Levitikɔs 14

Eyurso be kulɔ ka loge be kasheŋwora be asheŋ

1Nɛ Enyɛnpe Ebɔrɛ na kaŋɛ Mosis, 2“Mbraana nɛ a wɔtɔ n sa esa nɛ e lɔ eyur so be kulɔ lubi fanɛ keboti ŋ ku so nseŋ nya kechɛ nde. Kachɛ nɛ a daga b shin nɛ ekama e pin fanɛ e nyalɛ so na kaŋ fo, b shin nɛ bɔrɛmatapo na e pin mbe asheŋ. 3Saŋɛ na so bɔrɛmatapo na beeŋ lar keeyi na to n ya tu mo nseŋ mige mo to ŋ keni nɛnɛ. Nɛ esa na nya kechɛ ashi eyur so be kulɔ lubi na to, 4bɔrɛmatapo na beeŋ shin nɛ b ya bar mbuibi keniso anyɔ nɛ a daga keta n lara sarga nɛ kedibi nɛ baa tre sida na nɛ kechɛbi peper chɛŋchɛŋ nɛ keduuso nɛ baa tre hisɔp na be afantaŋ. 5Kumo be kaman nɛ bɔrɛmatapo na e shin nɛ b ta mbuibi anyɔ na to be ekoŋwule n chulgi kapuya nɛ k kɔ kechubu to be nchu so m mɔ kumo. 6Kede be kaman nɛ e ta kabuibi nyɔsopo na nɛ sida be kedibi na be keyabi nɛ kechɛbi peper chɛŋchɛŋ na nɛ hisɔp be afantaŋ na n nyɔ kabuibi nɛ b mɔ na be ŋklaŋ na to 7ŋ ŋmenyaŋ esa nɛ baa sha e ka nyalɛ so ashi mbe kulɔ lubi to na so ale shunu. Kumo be kaman nɛ bɔrɛmatapo na e shin nɛ mo nɛ ekama e pin fanɛ e nyalɛ so nseŋ yige kabuibi nyɔsopo na to nɛ e firgi n yɔ kupuŋ to.

8Ade kikɛ be kaman, esa na beeŋ fɔr mbe asɔbuuso nseŋ she mbe emin kikɛ. Kumo be kaman nɛ e bɛr nchu pɔɛŋ nseŋ nyalɛ so daŋkare be ekpa so. B baŋ wora loŋ n loge, e beeŋ tiŋ m bɛta n yɔ keeyi na to, ama nchɛnshunu be kaman pɔɛŋ nɛ e beeŋ tiŋ n luri mo gbagba be wajɛbu to. 9Kachɛ shunusopo na e beeŋ naŋ she mbe kumu nɛ katɔl nɛ anishi guŋgumbi nɛ mbe eyur so be afuibi kikɛ. Mo alɛ beeŋ naŋ fɔr mbe asɔbuuso nseŋ bɛr nchu pɔɛŋ nseŋ nyalɛ so.

10Kachɛ burwasopo na e beeŋ ta ekpakpafɔlbi anyɔ nɛ kubolpɔche nɛ k fo kafɛ koŋwule nsaa maŋ kɔ ndulgi kikɛ nɛ nyifu nɛ b ta ɔlif be ŋku m baga be kurwa koŋwule nɛ bargato nɛ ɔlif be ŋku kɔlba koŋwule nɛ bargato n ti so m ba bɔrɛmatapo na kutɔ. 11Saŋɛ na so bɔrɛmatapo na beeŋ keta mo nɛ mbe esarga be asɔ na kikɛ n yɔ wajɛbu na be kabuna ase 12nseŋ ya ta kpakpafɔlbi na be kuko n ti ŋku kɔlba koŋwule nɛ bargato na so n lara kewora n jija be sarga. Kumo be kaman nɛ e maŋ amo so a ŋini fanɛ k la sargagboŋ nna n sa Enyɛnpe Ebɔrɛ na nɛ k bee yɔ bɔrɛmatapo na kutɔ. 13Kakpa nɛ baa mɔ kulubi be esarga nɛ esarga chɔɔso be asɔbɔya na nɛ e beeŋ mɔ kpakpafɔlbi na. A daga e ka wora loŋ, ŋkpal manɛ so, k la kewora n jija be sarga nna fanɛ kananɛ kulubi be sarga la bɔrɛmatapoana na be kachige nsaa du cheembi ga na. 14Bɔrɛmatapo na beeŋ suse ŋklaŋ na be eko n wora amo ŋ gbiti esa nɛ baa sha ekama ka pin fanɛ e ka nyalɛ so na be jisoso be kusoe to nɛ mbe enɔjiso be keshilbinio nɛ keya jiso be kenashilbinio. 15Bɔrɛmatapo na beeŋ duga ɔlif be ŋku na be eko n wɔtɔ mo gbagba be enɔ bena to, 16nseŋ ta mbe enɔjiso be keshilbi n nyɔ ŋku na to ŋ ŋmenyaŋ ale ashunu ashi Enyɛnpe Ebɔrɛ na be anishito. 17Kumo be kaman nɛ e wora ŋku nɛ a wɔ mbe enɔ be epunto na nɛ kpakpafɔlbi na be ŋklaŋ na be ako ŋ gbiti esa nɛ baa sha ekama ka pin fanɛ e nyalɛ so na be jisoso be kusoe to nɛ mbe enɔjiso be keshilbinio nɛ mbe keya jiso be kenashilbinio. 18Bɔrɛmatapo na kaŋ loge, e beeŋ ta ŋku nɛ a ka mbe enɔ to na ŋ gbiti esa nɛ baa sha e nyalɛ so na be kumu to nseŋ ta asɔbɔya anyɔ nɛ b ka na be ako n lara kulubi be sarga nɛ ayu be sargajibi nɛ k bee par Enyɛnpe Ebɔrɛ na. Kananɛ e beeŋ wora nɛ esa na e nyalɛ so nna na.

