Ɛksodɔs 21

Anya be mbra be asheŋ

(Ditɛronɔmi 15:12-18)

1Ndoŋ nna nɛ Ebɔrɛ naŋ kaŋɛ Mosis le: “Naŋ ta le be mbraana ere n sa Israɛlebi na. 2Fo baŋ tɔ kenya nɛ e la Israɛl be esa, nfɛnshe e daga e ka shuŋ fo, ama kafɛ shunusopo bre to, k daga fanɛ fo shin nɛ e nya mbe kumu nsaa maŋ ka shɛŋ. 3Nɛ k la fanɛ kenya na nawule e ba mo nyɛnpe na be enɔ to, k daga fanɛ mo nawule e baa yɔ. Ama nɛ mo nɛ mbe eche e ba bre, kumo ere k daga fanɛ mo nɛ mbe eche na kikɛ e baa yɔ. 4Nɛ fanɛ mo nyɛnpe e sa mo eche nɛ mo nɛ eche na kurge mbinyɛnso ŋko mbicheso, kumo ere k daga fanɛ eche na nɛ mbe mbia kikɛ ka ki mo nyɛnpe na peya nɛ mo nawule e nya mbe kumu a yɔ. 5Ama nɛ fanɛ kenya na bugi to ŋ kaŋɛ le: ‘Mee sha n nyɛnpe nɛ ma eche nɛ ma mbia ga, amoso m maaŋ sɔ ma kumu’, 6kumo ere a daga fanɛ mo nyɛnpe na ka keta mo n yɔ kakpa nɛ baa shuŋ Ebɔrɛ na n ya shin nɛ e yili m mata kukuloŋ ŋko kabuna to nɛ e futi mbe kusoe, a ŋini fanɛ e beeŋ baa la mo nyɛnpe be kenya hale nɛ e ya wu. 7Nɛ enyɛn kama baŋ fa mo pibiche fanɛ kenya, mo ere maaŋ tiŋ n nya mbe kumu fanɛ anya nyɛnso na. 8Ama nɛ b fa mo n sa enyɛn nɛ e ta mo ŋ ki mbe eche nseŋ naŋ kini mo, kumo ere e naŋ bɛta n fa mo n sa mbe basa, ŋkpal manɛ so esa nɛ e kini mo na maŋ kɔ ekpa nɛ e fa mo n sa esa pɔtɛ kama ŋkpal kananɛ e ŋaba mo na so so. 9Nɛ esa tɔ kenyache n sa mo pibinyɛn fanɛ e ta a kil, a daga fanɛ e keni mo so fanɛ mo gbagba pibiche. 10Enyɛn kama malɛ nɛ e ta eche n ti mbe kenyache so, k daga nna fanɛ e baa kraa sa mbe eche juŋkparso na ajibi nɛ asɔbuuso nɛ keche nɛ kenyɛn be kedi be kasha nɛ k daga mo ashi mbe kakil to. 11Nɛ enyɛn na baa maŋ wora le be asɔ asa ere m bɔlɔ so, kumo ere eche na kɔ ekpa nɛ e lar mbe enɔ to nsaa maŋ ka shɛŋ.

