Kaŋinichiŋgeliŋ 6

1N dara m pin fanɛ keji asheŋ nɛ amo be ekpa so maŋ wɔ durnya ere to kikɛ kuraa. 2Ebɔrɛ beeŋ tiŋ n sa esa ko kedamaya nɛ kemaŋkura nɛ asɔ nseŋ naŋ sa mo kusɔ kama gba nɛ e bee sha n ti so, ama mo alɛ maaŋ ji amo be ebel. Efɔ ko e naŋ ba ji amo be ebel. Kumo alɛ be loŋ la asheŋ fuloŋ nna a maŋ walɛ. 3Esa beeŋ tiŋ a kɔ mbia kalfa nseŋ chɛr kasawule ere so ga, ama k maŋ tir nfɛ afanɛ nɛ e ji durnya ere to, e baa maŋ nya kagbenefuli ŋko kupuli lela mbe kaluwuachɛ kumo ere kebia nɛ b kurge nɛ e laŋɛ gba bɔ mo. 4Kebia nɛ b kurge nɛ e laŋɛ maŋ kɔ tɔnɔ kikɛ; e bee shir tentembiri to nna, nɛ b teŋ mo so epul to. 5E maŋ wu epeŋi be kefulto ŋko a nyi kusɔ nɛ baa tre ŋkpa gba, ama mo alɛ nya ewushi 6a chɔ esa nɛ e ji nfɛ ŋgboŋ anyɔ nsaa maŋ ji durnya ere to be ebel. Kashenteŋ nna fanɛ bumo kikɛ bee yɔ kakpa koŋwule bre nna.

7Kegben nɛ anyee gben ere kikɛ, kusɔ nɛ anyeeŋ ji so nɛ anyee wora. Amo nɛ amo kikɛ anyi alɛ kra maa ji a moɛ. 8Hale fo kɔ kanyiasheŋ gba, fo maŋ bɔ ewulpo. Nɛ an la betirpo gba, kumo be loŋ maa ŋini nna fanɛ anyi maaŋ tiŋ n wora kusɔ nɛ k daga. 9Shin nɛ kusɔ nɛ fo kɔ e baa bɔlɔ fo kenishi a chɔ fo ka beeŋ baa kɔ a fin kananɛ feeŋ ba nya ga saŋkama. K la asheŋ fuloŋ nna nɛ kumo alɛ be loŋ du fanɛ fo ka bee ju a bɛ afu so na.

10Kusɔ kama nɛ k bee wora kabre ere daŋ chɛr wora dra dra kikɛ nna. Anyi edimɛdi nyi kusɔ nɛ k la anyi. Anyi alɛ maaŋ tiŋ n ji Ebɔrɛ emɔrɔ ŋkpal manɛ so e kɔ eleŋ a chɔ anyi ga. 11Esa baa malga ga, mbe mmalga maŋ naa kɔ kifito, amo alɛ maŋ kɔ kechɛto n sa esa kikɛ. 12Nuso nɛ esa beeŋ tiŋ n wora m pin kusɔ nɛ k walɛ n sa anyi ashi ŋkpa shiimbi nɛ anyee ji durnya ere to, nɛ k bee choŋ fanɛ afu ere? Wanɛ e naŋ tiŋ ŋ kaŋɛ kusɔ nɛ k beeŋ wora mo echefoso saŋɛ so nɛ e lar durnya ere to? An kaŋ wu, nuso nɛ anyeeŋ wora m pin kusɔ nɛ k beeŋ wora anyi durnya mo nɛ anyeeŋ naŋ yɔ na to?

Currently Selected:

Kaŋinichiŋgeliŋ 6: GJNb

Highlight

Compare

Copy