Ɛksodɔs 38

Sarga chɔɔso be bɔrɛsure be asheŋ

1Kede be kaman b daŋ naŋ ta akasiadibi nna n lɔŋɛ bɔrɛsure n shin nɛ kumo be nteŋ to nɛ mparto kikɛ sasa nsaa la ayadra ashunu nɛ bargato, nɛ kumo be jeŋgreŋ malɛ la ayadra ana nɛ bargato. 2B daŋ wora kumo be esoso be abonfu ana na nɛ a du fanɛ alambɛ nna nseŋ shin nɛ bɔrɛsure na nɛ alambɛ na kikɛ chɔga abar so a la kukoŋwule. Kumo be kaman nɛ b ta danyaŋ m mata bɔrɛsure na kikɛ so. 3Kumo be kaman nɛ b naŋ ta danyaŋ n lɔŋɛ asɔ nɛ b kɔ a shuŋ kumo so fanɛ nsunɔ be mpuliya nɛ eshabɔl nɛ ntishaŋgboŋ, nɛ kusɔ nɛ baa ta a chule eblaŋ nɛ kusɔ chɔɔ edɛ. 4-5Amo be kaman nɛ b naŋ ta danyaŋ n lɔŋɛ kusɔ ŋeseasɔ nseŋ lɔŋɛ danyaŋ be mpinibi ana m mata kumo be abonfu ana na kikɛ so. Kumo be kaman nɛ b ta kusɔ ŋeseasɔ na n wɔtɔ bɔrɛsure na be nferinto. 6Kumo be kaman nɛ b ta akasiadibi n shɛl ndibi tenteŋ nɛ baaŋ baa ta a sulɔ bɔrɛsure na nseŋ ta danyaŋ n mata amo so. 7B daa ta amo nna a yisi n wɔtɔ bɔrɛsure na be akel to be mpinibi anyɔ na to a ta kumo. B daŋ ta ndibi peŋgeleŋ peŋgeleŋ nna n lɔŋɛ bɔrɛsure na nɛ k kɔ kelaŋ kumo to.

Eyurso be kefɔr be katishaŋgboŋ

8B daŋ ŋalga beche nɛ baa shuŋ Enyɛnpe be wajɛbu na be kabuna to be danyaŋ be edigi nna n lɔŋɛ katishaŋgboŋ na nɛ kumo be ketɔl.

Wajɛbu cheembi na be kelɔnɛ be asheŋ

9-10Kumo be kaman nɛ b lɔŋɛ Ebɔrɛ be wajɛbu na be kelɔnɛ na gba. Kumo be kelargato be kaseto be kaba so be nteŋ to daa la ayadra kalfa nɛ adunu nna nɛ b ta ago lueso lela be epatisa ŋ kulti kumo be ndibi yuuso adunyɔ nɛ a kɔ danyaŋ be atɔl adunyɔ nɛ gbiti be ayir nɛ akɔltobi nɛ a bee kɔl patisa na to. 11Nɛ kumo be kelargato be esoso be kaba so be nteŋ to malɛ gba daa la ayadra kalfa nɛ adunu nɛ b ta ago lueso lela be epatisa ŋ kulti kumo be ndibi yuuso adunyɔ nɛ a kɔ danyaŋ be atɔl adunyɔ nɛ gbiti be ayir nɛ akɔltobi nɛ a kɔl patisa na to na. 12Kelɔnɛ na be epeŋitɔrkpa be kaba so be mparto daa la ayadra adushunu nɛ anu nna, nɛ b ta ago lueso lela be epatisa ŋ kulti kumo be ndibi yuuso kudu nɛ a kɔ danyaŋ be atɔl kudu nɛ gbiti be ayir nɛ akɔltobi nɛ a kɔl patisa na to na. 13Kelɔnɛ na be epeŋilarkpa be kaba so be mparto malɛ daa la ayadra adushunu nɛ anu nna. 14Kumo be kabuna to be kaba ko so be patisa daa la ayadra adunyɔ nɛ anyɔ nɛ bargato nna nsaa kɔ ndibi yuuso asa nɛ atɔl asa. 15Kaba nɛ k ka na malɛ gba be patisa daa la ayadra adunyɔ nɛ anyɔ nɛ bargato nna nsaa kɔ ndibi yuuso asa nɛ atɔl asa. 16B daŋ ta ago be ejese lela mɔlmɔlbi nna n lue epatisa nɛ a kulti kelɔnɛ na kikɛ 17nseŋ daŋ ta danyaŋ n lɔŋɛ ndibi yuuso be atɔl n ta gbiti n lɔŋɛ amo be ayir nɛ akɔltobi nseŋ ta gbiti m mata ndibi yuuso na gbagba so. Amoso, kelɔnɛ na be ndibi yuuso na kikɛ daa kɔ gbiti be ayir nna. 18Esa nɛ e nyi kajɔ e daŋ ta ejese nɛ a la buru nɛ apeper kpaw nɛ apeper kunɔkunɔ nɛ ago be ejese lela mɔlmɔlbi n lue Ebɔrɛ be wajɛbu na be kelɔnɛ so be kabuna to gbagba be patisa nɛ kumo be nteŋ to la ayadra adesa, nsaa kɔ ndibi yuuso ana nɛ amo be atɔl ana na. 19Ndibi yuuso ana na daa kɔ danyaŋ be atɔl ana nɛ gbiti be akɔltobi nɛ ayir nna, nɛ b ta gbiti m mata ndibi yuuso na be esoso. 20Danyaŋ nɛ b daŋ ta n lɔŋɛ Ebɔrɛ be wajɛbu na nɛ kelɔnɛ na kikɛ be ayir.

