Ɛksodɔs 22

Kakɔka be mbra be asheŋ

1Esa baŋ yuri kena m mɔ ŋko n fa, k daga fanɛ e ka ana anu, nɛ kubolpɔ malɛ nna, a daga e ka mbolpɔ ana n tal to. 2-4K daga fanɛ esa e ka kusɔ kama nɛ e yuri be kukɔ. Nɛ e maŋ kɔ nɛ e ka malɛ, b fa mo fanɛ kenya ŋ ka kusɔ nɛ e yuri na be kukɔ. Nɛ esa yuri kena ŋko kurma ŋko kubolpɔ nɛ b ya wu kumo amodoŋwura kutɔ nɛ k kraa keni, k daga fanɛ e ka loŋ be asɔbɔya anyɔ n sa kusɔbɔyawura.

Nɛ esa bee kɔ a fin keluri esa be laŋ to n yuri kanyɛso, nɛ b ŋmɛa mo m mɔ, esa nɛ e mɔ mo na maŋ wora kulubi, ama nɛ k la kapaso bre, esa nɛ e mɔ mo na wora kulubi ŋkpal e ka mɔ mo na so. 5Nɛ fanɛ esa baŋ yige mbe asɔbɔya nɛ b luri mo barkasa be ndɔ to n ji mbe asɔ, k daga fanɛ asɔbɔyawura na e lara mbe adɔjibi nɛ a walɛ ga na n ya tal mo barkasa na to. 6Nɛ esa puga edɛ nɛ a chɔɔ m bɔla afitiriwurbi so n ya luri mo barkasa be ndɔ to n chɔɔ mbe adɔjibi, esa nɛ e puga edɛ na daga fanɛ e ka mo barkasa na be adɔjibi nɛ a chɔɔ na be kukɔ. 7Nɛ esa ta amansherbi ŋko asɔ n sa mo barkasa nɛ e yili nɛ eyu ya yuri amo ashi mbe ebu to nɛ b pɛ eyu na nna, k daga fanɛ eyu na e ka loŋ be asɔ be ale anyɔ. 8Ama nɛ fanɛ b maŋ pɛ eyu na bre, a daga fanɛ b bar esa nɛ e yili asɔ na Ebɔrɛ be anishito nɛ demujipoana e mige mo to ŋ keni mo e ta amo ŋko mannɛ mo e ta. 9Nɛ basa anyɔ bee kɔ a mɔlga kusɔ foeso fanɛ kusɔbɔya ŋko kusɔbuuso, nɛ k ki bumo emɔrɔ, k daga fanɛ b ta demu na n yɔ Ebɔrɛ be anishito demujipoana kutɔ nɛ b mige to. Kumo be kaman nɛ b shin nɛ emo nɛ e bee puni kumo na e ka kusɔ nɛ e bee puni na be ntuŋ anyɔ n sa mo barkasa na. 10Nɛ esa ta mbe kusɔbɔya n sa mo barkasa fanɛ e baa keni so nɛ kusɔbɔya na wu ŋko n nya doro ŋko n foe nɛ esa kama maŋ wu kumo, 11k daga fanɛ esa nɛ e bee keni kusɔbɔya na so na e yɔ Ebɔrɛ be anishito n ya bɔ ntaŋ fanɛ e maŋ wora kusɔbɔya na shɛŋ. Kede be kaman a daga fanɛ kusɔbɔya na wura e shuli fanɛ k la kashenteŋ nna, nɛ mo barkasa na e sa maŋ ka shɛŋ n sa mo. 12Ama nɛ fanɛ b yuri kusɔbɔya na nna ashi esa nɛ e bee keni kumo so kutɔ, k daga fanɛ e ka kumo be kukɔ n tal to. 13Nɛ k ba fanɛ kupuŋ to be kusɔbɔya e mɔ kumo n ji, k daga fanɛ esa nɛ e bee keni kusɔbɔya na so ka ta kusɔbɔya jiŋka na m ba ŋini shɛdaso, saŋɛ na so, e maaŋ ka kumo be kukɔ n tal to. 14Nɛ esa malɛ kule mo barkasa be kusɔbɔya nɛ k ya nya doro ŋko n wu, saŋɛ nɛ kusɔbɔya na wura maŋ wɔtɔ, k daga fanɛ e ka kusɔbɔya na be kukɔ. 15Ama nɛ fanɛ kusɔbɔya na wu saŋɛ nɛ kumowura wɔtɔ bre, k maŋ daga esa na ka ka kukɔ kikɛ. Nɛ e haya kusɔbɔya na nna bre, kumo ere haya na be kukɔ nɛ e beeŋ ka.