19Ade be kaman nɛ bɔrɛmatapo na e lara kulubi be sarga nseŋ wora kusɔ nɛ k beeŋ shin nɛ esa nɛ e maŋ walɛ so na e nyalɛ so. Kumo alɛ be kaman nɛ e mɔ sarga chɔɔso na be kusɔbɔya 20nseŋ ta kumo n ti ayu be sargajibi so n lara ashi bɔrɛsure na so. Kananɛ bɔrɛmatapo na beeŋ wora kenyalɛso be kesheŋ wora na nna na, nɛ esa na e nyalɛ so ashi Ebɔrɛ be ekpa so.

21Ama nɛ e la etirpo nna nsaa maaŋ tiŋ n nya ade kikɛ, e bar kpakpa koŋwule nseŋ ta nyifu nɛ b baga amo ŋku be kurwa koŋwule nɛ bargato nɛ a baa la ayu be sargajibi n ti so m ba lara kewora n jija be sarga nseŋ maŋ kumo so a ŋini fanɛ k la sargagboŋ nna n sa Enyɛnpe Ebɔrɛ na nsaa yɔ bɔrɛmatapo na kutɔ. 22Mo alɛ beeŋ naŋ bar ali anyɔ ŋko elepɔ anyɔ, nɛ ekoŋwule e baa la kulubi be sarga peya nɛ ekoŋwule malɛ e baa la sarga chɔɔso peya. 23Mbe kenyalɛso be kesheŋ wora na be kachɛ burwasopo na nɛ e beeŋ bar amo bɔrɛmatapo na kutɔ ashi wajɛbu na be kabuna ase. 24Bɔrɛmatapo na beeŋ maŋ kpakpa na nɛ ɔlif be ŋku na so ashi Enyɛnpe Ebɔrɛ na be anishito nɛ a baa la sargagboŋ nɛ k bee yɔ bɔrɛmatapo na kutɔ. 25Bɔrɛmatapo na beeŋ mɔ kpakpa na nseŋ suse ŋklaŋ na n nyɔ amo be ako to ŋ gbiti esa nɛ baa sha e nyalɛ so na be jisoso be kusoe to nɛ mbe enɔjiso be keshilbinio nɛ mbe keya jiso be kenashilbinio so. 26Bɔrɛmatapo na beeŋ duga ŋku na be eko n wɔtɔ mbe enɔ bena to 27nseŋ ta mbe enɔjiso be keshilbi shoduuso na n nyɔ amo to ŋ ŋmenyaŋ kasawule ashi Enyɛnpe Ebɔrɛ na be anishito ale shunu. 28Mo alɛ beeŋ wora ŋku na ŋ gbiti mboŋ nɛ e daŋ wora ŋklaŋ na ŋ gbiti esa nɛ baa sha e nyalɛ so na be jisoso be kusoe to nɛ mbe enɔjiso be keshilbinio nɛ mbe keya jiso be kenashilbinio so. 29E beeŋ ta ŋku nɛ a ka mbe enɔ to na ŋ gbiti esa na be kumu to. Kananɛ e beeŋ wora esa na be kenyalɛso be kesheŋ wora na nna na. 30Kumo be kaman nɛ bɔrɛmatapo na e ta ali na ŋko elepɔ na n lara 31kulubi be sarga nseŋ ta amo nɛ a ka na n ti ayu be sargajibi so n lara sarga chɔɔso. Kananɛ bɔrɛmatapo na beeŋ wora kenyalɛso be kesheŋ wora na nna na.” 32Mbraana nɛ a dese n sa esa nɛ kulɔ lubi fanɛ keboti pɛ nɛ mo alɛ maaŋ tiŋ n nya esargasɔ nɛ a daga e lara nseŋ nyalɛ so nna na.

