Kaŋinichiŋgeliŋ 5

Sa maa wule a nase kɔnɔ Ebɔrɛ be anishito

1Baa da asheŋ nɛ fee wora ashi Ebɔrɛ be lambu to so. Fee yɔ ndoŋ nna nɛ fo ya nu kusɔ nɛ beŋinipo bee ŋini, mannɛ keya lara kawuliso be sarga fanɛ bewulpo nɛ b maŋ nyi alubi nɛ alela be mbarga na. 2Baa fɛ nfɛra pɔɛŋ nsaa malga, sa maa nya manaŋ a nase nnɔ Ebɔrɛ be anishito. Ebɔrɛ wɔ ebɔrɛso nna nɛ fo alɛ wɔ kasawule ere so, amoso sa maa malga ga. 3Kananɛ kafɔŋ damta beeŋ tiŋ n shin nɛ esa e dese ŋ ku edare lubi na, loŋ koŋwule na nɛ esa nɛ e bee malga ga beeŋ tiŋ m malga kawulisheŋ be mmalga. 4Amoso nɛ fo baŋ nase kɔnɔ Ebɔrɛ be anishito, a daga fanɛ fo tia kumo manaŋ. Ŋkpal manɛ so, Ebɔrɛ be shɛŋ maa ji bewulpo to. Amoso baa wora a bɔlɔ fo nnɔ naseso so. 5Fo ka maŋ nase kɔnɔ kraa bɔ fo ka nase kɔnɔ e maŋ tiŋ n tia kumo. 6Sa maŋ shin nɛ fo kɔnɔ to be mmalga e shin nɛ fo wora kulubi, saŋɛ na so fo maaŋ yɔ Ebɔrɛ be bɔrɛmatapo kutɔ n ya kaŋɛ mo fanɛ fo daa pɛl nna. Manɛ nna nɛ fee wɔtɔ Ebɔrɛ agbo to? Manɛ nna nɛ fo shin nɛ Ebɔrɛ jija kusɔ nɛ fo gben n nya na ŋkpal fo kamalga so? 7Edare damta be kebaakuu nɛ mmalga damta be kebaa malga maŋ kɔ kifito. Amoso baa ŋana Ebɔrɛ nsaa sa mo bunyaŋ.

8Fo baŋ wu abane be ekrachi ka bee tɔrɔ mbe efuli so be betirpo nsaa ji bumo durmu, sa maŋ shin nɛ k baa chinchiŋ fo, ŋkpal manɛ so ekrachi wurbi na bee wora a bɛ bumo be benimu be nnɔ so nna.

9Ŋkpal ewura ka la enimu ekama so so, mo e naa nya kasawule na so be elampo nɛ baa sɔ na kikɛ be galeŋga.

10Esa kama nɛ e bee sha amansherbi nɛ kedamaya ga, maa nya amansherbi a moɛ kikɛ. Asheŋ fuloŋ e la amo kikɛ. 11Saŋɛ so nɛ fo dii dama na, loŋ be jemanɛ na so nɛ basa damta malɛ bee fin kechɛto fo kutɔ. Asheŋ nɛ damawura bee chena a fɛ saŋkama e la mbe kedamaya be asheŋ. 12Etirpo bre ji nɛ e maŋ ji gba, e bee dese kanyɛso a di nɛnɛ nna. Ama amansherbi wura bre, maa di a mata, ŋkpal mbe kedamaya so.

13Kusɔ lubi ko malɛ nɛ n naŋ wu k ka bee wora durnya ere to. Basa pere kenishi nna a fin amansherbi a deŋi abar so, nɛ kumo be loŋ bee bar bumo asheŋ. 14Ŋkpal manɛ so amansherbi na kikɛ beeŋ loge ŋkpal b ka maŋ ta amo n shuŋ kushuŋ lela so. Bumo be mbia malɛ maaŋ nya kapetɛ kikɛ. 15An ka ba durnya ere to anyi maŋ bar shɛŋ, anyi alɛ naa lar kumo to anyi maaŋ ta shɛŋ n yɔ. 16K daŋ maŋ daga fanɛ loŋ e wora kuraa! Kananɛ an ba loŋ nɛ anyeeŋ naŋ yɔ. Anyee shuŋ ga nna fanɛ an ka beeŋ tiŋ n ju afu m pɛ na, ama amo nɛ amo kikɛ manɛ b tɔnɔ nɛ anyee nya? 17Naniere bre tentembiri nɛ kebɔltofinfin nɛ kagbenejija nɛ agbo nɛ kulɔ be kebaawɔtɔ to nɛ an wɔ.

18Kusɔ nɛ n wu e la fanɛ, kusɔ lela mo nɛ dimɛdi daga kewora an be ŋkpa shiimbi nɛ Ebɔrɛ ta n sa anyi durnya ere to e la fanɛ an baa ta kusɔ kama nɛ an gben n nya a ji eyur. Kusɔ nɛ k baŋ daga dimɛdi kikɛ nna na. 19Nɛ Ebɔrɛ baŋ shin nɛ fo dii dama nseŋ nya asɔ nseŋ naŋ sa fo ekpa fanɛ fo ji amo be ebel, kumo ere a daga fanɛ fo baa ji a chɔrɔ mo ŋkpal tɔnɔ nɛ fo shuŋ n nya so. K la Ebɔrɛ be kakɛ nna. 20Ŋkpal Ebɔrɛ ka sa fo kagbenefuliso, fo maŋ naa fɔŋ ŋkpa shiimbi nɛ anyee ji durnya ere to be asheŋ so.

Currently Selected:

Kaŋinichiŋgeliŋ 5: GJNb

Highlight

Compare

Copy