Ashuŋ Shunso 7

Stiven be kamalga be asheŋ

1Nɛ bɔrɛmatapo nimuso na bishi Stiven: “Kashenteŋ nɛ baa ji ere a?” 2Nɛ Stiven kaŋɛ: “N daana nɛ n tutoana, men nu nfe. Ebɔrɛ nɛ e daga kemaŋkura na e daŋ ba an nananyɛn Eebraham kutɔ, saŋɛ nɛ e daa wɔ Mɛsopoteemia pɔɛŋ m ba kaa n yɔ Haran be kade to na 3m ba kaŋɛ mo: ‘Lar fo basa kutɔ nɛ fo efuli ere so n yɔ efuli nɛ meeŋ ŋini fo ere so.’ 4Ndoŋ nna nɛ e lar Kaldiya be efuli na so n ya kaa wɔ Haran. Eebraham mo tuto ka ba wu nɛ Ebɔrɛ shin nɛ e kaa m ba efuli nɛ men wɔ ere so. 5Ebɔrɛ daa maŋ sa Eebraham kasawule na be gbrɛ nyitiibi kikɛ gba fanɛ k baa la mo peya. Ama Ebɔrɛ daŋ nase kɔnɔ n sa Eebraham fanɛ e beeŋ ta kasawule na n sa mo nɛ mbe kaman to ebi kikɛ. Saŋɛ na so nɛ Eebraham daa maa kɔ mbia. 6Le nɛ Ebɔrɛ daŋ kaŋɛ mo: ‘Fo kaman to ebi beeŋ ba kaa wɔ efuli pɔtɛ ko so, kakpa nɛ baaŋ baa la anya nɛ b tɔrɔ bumo ga nfɛ alfa ana. 7Ama meeŋ gberge basa nɛ fo kaman to ebi beeŋ shuŋ na kusoe pɔɛŋ n shin nɛ fo basa na e lar efuli na so m ba nfe m ba kaa bunyaŋ ma.’ 8Kumo be kaman nɛ Ebɔrɛ shin nɛ mo nɛ Eebraham nase kɔnɔ nɛ e kaŋɛ Eebraham fanɛ mbe kaman to ebi e baa ku atutu a ŋini fanɛ b sɔ kɔnɔ naseso na. Amoso, b ka kurge Aizek mbe kachɛ burwasopo nɛ Eebraham ku mo kututu nɛ Aizek malɛ ba ku Jeekɔb peya nɛ Jeekɔb malɛ ku mbe mbia, basa kuduanyɔ nɛ b juŋkpar Israɛlebi be kanaŋ kuduanyɔ na be atutu.

9Bejuŋkparpo ere daŋ kurge bumo sipo Josɛf yurkishi nna n ta mo n fa n shin nɛ e ki kenya ashi Ijipt be efuli so. Ama Ebɔrɛ daa maŋ yige mo n to. 10E daŋ lara mo ashi mbe etɔrɔ kikɛ to nseŋ sa mo kanyiasheŋ nɛ kebaawɔtɔ nɛ a par Ijipt be ewura Fɛɛro ga nɛ Fɛɛro shin nɛ Josɛf ki efuli na so be gomena nɛ mbe kowu to ebi kikɛ so be enimu. 11Ndoŋ nna nɛ akoŋgboŋ ko tɔr Ijipt nɛ Keenan be efuliana kikɛ so m bar awurfoŋ damta ga nɛ an nanaana fin ajibi kanaŋkama ŋ gben. 12Nɛ Jeekɔb ba nu fanɛ ajibi wɔ Ijipt be efuli so nseŋ shuŋi mbe mbia, an nananyɛnana ndoŋ. Kede to e daa la bumo be sososo be keyɔ ndoŋ. 13B ka naŋ bɛta n yɔ kela nyɔsopo to nɛ Josɛf shin nɛ mo daana na pin mo, kumo be kaman nɛ Fɛɛro ba pin Josɛf be basa. 14Nɛ Josɛf kela fanɛ b ya kaŋɛ mo tuto Jeekɔb nɛ mbe basa kikɛ fanɛ b bela m ba Ijipt be efuli so, basa na kikɛ daa wɔ basa adushunu nɛ anu. 15Ndoŋ nna nɛ Jeekɔb kaa n yɔ Ijipt be efuli so, ndoŋ nɛ mo nɛ an nanaana kikɛ ya wu n wu n loge 16nɛ b ta bumo n yɔ Shɛkɛm n ya puli kebeelaŋ ko nɛ Eebraham daŋ tɔ ashi Hamɔ be kanaŋ to ebi kutɔ na to.