Asɔ nɛ b ta n lɔŋɛ Ebɔrɛ be wajɛbu be asheŋ

21-23Besalɛl nɛ e la Uri pibinyɛn nseŋ naa la Hur nɛ e shi Juda be kanaŋ to na mo nanabi na e wora kusɔ kama nɛ Enyɛnpe Ebɔrɛ kaŋɛ Mosis na kikɛ. Esa nɛ e daŋ chɛ mo to e daa la Oholiab nɛ e la Ahisamak nɛ e shi Dan be kanaŋ to na pibinyɛn nɛ e kɔ enɔ to be kushuŋ be kenyi a tiŋ a ta ago be ejese lela nɛ ejese buru nɛ apeper kpaw nɛ apeper kunɔkunɔ a lue ŋko a jɔ. Asɔ nɛ b daŋ ta n lɔŋɛ Ebɔrɛ be wajɛbu nɛ kɔnɔkoŋwule be ŋkre be deka na nɛ asɔ nɛ a daa wɔ kumo to na be kananɛ a sa nde. Mosis e daŋ bɔla Itama nɛ e la bɔrɛmatapo Ɛɛrɔn pibinyɛn na so n shin nɛ Livaiebi sibɛ amo be egbɛ nɛ kananɛ a sa. 24Shuwa nɛ basa daŋ sa fanɛ b shuŋ Ebɔrɛ be wajɛbu na be kushuŋ na be egbɛ daa la kilo kagboŋ nna. 25Gbiti nɛ b daŋ sɔ jemanɛ nɛ b daa karga basa na sa fanɛ kilo ŋgboŋ asa nɛ alfa ana nɛ adesa nna. 26Esa kama nɛ b daŋ karga kikɛ daŋ ka kukɔ nɛ b ku na nna. Bumo alɛ daa sa fanɛ basa ŋgboŋ alfa ashe nɛ asa nɛ alfa anu nɛ adunu nseŋ ji nfɛ adunyɔ ŋko m baŋ so nna. 27Gbiti nɛ amo be egbɛ sa fanɛ kilo adesa nɛ ana nɛ b daŋ ta n wora wajɛbu na nɛ patisa na be atɔl kalfa na. 28Gbiti nɛ b daŋ ta n lɔŋɛ ndibi yuuso na be akɔltobi nɛ ayir nɛ amo nɛ b ta m mata ndibi na be esoso malɛ be egbɛ daa sa fanɛ kilo adunyɔ nna. 29Danyaŋ nɛ b daŋ sa kikɛ be egbɛ daa sa fanɛ kilo ŋgboŋ anyɔ nɛ alfa ana nɛ adunyɔ nɛ anu. 30B daŋ ta danyaŋ na be ako nna n lɔŋɛ Enyɛnpe be wajɛbu na be kabuna to be atɔl, nɛ danyaŋ be bɔrɛsure nɛ kumo be kusɔ ŋeseasɔ nɛ asɔwurbi kikɛ. 31Amo be ako nɛ b daŋ ta n lɔŋɛ ndibi yuuso na be atɔl nɛ ayir kikɛ.

Currently Selected:

Ɛksodɔs 38: GJNb

Highlight

Copy

Compare