Eleŋ be keŋini be mbra be asheŋ

12Esa kama nɛ e ŋmɛa mo barkasa m mɔ, k daga fanɛ b mɔ amodoŋwura gba. 13Ama nɛ k ba fanɛ e maŋ kute nna n wora loŋ, kumo ere Ebɔrɛ be kushuŋ nna, amoso e beeŋ tiŋ n shile n yɔ kakpa nɛ meeŋ ŋini menyi na n ya nya mbe kumu. 14Ama nɛ esa baŋ kute m mɔ mo barkasa bre, hale nɛ e shile n yɔ ma bɔrɛsure na ase gba, k daga fanɛ b mɔ mo. 15Esa kama malɛ nɛ e ŋmɛa mo tuto ŋko mo nio, k daga fanɛ b mɔ mo. 16Esa kama nɛ e yuri dimɛdi n fa ŋko n ta mo a kɔ fanɛ kenya, amodoŋwura gba daga luwu. 17Esa kama malɛ nɛ e sho mo tuto ŋko mo nio kɔnɔ daga luwu. 18Basa anyɔ malɛ baa bile nɛ eko ŋmɛa mo barkasa kejembu ŋko m bɔ kuluŋguntuŋ ŋ ŋmɛa mo nɛ e maŋ wu, nseŋ nu ebesa a dese ebu to ŋkpal keŋmɛa na so, 19kachɛ nɛ e baŋ niŋi to n ta kekpabi n lar kowu, k daga fanɛ esa nɛ e ŋmɛa mo na ka ka nchɛ nɛ esa na dese na kikɛ be kukɔ. Kumo be kaman k daga e ka keni elɔpo na so nɛ e nya alenfia. 20Esa kama baŋ ŋmɛa mbe kenyache ŋko kenyanyɛn kekpabi nɛ kenya na wu epul na to, k daga fanɛ b gberge mo nyɛnpe na kusoe. 21Ama nɛ kenya na ji kachɛ koŋwule ŋko nchɛnnyɔ pɔɛŋ nseŋ wu bre, kumo ere mo nyɛnpe maŋ daga kasogberge, ŋkpal manɛ so, e paŋ mbe kapetɛ nna na. 22Nɛ basa anyɔ malɛ bee bile nseŋ nu edampoche ko ebesa nɛ mbe kedampo na gbeŋi, nɛ shɛŋ maŋ naŋ wora mo, k daga esa nɛ e nu mo ebesa na ka ka amansherbi kanaŋkamaso nɛ edampoche na mo kul beeŋ ku n sa mo. Kumo alɛ daga fanɛ k bɛ kananɛ ndoŋ be demujipoana bee yili asheŋ so. 23Ama kedampo na be kegbeŋi be kaman nɛ k ba fanɛ eche na nu ebesa ga, kumo ere k daga b ka ta ŋkpa nna n tal ŋkpa to. 24Nɛ k ba fanɛ kenishi e bure, b bure kenishi n tal to, nɛ fanɛ kinyi e gbaŋ, b gbaŋ kinyi n tal to, nɛ k la enɔ, b ta enɔ n tal to, nɛ k la keya, b ta keya n tal to, 25nɛ k la kechɔɔ nna, b chɔɔ n tal to, nɛ k la doro nna, b doro n tal to, nɛ k la kemargaso nna, b marga so n tal to. 26Nɛ esa baŋ ŋmɛa mbe kenyache ŋko mbe kenyanyɛn be kenishi m bure, k daga fanɛ e shin nɛ kenya na e baa yɔ nsaa maŋ ka shɛŋ ŋkpal kenishi na so. 27Nɛ k la fanɛ e ŋmɛa mbe kenyache ŋko mbe kenyanyɛn be kinyi nna nɛ k tia, k daga fanɛ e shin nɛ kenya na e baa yɔ nsaa maŋ ka shɛŋ ŋkpal kinyi na so.

Kusɔ nɛ k daga asɔwuraana ka wora be asheŋ

28Esa kama nɛ mbe gbolu pur enyɛn ŋko eche, nɛ e wu, b kpa gbolu na ajembu m mɔ, ama b sa maŋ kaŋ we gbolu na be eblaŋ. Kumo be kaman k maŋ daga fanɛ b naŋ gberge gboluwura na kusoe. 29Ama nɛ k la fanɛ gbolu na chɛr a tɔrɔ basa nna nɛ b kpele mo nawura kusoe nɛ e yige nɛ k ya chute esa m mɔ, kumo ere k daga fanɛ b kpa gbolu na ajembu m mɔ nseŋ mɔ mo nawura na gba. 30Ama nɛ gboluwura na shuli fanɛ e beeŋ ka kukɔ n sɔ mbe ŋkpa n yige, kumo ere k daga e ka kanaŋkamaso nɛ baaŋ ku kukɔ na n sa mo. 31Nɛ fanɛ gbolu na pur esa ko pibinyɛn ŋko ebiche nna, loŋ koŋwule na e daga fanɛ b yili kumo. 32Nɛ gbolu pur esa ko be kenyache ŋko kenyanyɛn m mɔ, k daga fanɛ gboluwura e ka gbiti be ndarbi adesa n sa kenya na wura, kumo be kaman nɛ b kpa gbolu na ajembu m mɔ. 33Nɛ esa baaŋ bugi kemaŋ so ŋkoŋ kur kumo mo gbagba nsaa maŋ buu kumo so nɛ esa ko be kena ŋko kurma tɔr kumo to, 34k daga fanɛ kemaŋ na wura ka ka kusɔbɔya na be kukɔ nseŋ ta kusɔbɔya wuso na. 35Nɛ fanɛ esa ko be gbolu mɔ mo barkasa be gbolu malɛ nna, k daga fanɛ b fa gbolu keniso na nseŋ barga kumo be amansherbi to n sa abar. 36Ama nɛ fanɛ gbolu na chɛr a pur nna nɛ mo nawura nyi nsaa maŋ chɛ kumo m muni, kumo ere k daga fanɛ e ta gbolu keniso n tal mo barkasa na to nseŋ ta gbolu wuso na.”

Currently Selected:

Ɛksodɔs 21: GJNb

Highlight

Copy

Compare