Ɛksodɔs 37

Kɔnɔkoŋwule be ŋkre be deka be asheŋ

1Besalɛl daŋ ta akasiadibi n lɔŋɛ deka nɛ kumo be nteŋ to la ayadra ana nɛ bargato nɛ mparto malɛ la ayadra anyɔ nɛ jeŋgreŋ la ayadra anyɔ. 2Kumo be kaman nɛ e ta shuwa gbagba m mata m mata deka na be epunto nɛ kaman kikɛ nseŋ lɔŋɛ shuwa be kekrande m mata kumo ŋ kulti 3nseŋ bɛl shuwa be mpinibi ana n wɔtɔ kumo be aya ana na to. 4E ka wora loŋ n loge na nɛ e naŋ shɛl akasiadibi tenteŋ anyɔ nseŋ ta shuwa m mata m mata amo so. 5Kumo be kaman nɛ e yisi ndibi na n wɔtɔ mpinibi nɛ a wɔ deka na be akel to na to nɛ b baa pɛ to a maŋ kumo so. 6Kede be kaman nɛ e ta shuwa gbagba n lɔŋɛ deka na be buuso nɛ baa tre kuwɔr be kakpa na nɛ kumo be nteŋ to la ayadra ana nɛ mparto malɛ la ayadra anyɔ. 7Kumo alɛ be kaman nɛ e bɛa shuwa to n lɔŋɛ chɛrubim anyɔ n yuu kuwɔr be kakpa na be nteŋ to be ekarso na. 8E lɔŋɛ chɛrubim anyɔ na nna nɛ amo nɛ buuso na kikɛ la kukoŋwule. 9Chɛrubim na daŋ kilgi anishito nna n shoŋi abar nseŋ parga atɛ to m buu deka na be buuso na so.

Teebɔl na be asheŋ

10Kumo be kaman nɛ b ta akasiadibi n lɔŋɛ teebɔl nɛ kumo be nteŋ to la ayadra asa nɛ mparto la keyadra koŋwule nɛ bargato, nɛ jeŋgreŋ malɛ la ayadra anyɔ, 11nseŋ ŋalga shuwa n wurge kumo kikɛ so 12nseŋ naŋ ta shuwa n lɔŋɛ kekrande nɛ kumo be mpar sa fanɛ enɔ be mparto ŋ kulti kumo be ekarso kikɛ. 13-14Kumo be kaman nɛ b wora shuwa be mpinibi ana n chɔga teebɔl na be abonfu ana be aya na kikɛ so, saŋɛ na so baaŋ baa ta ndibi nɛ b shɛl na a wɔtɔ amo to a maŋ teebɔl na so. 15B ta akasiadibi nna n shɛl ndibi nɛ baaŋ pɛ to a maŋ teebɔl na so a keta na nseŋ ŋalga shuwa n wurge amo kikɛ so. 16Nɛ b ta shuwa gbagba n lɔŋɛ teebɔl na so be eprete nɛ mba nɛ echeenshi nɛ kapugboŋ nɛ baa ta sarga be asɔnuuso a wɔtɔ na.

Kefitilatɔl na be asheŋ

17B ta shuwa gbagba nna m bɛl kefitilatɔl na nɛ kumo be ayabi nɛ a kɔ asɔ ko fanɛ atoto be alambu na nɛ amo kikɛ la kukoŋwule. 18B daŋ wora kefitilatɔl na be ayabi na ashe nna nɛ amo be asa daa yuu kekel ko so nɛ asa malɛ yuu kekel nɛ k ka na so. 19Ayabi ashe na be kekama daa kɔ asɔ ko nɛ a du fanɛ atoto be alambu na be asa nna. 20Kefitilatɔl na be nteto na malɛ gbagba daa kɔ asɔ nɛ a du fanɛ atoto be alambu na be ana nna. 21Nɛ ayabi asa nɛ a bee barga to a ki anyɔnyɔ na be kekama be kaseto gba daa kɔ atoto be kelambu na be kukoŋwule. 22B daŋ ŋalga shuwa gbagba nna n lɔŋɛ kefitilatɔl na nɛ kumo be ayabi na, nɛ amo kikɛ la kukoŋwule. 23B ta shuwa gbagba n lɔŋɛ efitila wurbi ashunu nɛ asɔ nɛ baa ta a lɔŋɛ efitila na be achɛbi so nɛ eprete nɛ b kɔ a suse amo be nsunɔ na. 24Shuwa gbagba nɛ amo be egbɛ sa fanɛ kilo adesa nɛ anu nɛ b ta n lɔŋɛ kefitilatɔl na nɛ kumo be kusɔ kama nyam.

Duwu be bɔrɛsure be asheŋ

25B daŋ ta akasiadibi nna n lɔŋɛ bɔrɛsure nɛ baaŋ ba chɔɔ duwu kumo so. Kumo be nteŋ to nɛ mparto kikɛ daa sasa fanɛ keyadra koŋwule nɛ bargato nna nɛ kumo be jeŋgreŋ malɛ daa la ayadra asa. B daŋ wora kumo be esoso be abonfu ana na nna fanɛ alambɛ n shin nɛ amo nɛ kumo kikɛ chɔ abar so a la kukoŋwule. 26B daŋ ta shuwa gbagba nna m mata kumo be awɔlto nɛ akel to nɛ alambɛ na kikɛ so ŋ kulti, nseŋ ŋalga shuwa ŋ kulti kumo be nnɔkar kikɛ nɛ a du gbuntelin. 27Kumo be kaman nɛ b ta shuwa n lɔŋɛ mpinibi anyɔ n chɔga kumo be akel to, shuwa gbuntelin na be kaseto, a yisi ndibi tentembi na a wɔtɔ amo to a maŋ kumo so. 28Akasiadibi nɛ b daŋ ta n shɛl ndibi tentembi na nseŋ ta shuwa m mata amo kikɛ so. 29Ade be kaman nɛ basa nɛ b nyi tulale be kewora wora ŋku nɛfaso nɛ efɛa belbelso be duwu.

Currently Selected:

Ɛksodɔs 37: GJNb

Highlight

Copy

Compare