asɔbuuso nseŋ bɛr nchu, ama mo alɛ kraa beeŋ baa wɔ eyurpi to n ya fo kaaseso. 28Eche na be ŋklaŋ na baŋ kuu, k beeŋ ta mo nchɛ ashunu pɔɛŋ nɛ e nyalɛ so. 29Kachɛ burwasopo na e ta elepɔ anyɔ ŋko ali anyɔ n ya sa bɔrɛmatapo na ashi wajɛbu na be kabuna ase. 30Bɔrɛmatapo na beeŋ ta mbuibi na be eko n lara kulubi be sarga nseŋ ta emo nɛ e ka na malɛ n lara sarga chɔɔso. Kananɛ e beeŋ wora eche na be kenyalɛso be kesheŋ wora nna na.

31Ade kikɛ be kaman, nɛ Enyɛnpe Ebɔrɛ na naŋ kaŋɛ Mosis fanɛ e kpele Israɛl be basa na kusoe a laŋɛ bumo be eyurpisheŋ be kaplɛa so, saŋɛ na so b maaŋ ta eyurpi m pɛ wajɛbu nɛ k wɔ keeyi na be nferinto na. Nɛ b ta eyurpi m pɛ kumo, efuli na kikɛ beeŋ wu.”

32Mbraana nɛ a dese a laŋɛ enyɛn nɛ nchu bee lar mbe kenyɛnsɔ to ŋko enyɛn nɛ e di eche nseŋ ba eyur, 33ŋko eche ka bee lar ntamaŋ ŋko enyɛn ka di eche nɛ e bee lar ntaman nna na.

Currently Selected:

Levitikɔs 15: GJNb

Highlight

Copy

Compare