Levitikɔs 12

Kusɔ nɛ eche nɛ e kurge kebumbuŋ to beeŋ wora be asheŋ

1Nɛ Enyɛnpe Ebɔrɛ na kaŋɛ Mosis fanɛ 2e kaŋɛ Israɛlebi na le: “Eche kama nɛ e di kedampo ŋ kurge ebinyɛn beeŋ wora eyurpi daŋkare be ekpa so nchɛnshunu fanɛ kananɛ e bee wora eyurpi jemanɛ nɛ e bee lar ntamaŋ na. 3Kachɛ burwasopo na nɛ b ku kebia na kututu. 4Kumo be nchɛ adesa nɛ asa be kaman pɔɛŋ nɛ e beeŋ nyalɛ so ashi ŋklaŋ nɛ a lar mo to na to. A maŋ daga e ka beta kusɔ kama nɛ k du cheembi ŋko n luri wajɛbu cheembi na to ama nchɛ adesa nɛ asa na fo ekar.

5Eche kama nɛ e kurge ebiche, beeŋ baa wɔ eyurpi to daŋkare be ekpa so n ya fo nchɛ kuduana fanɛ kananɛ e bee pɛ eyurpi jemanɛ nɛ e bee lar ntamaŋ na. Kumo be nchɛ adeshe nɛ ashe be kaman pɔɛŋ nɛ e beeŋ nyalɛ so daŋkare be ekpa so, ŋkpal ŋklaŋ nɛ a lar mo to na so.

6Nchɛ nɛ eche na beeŋ ta n nyalɛ so na kaŋ fo ekar, e beeŋ bar kpakpa nɛ k fo kafɛ koŋwule nɛ keli ŋko lepɔ m ba sa bɔrɛmatapo na ashi wajɛbu cheembi na be kabuna nɛ e ta kpakpa na n lara sarga chɔɔso nseŋ ta keli ŋko lepɔ na n lara kulubi be sarga. 7Bɔrɛmatapo na beeŋ bar eche na be sarga na Enyɛnpe Ebɔrɛ na kutɔ m ba lara kumo n fɔr mo so nɛ e naŋ nyalɛ so daŋkare be ekpa so. Kusɔ nɛ eche nɛ e kurge daga fanɛ e wora nna na.

8Nɛ eche na maaŋ tiŋ n nya kpakpafɔlbi na, e beeŋ bar ali anyɔ ŋko elepɔ anyɔ, nɛ kukoŋwule e baa la sarga chɔɔso peya nɛ kenyɔsopo na e baa la kulubi be sarga peya. Nɛ bɔrɛmatapo na e ta amo n lara kenyalɛso be sarga nɛ eche na e nyalɛ so daŋkare be ekpa so.”

Currently Selected:

Levitikɔs 12: GJNb

Highlight

Copy

Compare