Levitikɔs 11

Asɔbɔya nɛ a walɛ n daga keji be asheŋ

(Ditɛronɔmi 14:3-21)

1Nɛ Enyɛnpe Ebɔrɛ na kaŋɛ Mosis nɛ Ɛɛrɔn 2fanɛ b kaŋɛ Israɛlebi na le: “Asɔbɔya nɛ a wɔ kasawule so ere kikɛ be amo nɛ menyeeŋ tiŋ n ji nde: 3Kusɔbɔya kama nɛ mbe alotobi barga to nɛ k bee gbu apla, 4-6ama men sa maŋ kaŋ we asɔbɔya fanɛ enyɔma nɛ kupuŋ to ŋko kowu be elɔŋɛ. Baa gbu a pla ama bumo alɛ maŋ kɔ alotobi nɛ a barga to. A la asɔbɔya nɛ e maŋ walɛ nsaa maŋ daga keji nna. 7Men sa maŋ kaa ji epreku. A la asɔbɔya nɛ e maŋ walɛ nsaa maŋ daga keji nna, ŋkpal manɛ so, amo be alotobi barga to ama amo alɛ maa gbu apla. 8A maŋ daga men ka ji le be asɔbɔya ere ŋko m beta amo be kuwuso gba. Ŋkpal manɛ so, a la asɔbɔya nɛ a maŋ walɛ nna.

9Menyeeŋ tiŋ n ji kɔrɔtɔ be yiri kikɛ nɛ k kɔ afafaribi, 10ama nchu to be kusɔ keniso kikɛ nɛ k maŋ kɔ afafaribi maŋ daga men ka ji kumo. 11Le be asɔ ere kikɛ la ekishi nna, a maŋ daga men ji ŋko m beta amo be kuwuso gba. 12Men sa maŋ kaŋ ji nchu to be kusɔ keniso kama nɛ k maŋ kɔ afafaribi, ŋkpal manɛ so, a la ekishi nna n sa menyi.

13-19Mbuibi nɛ a maŋ walɛso nsaa maŋ daga fanɛ men baa ji amo ŋkpal a ka la ekishi so nde: Kusore nɛ gbuŋgbula nɛ kɔl nɛ lambɛ nɛ kɔlfɔɔti nɛ margaati nɛ jita nɛ mɔmɔ nɛ nyiŋgbeŋ nɛ luku nɛ tɔkɔrkɔ nɛ kelɛkelɛ nɛ ebɔrɛ be kabuibi nɛ kɔŋkɔŋ. 20Asɔfirgisobi kikɛ nɛ a kɔ atɛ maŋ walɛ nsaa maŋ daga keji, 21she amo nɛ a bee tɛ na nawule. 22Menyeeŋ tiŋ n ji elotɔr nɛ epantɛ nɛ alonte. 23Ama asɔwurbi kama nɛ a kɔ atɛ nseŋ naa gbeye kasawule so maŋ walɛ, a la ekishi nna n sa menyi.

24-28Esa kama nɛ e beta asɔbɔya ere be kekama be kuwuso maaŋ baa walɛ so hale nɛ epeŋi e ya tɔr. Asɔbɔya na a la amo nɛ a kɔ alotobi nɛ a maŋ barga to nɛ amo alɛ maa gbu a pla nɛ asɔbɔya kikɛ nɛ a kɔ akuti. Esa kama nɛ e sulɔ asɔbɔya ere be kekama be kuwuso daga e fɔr mbe asɔbuuso, ama e kraa beeŋ baa wɔ eyurpi to n ya fo kaaseso.

