Ɛksodɔs 23

Kebaaji asheŋ nɛ amo be ekpa so be asheŋ

1Men sa maa bɔ efɛ be baru, ŋko a ji efɛ be shɛda a chɛ belubiworapo to. 2Men sa maa bɛ jimaŋ so a wora alubi ŋko a ji efɛ be shɛda ashi demujikpa. 3Men sa maa ji a chɛ esa to ŋkpal e ka la etirpo so. 4Nɛ fo doŋ be kena ŋko kurma saŋɛ n shile n luri to a yɔ, k daga fanɛ fo kuŋ mo m bɛta m ba sa mo. 5Nɛ fo ya tu fo doŋ nɛ mbe kurma tɔr nɛ esulɔ deŋ mo so, k daga fanɛ fo chɛ mo to n niŋi kurma na to, sa maŋ kaŋ baŋ mo so n choŋ. 6Men sa maa mɔn betirpo kashenteŋ ashi demujikpa ŋkpal b ka la betirpo so. 7Men sa maa ku efɛ a deŋi basa so, ŋko a ji demu a kaŋɛ fanɛ basa nɛ b maŋ wora n jija daga luwu. Esa kama nɛ e wora loŋ maaŋ ji n lar ma anishito kikɛ. 8Men sa maa sɔ brɔbu, ŋkpal manɛ so, brɔbu bee tan esa nna nɛ e maa wu kashenteŋ a ji. 9Men sa maa mɛaŋ befɔ, ŋkpal manɛ so men nyi kananɛ kebaala efɔ du. Menyi alɛ gba daa la befɔ nna ashi Ijipt be kasawule so.

Kewushiachɛ be mbra be asheŋ

10“Men dɔ kudɔsawule kama so nfɛnshe 11nseŋ yige kumo nɛ k wushi kafɛ shunusopo na bre to. Menyi alɛ e sa maŋ teŋi kumo so be akɔrbua kafɛ shunusopo na to, saŋɛ na so betirpo nɛ kupuŋ to be asɔbɔya gba beeŋ shishi amo nɛ a ka na n ji. Loŋ koŋwule na e daga fanɛ men wora men be afeelebi sɔrso nɛ ɔlif be ndibi be adɔ gba. 12Men ta nchɛ ashe n shuŋ, nseŋ wushi kachɛ shunusopo na, saŋɛ na so men be ana dɔso nɛ ekurma gba beeŋ wushi. Nɛ men be elaŋ to be anya nɛ befɔ gba e wushi. 13Men wora kasonu n sa kusɔ kama nɛ ma, Enyɛnpe Ebɔrɛ kaŋɛ menyi ere kikɛ. Menyi alɛ e sa maŋ kaŋ shuŋ kegbir kama ŋko a ti kegbir kama be ketre.”

Nchɛgboŋ asa na be asheŋ

(Ɛksodɔs 34:18-26; Ditɛronɔmi 16:1-17)

14Kafɛ kikɛ to men baa wora kejigboŋ be yiri yiri asa a bunyaŋ ma. 15Men baa wora bodobodo nɛ a maŋ kɔ yiisi na be kejigboŋ nchɛ ashunu kananɛ ŋ ŋini menyi na, Abib be kufɔl nɛ men daŋ lar kumo to ashi Ijipt be kasawule so na to. Loŋ be nchɛnshunu na to ekama e sa maŋ kaŋ ji bodobodo nɛ b ta yiisi n wora. Ekama malɛ e sa maŋ kaŋ ta enɔfuloŋ m ba ma anishito, ama e bar kusɔ ko m ba lara sarga n sa ma. 16Kasɔteŋi be jemanɛ baa fo, men wora Kasɔteŋi be Kejigboŋ. Kafɛ na ya kaa loge be saŋɛ nɛ menyee chala men be adɔjibi abar so na, men wora Kechala Abarso be Kejigboŋ na. 17Kafɛ kikɛ to, a daga fanɛ menyi to be benyɛn kikɛ ka shɛr Enyɛnpetale Ebɔrɛ na be anishito ale asa. 18Men sa maŋ shin nɛ asɔbɔya nɛ men ta n lara sarga n sa ma na be ŋklaŋ nɛ kusɔ kama nɛ k kɔ yiisi e wea abar to. Menyi alɛ e sa maŋ shin nɛ kare e chɛ asɔbɔya nɛ men ta n lara sarga n sa ma kejigboŋana na to na be nfɔ so. 19Kafɛ kikɛ men baa ta men be adɔjibi juŋkparso lelaana a bar ma, Enyɛnpe Ebɔrɛ, ashi kakpa nɛ menyee bunyaŋ ma na. Men sa maŋ kaŋ daŋɛ kaboe fɔlbi kumo nio be kenyipochu to.

Nnɔ naseso be asheŋ

20Ade kikɛ be kaman nɛ Ebɔrɛ kaŋɛ bumo le: “Meeŋ shin nɛ malaika ko e baa juŋkpar menyi ŋ kuŋ menyi ekpa to loŋ n ya fo kaboŋ nɛ n lɔŋɛ n yili menyi na. 21Men baa kaŋ kusoe a nu mbe ebɔl nsaa wora mo kasonu. Men sa maŋ kaŋ wora kulubi kikɛ ŋ gbiti mo. Nɛ men baŋ wora kulubi ŋ gbiti mo, e maaŋ yige m paŋ menyi, ŋkpal manɛ so, ma eleŋ wɔ mo so nna. 22Ama nɛ men baŋ wora mo kasonu kashenteŋto nseŋ wora kusɔ kama nɛ ŋ kaŋɛ menyi na, kumo ere, men doŋana beeŋ ki ma doŋana nɛ n kɔ bekama nɛ baa kɔ menyi. 23Nɛ ma malaika na e juŋkpar menyi n yɔ Amɔriebi nɛ Hitebi nɛ Pɛrizebi nɛ Keenanebi nɛ Hivebi nɛ Jebusiebi be nsawule so nɛ m mur bumo kikɛ. 24Men sa maŋ kaŋ bunyaŋ bumo be agbir na ŋko n shuŋ amo ŋko m bɛ bumo be edaŋkaresheŋ so. Men jija bumo agbirana na cheche nseŋ bure bumo be agbirjembu na to burburbi. 25Nɛ men baa shuŋ ma, Enyɛnpe Ebɔrɛ, men be Ebɔrɛ na, ma alɛ beeŋ nɛfa men be ajibi nɛ men be nchu nseŋ lara alɔana kikɛ ashi menyi to. 26Eche kikɛ be kedampo maaŋ gboŋi, ekama malɛ maaŋ ki egbentepo ashi men be kasawule so. Ma alɛ beeŋ sa menyi ŋkpa tenteŋ. 27Meeŋ shin nɛ kufu nɛ keyeŋiyeŋi e tɔr basa nɛ menyee tu na so. Meeŋ shin nɛ men doŋana e kilgi n shile menyi. 28Meeŋ shin nɛ edundumbɔfo e juŋkpar n ya ju Hivebi nɛ Keenanebi nɛ Hitebi. 29Ama m maaŋ ju bumo kafɛ koŋwule to, ŋkpal manɛ so, nɛ n wora loŋ, kasawule na beeŋ ki kiyitokpaŋ nɛ asɔbɔya lubi e wora keshi n sɔ kumo be kaplɛkama. 30Amoso, gbrɛgbrɛ nɛ meeŋ baa ju bumo loŋ n ya fo saŋɛ nɛ menyeeŋ wora keshi nseŋ tiŋ n suge kasawule na kikɛ na. 31Meeŋ shin nɛ men be ekar e yili teku peper na n ya fo Filistiebi be teku na nseŋ naŋ yili keshishɛrsawule na so n ya fo Yufreetes be lɔr na to. Meeŋ ta nsawule na so ebi m bɔɔ menyi enɔ nɛ men ju bumo ashi to. 32Men sa maŋ kaŋ shin nɛ menyi nɛ bumo nɛ bumo be agbirana e wora kɔnɔkoŋwule kikɛ. 33Men sa maŋ kaŋ shin nɛ b chena men be kasawule so, nɛ mannɛ aloŋ, baaŋ shin nɛ men wora kulubi ŋ gbiti ma, ŋkpal manɛ so menyeeŋ baa shuŋ bumo be agbirana na, nɛ k ki fanɛ kejigbelɛ n sa menyi.”

Currently Selected:

Ɛksodɔs 23: GJNb

Highlight

Copy

Compare