Kaŋinichiŋgeliŋ 7

Kanyiasheŋ be asheŋ

1Ketre lela bɔ tulale dufɛso; nɛ kaluwuachɛ malɛ bɔ kakurgeachɛ.

2Fo ka yɔ keelibuna bɔ fo ka yɔ kejigboŋ to; ŋkpal manɛ so, k yɔ keeli to bee nyiŋi anyi nna fanɛ ekama beeŋ wu kachako.

3Kagbenejija bɔ emushe, k bee jija anishiakpa ama kumo alɛ be loŋ bee shin nɛ esa bee fɛ nfɛra.

4Esa kama nɛ e bee chena a fɛ kagbenefuli nawule be asheŋ la ewulpo nna. Ama enyiashempo bre bee kaa chena nna a fɛ luwu be asheŋ.

5Eyiashempo baa kpele fo kusoe, k bɔ ewulpo ka bee boŋ nshɛ a kpaŋ fo.

6Ewulpo be emushe du nna fanɛ ewi ka wɔ edɛ to a chɔɔ. K maŋ kɔ kifito kikɛ.

7Fo baa kɔ kanyiasheŋ nsaa puni basa, kumo ere fee wora nna fanɛ ewulpo na. Fo baa sɔ brɔbu malɛ, fo da nɛ fee jija na.

8Kusɔ kama be lalaloge bɔ kumo be sososo.

Kanyiti ka bɔ kamoowu be asheŋ

9Bewulpo e naa nya agbo manaŋ manaŋ nsaa ta asheŋ a wɔtɔ kagbene to.

10K maŋ daga fanɛ fo baa kaŋɛ le: “Manɛ nna nɛ dra na bɔ kabre?” K maŋ la kanyiasheŋ be kamalga.

11Kanyiasheŋ du nna fanɛ kapetɛ, nsaa kɔ tɔnɔ n sa bekama nɛ b kɔ kumo. 12Kanyiasheŋ du fanɛ kusɔ kuŋso nna fanɛ kananɛ amansherbi gba du fanɛ kusɔ kuŋso na. Kanyiasheŋ be tɔnɔ kikɛ e la kananɛ k bee kuŋ esa nɛ e kɔ kumo na.

13Fɛ kusɔ nɛ Ebɔrɛ wora ere be asheŋ. Nɛ Ebɔrɛ baa maŋ niŋi kusɔ, wanɛ bre e naŋ tiŋ n niŋi kumo? 14Nɛ asheŋ baa nite nɛnɛ, shin nɛ fo kagbene e baa fuli fo, nɛ asheŋ maŋ naa nite nɛnɛ malɛ, ba nyi fanɛ Ebɔrɛ e naa sa ekpa nɛ asheŋ lela nɛ asheŋ lubi bee tu esa. Amoso ekama maŋ nyi kusɔ nɛ k beeŋ wora echefoso.

15Kebaawɔtɔ jiga nɛ n wɔtɔ ere to, nɛ n wu fanɛ basa lela ko bee wu bumo be alelasheŋ to nna nɛ basa lubi malɛ kɔ ŋkpa nsaa wɔ bumo be asheŋ lubi to. 16Amoso sa maŋ shin nɛ kanyiasheŋ nɛ kenishibugi nɛ fo kɔ na e mur fo. 17Sa maa kɔ kumu kpakpaso ŋko e la ewulpo saŋɛ na so fo maaŋ wu nɛ fo kachɛ maŋ naŋ fo. 18Baa nite teteri a yɔ. Fo baa kɔ bunyaŋ a sa Ebɔrɛ asheŋ beeŋ nyalɛ n sa fo.

19Kusɔ nɛ esa nɛ e kɔ kanyiasheŋ beeŋ tiŋ n wora, bejuŋkparpo kudu maaŋ tiŋ n wora kumo n sa bumo be kade.

20Esa kama maŋ wɔ durnya ere to nɛ e niŋi n ya loge nsaa maa wora a foe.

21Sa maa kaŋ kusoe a nu kusɔ kama nɛ basa bee malga, nɛ manɛ aloŋ, feeŋ nu fo kayɛrbi ka bee tege fo, 22ŋkpal manɛ so fo alɛ gba bee kaa tege beko.

23Ŋ gbagba be kanyiasheŋ nɛ n ta m pin ade kikɛ ama amo alɛ kra chɔ ma so. 24Nuso nɛ esa beeŋ tiŋ m pin kebaawɔtɔ ere be asheŋ to? Kumo be kepinto du kpakpa ga nsaa du chiŋgeliŋ. 25Amoso n daŋ yili kumo nna fanɛ meeŋ ta ma kanyiasheŋ n fin asheŋ kpakpaso ere kikɛ be edesekpa, saŋɛ na so meeŋ koya kananɛ kulubi nɛ kawulisheŋ du.

26Ade kikɛ be kaman nɛ n naŋ wu fanɛ eche dalubiwura, lubi a chɔ luwu. E du nna fanɛ b ka so kejigbelɛ na. Mbe kasha nɛ e beeŋ sha fo na bee pɛ nna fanɛ kashewu; Nɛ mbe enɔ nɛ e beeŋ ta n deŋi fo so na malɛ du fanɛ ŋgbɛlɛbi. E maaŋ tiŋ n nya esa nɛ e bee wora Ebɔrɛ be aparsheŋ ama alubiworapo bre e bee pɛ mo nna manaŋ. 27Eŋinipo na yɛ: “Mee lege asheŋ ere to nna gbrɛgbrɛ a fin amo be edesekpa.” 28N daŋ naa keni nna a fin atuwebi ko nɛ n sa ama ma alɛ maŋ nya. Meeŋ tiŋ n nya esa lela koŋwule benyɛn kagboŋ to, ama beche bre to maaŋ nya loŋ be esa. 29Asheŋ nɛ ŋ koya kikɛ nna na. Ebɔrɛ to anyi nɛnɛ nna nɛ anyi alɛ jija anyi be amu.

Currently Selected:

Kaŋinichiŋgeliŋ 7: GJNb

Highlight

Compare

Copy