17Ama kɔnɔ nɛ Ebɔrɛ daŋ nase n sa Eebraham na be jemanɛ ka ba taga to, k bɔla ekpa nɛ anyi be basa nɛ b daa wɔ Ijipt na malɛ wora keshi n ti so. 18Jemanɛ na nɛ ewura popɔr ko nɛ e daa maŋ nyi Josɛf, ji Ijipt be efuli na so be kuwura. 19Mo e daŋ fule anyi be basa nseŋ tɔrɔ an nanaana ga n tintiŋ bumo n shin nɛ b ta bumo be mbi popɔrbi n ya nase nde na be ntamaŋ to nɛ b wu. 20Amo be jemanɛ nɛ b kurge kayɛrbi Mosis ŋ keni mo so epe afɔl asa pɔɛŋ 21nseŋ ta mo n ya nase kaboŋ ko nɛ e wu nɛ Fɛɛro pibiche ya ta mo n ya ki mo peya ŋ keni mo so nɛ e daŋ. 22Ndoŋ nɛ b ŋini mo Ijipt be kanyiasheŋ kikɛ nɛ e ba ki esagboŋ ashi mbe kamalga nɛ mbe asheŋ woraso kikɛ to.

23Mosis ka ba fo nfɛ adena nɛ k ba mo to fanɛ e ya chɔrɔ mo peebi Israɛlebi. 24E ka yɔ nɛ e ya wu Ijipt be esa ko ka bee tɔrɔ Israɛl be esa ko nɛ e ya chɛ Israɛl be esa na to n sɔ mbe kɔnɔ m mɔ Ijipt be esa na. 25E daa nyi fanɛ mo peebi na daa beeŋ pin fanɛ mo nɛ Ebɔrɛ daa sha keshin nɛ e sɔ bumo n yige, ama b daa maŋ pin kumo be loŋ. 26Kumo be ŋklade nɛ e wu Israɛlebi be benyɔ ka bee bile nɛ e yɔ nɛ e ya wora ania m barga bumo to ŋ kaŋɛ: ‘Men nu nfe, men la basa koŋwule nna nɛ manɛ e ba nɛ menyee wora a da abar so le?’ 27Nɛ emo nɛ e daŋ wora n jija na ŋin Mosis n yili ekarso nseŋ bishi mo: ‘Wanɛ e ta fo ŋ ki anyi be enimu nɛ anyi be demujipo? 28Fo yɛ fo mɔ ma alɛ gba nna fanɛ kananɛ ndre fo mɔ Ijipt be kanyɛn na nna a?’ 29Mosis ka nu loŋ nɛ e shile Ijipt be efuli na so n ya kaa wɔ Midian be efuli so. Ndoŋ nɛ e kurge mbinyɛnbi anyɔ.

30Mosis ka wɔ Midian be efuli na so kumo be nfɛ adena be kaman nɛ malaika lar mo so kiyi to ashi kupumbi chɔɔso ko to. Ndoŋ daŋ mata Sainai be kebee na so nna. 31Kusɔ nɛ Mosis daŋ wu na daŋ chinchiŋ mo ga nɛ e firgi n taga to nɛ e keni nseŋ nu Enyɛnpe be ebɔl ka bee kaŋɛ: 32‘Ma e la fo nanaana be Ebɔrɛ na, Eebraham nɛ Aizek nɛ Jeekɔb be Ebɔrɛ.’ Nɛ kufu pɛ Mosis ga nɛ e chicha a maŋ naŋ tiŋ nɛ e keni kakpa na. 33Nɛ Enyɛnpe kaŋɛ mo: ‘Lara fo asɛbta na, ŋkpal manɛ so, kakpa nɛ fo yil ere la kasawule cheeŋ nna. 34N wu kekɔrfɛ nɛ tɔrɔ damta nɛ ma basa wɔ Ijipt be efuli so a nya. N nu bumo be kushu m ba nɛ m ba mɔlga bumo. Nu nfe, meeŋ shuŋi fo Ijipt.’