29-30Asɔbɔya wurbi nɛ a bee nite ŋko a gbeye kikɛ to, amo nɛ a maŋ walɛ nsaa maŋ daga keji e la jɔɔni nɛ shiboe nɛ ebulomuti be yiri kikɛ nɛ ati be yiri kikɛ fanɛ ebutokiti nɛ etante nɛ ekɔɔde nɛ eslambulwe nɛ edekarka. 31Esa kama nɛ e beeŋ beta amo be kekama be kekeniso ŋko kuwuso beeŋ baa wɔ eyurpi to hale nɛ epeŋi e ya tɔr. 32Nɛ emo be kekama wu n tɔr kusɔ kikɛ so fanɛ kedibi ŋko wajɛ ŋko kawɔl ŋko bɔtɛ, k beeŋ wora eyurpi nseŋ daga kefɔr. Ama kumo alɛ kraa beeŋ baa wɔ eyurpi na to hale n ya fo kaaseso. 33Nɛ amo be kekama wu n tɔr kapuya to, kusɔ kikɛ nɛ k wɔ kumo to beeŋ wora eyurpi nseŋ daga fanɛ men bure kapuya na. 34Nɛ kapuya na to be nchu do ajibi jiso to, ajibi na beeŋ wora eyurpi. Kusɔ nuuso kikɛ nɛ k shi kapuya na to ma alɛ gba wora eyurpi. 35Nɛ emo be kekama wu n tɔr kusɔ kama so k bee wora eyurpi nna. An ta fanɛ nɛ emo be kuko wu n tɔr asure nɛ b yuu ŋko bodobodo be ebu nɛ b pɔr so, k beeŋ wora eyurpi n daga fanɛ b bure kumo. 36Ama nɛ kekama wu n tɔr ketirbu ŋko kakpa nɛ b pɔr a suse nchu a wɔtɔ to bre ketirbu na ŋko kusɔ suse, nchu na kraa walɛ nna, ama kusɔ kama nɛ k beeŋ beta kusɔ wuso na bre beeŋ wora eyurpi. 37Nɛ kekama wu n tɔr asɔduu to, asɔduu na kraa walɛ. 38Ama nɛ asɔduu na pɔlɔ nchu to nna nɛ k wu n tɔr amo to, kumo ere asɔduu na wora eyurpi nna na.

39Nɛ asɔbɔya nɛ menyeeŋ tiŋ n ji na gba be kekama wu kpi nɛ esa beta kumo, esa na beeŋ wora eyurpi hale nɛ kaase e ya fo. 40Esa kama nɛ e we kusɔbɔya na be eblaŋ daga e fɔr mbe asɔbuuso, ama e beeŋ kraa wɔ eyurpi to hale nɛ kaase e ya fo. Esa kama malɛ nɛ e sulɔ loŋ be kusɔbɔya gba daga kefɔr mbe asɔbuuso, ama mo alɛ kraa beeŋ baa wɔ eyurpi to hale nɛ kaase e ya fo.

41Men sa maŋ kaŋ ji asɔbɔya wurbi nɛ b na kasawule so ere be kekama. 42Amo e la amo nɛ a bee gbeye ŋko a nite aya ana ŋko aya damta so na. 43Men sa maŋ kaŋ we amo be kekama n ta eyurpi m pɛ menyi be amu. 44Ma e la Enyɛnpe Ebɔrɛ menyi be Ebɔrɛ na nɛ a daga men lara menyi be amu n yili a kɔr bekama to a ŋini fanɛ men la n nawule peya nna, ŋkpal manɛ so, n du cheembi nna. 45Ma e la Enyɛnpe Ebɔrɛ nɛ n lara menyi ashi Ijipt be efuli so m ba nɛ m baa kaa la men be Ebɔrɛ, amoso men baa du cheembi, ŋkpal manɛ so, n du cheembi nna.

46Mbraana nɛ a wɔtɔ a laŋɛ asɔbɔya nɛ mbuibi nɛ nchu to be asɔ keniso kikɛ nɛ kusɔ kama nɛ k bee nite ŋko a gbeye kasawule so be kaplɛa so nna na. 47Men baa da so nseŋ tiŋ m pin m barga asɔ nɛ a walɛ Ebɔrɛ be ekpa so ashi amo nɛ a maŋ walɛ so to, nseŋ tiŋ m barga asɔbɔya nɛ a daga keji ashi amo nɛ a maŋ daga keji to.”

Currently Selected:

Levitikɔs 11: GJNb

Highlight

Copy

Compare