Laŋ to be asɔ ka puu be asheŋ

33Nɛ Enyɛnpe Ebɔrɛ na kaŋɛ Mosis nɛ Ɛɛrɔn le: 34“Men kaŋ ya luri Keenan be kasawule nɛ mee sha keta n sa menyi ere to, nɛ ŋ kaŋ shin nɛ ndoŋ be laŋ ko be egbal puu, 35laŋwura na daga e ya kaŋɛ bɔrɛmatapo na fanɛ e wu kusɔ ko ka puu mbe laŋ to. 36Bɔrɛmatapo na beeŋ shin nɛ b bela kusɔ kama n lar laŋ na to pɔɛŋ nɛ ya mige kusɔ nɛ k puu na to ŋ keni nɛnɛ, nɛ mannɛ aloŋ e beeŋ kaŋɛ fanɛ asɔ nɛ a wɔ laŋ na to na kikɛ maŋ walɛ so. Kumo be kaman nɛ bɔrɛmatapo na e ya keni laŋ na kikɛ to nɛnɛ. 37E beeŋ ya mige egbal nɛ k puu na kikɛ ŋ keni nɛnɛ. Nɛ mboŋ nɛ a puu na ki kefitiri bumbuŋ ŋko m pere to amo alɛ nseŋ luri egbal na to ga, 38bɔrɛmatapo na beeŋ lar laŋ na to nseŋ ti kumo so n yili nchɛnshunu. 39Kachɛ shunusopo na kaŋ fo bɔrɛmatapo na beeŋ naŋ yɔ n ya keni laŋ na to nɛnɛ. Nɛ kapuu na salga to egbal na so n ti so, 40e beeŋ shin nɛ b bure egbal na nseŋ bela ajembu ŋko ebirkesi nɛ b ta m pɔr laŋ na n lar kade na to n ya lɛ kakpa nɛ baa lɛ asɔ lubi na. 41A daga e shin nɛ b marga eshishɛr nɛ b ta n la egbal na nseŋ sulɔ amo kikɛ nyam n lar kade na to n ya lɛ. 42Kumo be kaman nɛ b ta ajembu ŋko ebirkesi pɔtɛ m pɔr nseŋ baga shishɛr popɔr n la egbal na.

43B kaŋ lara ajembu ŋko ebirkesi dra na n ta apopɔr m pɔr nseŋ la egbal na, nɛ kapuu na kraŋ naŋ lar egbal na so, 44bɔrɛmatapo na beeŋ naŋ yɔ n ya keni. Nɛ k ba fanɛ kapuu na salga to nna, kumo ere laŋ na maŋ walɛ so nna na. 45A daga b bure kumo nseŋ sulɔ kumo be ajembu ŋko ebirkesi nɛ eyɔri kikɛ n lar kade na to n ya lɛ kakpa nɛ baa lɛ asɔ lubi na. 46Esa kama nɛ e beeŋ luri laŋ na to jemanɛ nɛ b ti kumo so n yili na maaŋ baa walɛ so hale n ya fo kaaseso. 47Esa kama nɛ e beeŋ dese ŋko n ji laŋ na to daga e fɔr mbe asɔbuuso.

48Ama bɔrɛmatapo na ka naŋ ya keni laŋ na jemanɛ nɛ b lɔŋɛ kumo n la na, n wu fanɛ kapuu na maŋ naŋ lar egbal na so, e beeŋ shin nɛ ekama e pin fanɛ k walɛ so daŋkare be ekpa so, ŋkpal manɛ so, kapuu na maŋ naa wɔ laŋ na to. 49Mbuibi anyɔ nɛ kedibi nɛ baa tre sida na be keyabi nɛ kechɛbi peper chɛŋchɛŋ nɛ keduuso nɛ baa tre hisɔp na be afantaŋ nɛ bɔrɛmatapo na beeŋ ta n wora kenyalɛso be kesheŋ wora n shin nɛ laŋ na e naŋ nyalɛ so. 50E beeŋ keta mbuibi na be eko n chulgi kapuya nɛ kechubu be nchu wɔ kumo to na so m mɔ kumo. 51Kumo be kaman nɛ e ta sida be kedibi na nɛ hisɔp be keyabi nɛ afantaŋ wɔ kumo so na nɛ kechɛbi peper chɛŋchɛŋ na nɛ kabuibi keniso na n nyɔ kabuibi nɛ e teŋ na be ŋklaŋ nɛ nchu na to ŋ ŋmenyaŋ laŋ na so ale ashunu. 52Kusɔ nɛ e beeŋ wora nɛ laŋ na e naŋ nyalɛ so nna na. 53Kumo be kaman nɛ e shin nɛ kabuibi keniso na e firgi n lar kade na to n yɔ kupuŋ to. Kananɛ e beeŋ wora kenyalɛso be kasheŋwora nɛ laŋ na e naŋ nyalɛ so daŋkare be ekpa so nna na.” 54-57Mbraana nɛ a wɔtɔ a laŋɛ eyur so be alɔ lubi fanɛ achuu lubi nɛ achuubɔbɔ nɛ asɔpuŋiso ka wora esa ŋko abibi ka wurge esa be eyur so ŋko afɔr ka to esa be eyur so ŋko asɔbuuso so ŋko nwu ka puu ŋko esa ŋko kusɔ ka walɛ so ŋko k maŋ walɛ so daŋkare be ekpa so be kaplɛa so nna na.

Currently Selected:

Levitikɔs 14: GJNb

Highlight

Copy

Compare