35Mosis koŋwule ere nɛ Israɛlebi daŋ kini nseŋ bishi mo: ‘Wanɛ e ta fo ŋ ki anyi be enimu nɛ anyi be demujipo?’ Mo nɛ Ebɔrɛ daŋ bɔla malaika nɛ e daŋ wu kupumbi chɔɔso na to na so n shuŋi fanɛ Israɛl be enimu nɛ emɔlgapo na. 36Mo e daŋ juŋkpar bumo n wora emamachisheŋ nɛ kashenteŋ be etɔɔnɛsheŋ damta ashi Ijipt nɛ Teku Peper na to nɛ jemanɛ nɛ b daa wɔ kiyi to nfɛ adena na kikɛ. 37Mo, Mosis koŋwule na e daŋ kaŋɛ Israɛlebi: ‘Ebɔrɛ beeŋ sa menyi anebi fanɛ kananɛ e shuŋi ma na, e beeŋ ba kaa la menyi to be eko nna.’ 38Mosis koŋwule na nɛ Israɛlebi nɛ b daŋ shɛr kiyi to na e daa la ndoŋ. Mo nɛ an nanaana nɛ malaika nɛ e daŋ malga mo kutɔ ashi Sainai be kebee na so e daa la. Mo nɛ Ebɔrɛ daŋ ta mbe kubɔya nɛ k maŋ kɔ ekar na n sa nɛ e ba sa anyi. 39Ama an nanaana daŋ kini kenu n sa Mosis nseŋ kplaŋ mo so nseŋ naa yɛlga kenaŋ bɛta n yɔ Ijipt be efuli so. 40Ŋkpal loŋ so ŋ kaŋɛ Ɛɛrɔn: ‘Lɔŋɛ agbir ko n sa anyi nɛ a baa juŋkpar anyi, ŋkpal manɛ so, anyi maŋ naa nyi kusɔ nɛ k wora Mosis nɛ e bar anyi ashi Ijipt na.’ 41Ndoŋ nna nɛ b pɔr kegbir ko fanɛ kenabi nseŋ mɔ asɔ n wora kejigboŋ n lɔŋɛ kumo a bunyaŋ kusɔ nɛ bumo gbagba pɔr na. 42Nɛ Ebɔrɛ pal kaman n sa bumo n shin nɛ baa bunyaŋ achɛkpabi fanɛ kananɛ anebiana na daŋ sibɛ ŋ kaŋɛ fanɛ Ebɔrɛ kaŋɛ:

‘Israɛlebi, mannɛ ma

nɛ men daŋ mɔ asɔbɔya kiyi na to

nfɛ adena n sa na.

43Kegbir Molɛk be wajɛbu nɛ men daŋ keta

n ti menyi be kegbir pɔrso Rɛfam

nɛ k duli kechɛkpabi na so.

Amo agbir anyɔ na

nɛ men daŋ lɔŋɛ a bunyaŋ.

Amoso, meeŋ shin nɛ b lara menyi

ashi menyi be efuli ere so

n yɔ kufɔ kufɔ, Babilɔn be kaman.’

44Ebɔrɛ be wajɛbu nɛ k daa ŋini fanɛ Ebɔrɛ wɔ an nanaana kutɔ na nɛ bumo e daa la kiyi to. Kananɛ Ebɔrɛ daŋ ŋini Mosis fanɛ e wora kumo na gbagba chap nɛ e daŋ wora kumo. 45Kumo be kaman, an nanaana nɛ bumo tutoana daŋ ta wajɛbu na n sa na, daŋ keta kumo, saŋɛ nɛ bumo nɛ Joshuwa daa la na nna n yɔ efuliana nɛ Ebɔrɛ daŋ ju amo to be basa n lɛ nɛ an nanaana sɔ bumo be nsawule na kikɛ so. Ndoŋ nɛ wajɛbu na daŋ ba kaa shir a wɔ hale n ya fo Ewura Deevid be jemanɛ. 46Mbe asheŋ daŋ bɔlɔ Ebɔrɛ kenishi ga nɛ e kule Ebɔrɛ fanɛ e shin nɛ e pɔr ebu n sa mo ere, Jeekɔb be Ebɔrɛ na. 47Ama Ewura Sɔlɔmɔn e daŋ ba pɔr kumo. 48Ama Enyɛnpetale Ebɔrɛ pe maŋ la nyiŋgbasa be nwu pɔrso fanɛ kananɛ anebiana kaŋɛ fanɛ Ebɔrɛ kaŋɛ na:

49‘Ebɔrɛso e la ma kuwurjiakpa

nɛ kasawule so la ma aya be kusɔ yiliso so.

Nɛ nuso be ebu nɛ menyeeŋ pɔr n sa ma?

Nnɛ nɛ meeŋ baa wɔ a wushi?

50Mannɛ ŋ gbagba e to loŋ be asɔ na kikɛ a?’

51Men kɔ amu kpakpaso ga. Menyi be ŋgbene du fanɛ nnyamase peya nna, men maŋ kɔ Ebɔrɛ be kubɔya na be asoe. Menyi nɛ men nanaana baa la kukoŋwule nna. Menyi alɛ gba maa nu a sa Kiyoyu Cheeŋ na. 52Anebi mo nɛ men nanaana maŋ tɔrɔ! B mɔ Ebɔrɛ be mbɔ nɛ b daŋ wu ŋ kaŋɛ dra na kikɛ fanɛ Ebɔrɛ be Kenya cheembi beeŋ ba na. Kabre menyi alɛ debɔr mo nseŋ mɔ mo. 53Menyi nɛ emalaika daŋ bar Ebɔrɛ be mbra na, ama men kini kebɛ mbra na so.”

B ka kpa Stiven ajembu m mