Ɛksodɔs 24

Ebɔrɛ nɛ Israɛlebi be kɔnɔkoŋwule be ŋkre be asheŋ

1Kachako nɛ Enyɛnpe Ebɔrɛ kaŋɛ Mosis le: “Fo nɛ Ɛɛrɔn nɛ Nadab nɛ Abihu nɛ Israɛlebi be bejuŋkparpo adushunu e ba ma kutɔ ashi kebee ere ase nfe. Ama pɔɛŋ nɛ men fo kumo men feŋ n yili m bunyaŋ ma. 2Fo Mosis nawule e firgi n taga ma, Enyɛnpe Ebɔrɛ na to. Bumo nɛ b ka na bre e sa maŋ kaŋ firgi n taga to, ŋko m bɛ mo so n dii kebee na m ba.” 3Mosis ka shi kebee na so m ba nɛ e ba kaŋɛ basa na mmalga nɛ Enyɛnpe Ebɔrɛ malga kikɛ nɛ mbraana nɛ e nase kikɛ. Nɛ basa na kikɛ kpaŋɛ ŋ kaŋɛ le: “Mmalga nɛ Enyɛnpe Ebɔrɛ malga na kikɛ, anyeeŋ bɛ amo so.” 4Ndoŋ nna nɛ Mosis sibɛ Enyɛnpe Ebɔrɛ be mmalga na kikɛ n nase. Kare ka chɛ kachipurdidi nɛ e wule ŋ koso n ya yuu bɔrɛsure ashi kebee na be kaseto nseŋ ta ajembu tenteŋ kuduanyɔ n yuu nɛ a yili n sa Israɛlebi be eyiri kuduanyɔ na. 5Kumo be kaman nɛ Mosis lara Israɛl be basa na to be mbrantiɛbia nɛ b ya lara sarga chɔɔso nseŋ ta ana n lara kɔnɔkoŋwuleso be esarga n sa Enyɛnpe Ebɔrɛ na. 6Nɛ Mosis ta loŋ be asɔbɔya na be ŋklaŋ be bargato n wɔtɔ ntishaŋ to nseŋ ta bargato nɛ a ka na malɛ ŋ ŋmenyaŋ bɔrɛsure na so. 7Kede be kaman nɛ e ta kɔnɔkoŋwule be ŋkre be kawɔl na ŋ kraŋ kumo awɔrso nɛ basa na nu nseŋ kaŋɛ le: “Mmalga nɛ Enyɛnpe Ebɔrɛ na malga na kikɛ, anyeeŋ bɛ amo so nseŋ wora kasonu n sa amo.” 8Ndoŋ nna nɛ Mosis ta ŋklaŋ na be amo nɛ a wɔ ntishaŋ to na malɛ ŋ ŋmenyaŋ basa na so nseŋ kaŋɛ le: “Men keni kɔnɔkoŋwule be ŋkre nɛ menyi nɛ Enyɛnpe Ebɔrɛ bɔla mmalga ere kikɛ so n nase na be ŋklaŋ nna na.” 9Asheŋ ere kikɛ be kaman nɛ Mosis nɛ Ɛɛrɔn nɛ Nadab nɛ Abihu nɛ Israɛlebi na be bejuŋkparpo adushunu dii kebee na be esoso. 10Ndoŋ nɛ b wu Israɛl be Ebɔrɛ na, nɛ kaboŋ dɛdɛso nɛ k du fanɛ yawukpakpaso be kejembu nɛ baa tre safiri na nseŋ fulto parr fanɛ awɔlpa na, ka wɔ mbe aya be kaseto. 11Ama Ebɔrɛ daa maŋ teŋi mbe enɔ m bar tɔrɔ Israɛl be bejuŋkparpo na be ekama so. B daŋ wu mo kenishiso nseŋ kraa wɔtɔ a ji a nuu.

Mosis ka dii n yɔ Sainai be kebee na so be asheŋ

12Nɛ Ebɔrɛ kaŋɛ Mosis: “Dii m ba kaa jo ma kebee ere be esoso nɛ n sa fo ajembu pantraŋ pantrambi nɛ n sibɛ mbra nɛ ma mmalga n deŋi so nɛ a baa ŋini Israɛlebi kananɛ baaŋ ba wora asheŋ.” 13Ndoŋ nna nɛ Mosis nɛ mbe kayɛrbi Joshuwa wora shiriya nɛ Mosis dii n yɔ Ebɔrɛ be kebee na so. 14Ama le nɛ Mosis daŋ kaŋɛ Israɛlebi be bejuŋkparpo na: “Men baa wɔ keeyi ere to a jo anyi hale nɛ an ya bɛta m ba. Ama Ɛɛrɔn nɛ Hur bre beeŋ baa wɔ menyi kutɔ nfe, amoso nɛ men be ekama nya demu e beeŋ tiŋ n ta kumo n yɔ bumo kutɔ nɛ b keni kumo to n sa mo.” 15Kede be kaman nɛ Mosis yɔ kebee na so nɛ kuwɔlpa buu kebee na kikɛ so. 16Nɛ Enyɛnpe Ebɔrɛ be kemaŋkura gbelge m ba Sainai be kebee na so nɛ kuwɔlpa na buu kumo so hale n ya fo nchɛnshe. Kachɛ shunusopo na nɛ Enyɛnpe Ebɔrɛ shi kuwɔlpa na be nferinto n tre Mosis. 17Israɛlebi na bre kutɔ, Enyɛnpe Ebɔrɛ be kemaŋkura nɛ k daŋ nyaŋɛ n yuu kebee na so daa du fanɛ edɛgboŋ ko ka bee chɔɔ na. 18Ndoŋ nna nɛ Mosis luri kuwɔlpa na to n yɔ kebee na be esoso n ya ji kebee na so nchɛ adena nɛ nnyɛ adena.

Currently Selected:

Ɛksodɔs 24: GJNb

Highlight

Copy

Compare