Kachɛ kama be kebaawɔtɔ be mbra be asheŋ

16Esa kama nɛ e fule kasuŋgurbia nɛ e maŋ nyi enyɛn nɛ b maa chɔlta ŋ kil mo tumba, k daga fanɛ enyɛn na e ka keshaji be kukɔ n sa kasuŋgurbia na nseŋ ta mo ŋ ki mbe eche. 17Hale nɛ eche na mo tuto kini kasha na gba, k daga fanɛ enyɛn na e ka kasuŋgurbia na be tumba be kukɔ. 18Eche kikɛ nɛ e kɔ kegba be ŋkilgisheŋ, b mɔ mo. 19Enyɛn kama nɛ e tu kusɔbɔya n di keche nɛ kenyɛn, k daga fanɛ b mɔ mo. 20Esa kama nɛ e lara sarga n sa kegbir kama m baŋ ma, Enyɛnpe Ebɔrɛ so, b mɔ mo. 21Ade kikɛ be kaman, k maŋ daga fanɛ men be ekama e wora efɔ kulubi ŋko m mɛaŋ mo, ŋkpal manɛ so, menyi alɛ gba daa la befɔ nna ashi Ijipt be kasawule so. 22Men saa maa mɛaŋ bekulpoche ŋko amunibi, 23nɛ mannɛ aloŋ nɛ b shu n tre ma, Enyɛnpetale na, ma nɛ n nu bumo kushu na kashenteŋto 24nɛ ma agbo e koso nɛ n shin nɛ b ta tokobi m mɔ menyi nɛ menyi alɛ gba be beche e ki bekulpoche nɛ men be mbia e ki amunibi. 25Ma basa to be etirpo baŋ paŋ ekama amansherbi, e sa maŋ wɔtɔ mo nchu. 26Ekama nɛ e sɔ mo barkasa be wajɛ buuso n nase tarma, k daga fanɛ e bɛta kumo n sa mo pɔɛŋ nɛ epeŋi e tɔr, 27ŋkpal manɛ so, kumo nawule e la mbe kusɔbuuso nɛ e bee buu a dese. Nɛ fo maŋ bɛta kumo n sa mo, manɛ nɛ e beeŋ buu n dese? Mannɛ aloŋ, nɛ kumodoŋwura baŋ shu n tre ma, meeŋ nu mbe kushu, ŋkpal ŋ ka la ewɔrwupo so. 28Ekama e sa maŋ kaŋ malga ŋ gbiti Ebɔrɛ ŋko n shoduu menyi to be ejuŋkparpo. 29Men sa maŋ kaŋ kini kesa ma men be adɔjibi nɛ asɔrso be asɔnuuso. Men ta men be ewurkoŋ nyɛnso 30nɛ men be ana nɛ mbolpɔ gba peya m bɔɔ ma enɔ. Asɔbɔya na bre daga fanɛ b baa wɔ bumo nioana kutɔ nchɛnshunu nna, kachɛ burwasopo na nɛ b ta amo m bɔɔ ma enɔ. 31Men la ma basa cheembi nna, amoso men sa maa ji eblaŋ nɛ kupuŋ to be asɔbɔya jiŋka. Men baa ta amo a lɛ njɔnɔ.

Currently Selected:

Ɛksodɔs 22: GJNb

Highlight

Copy

Compare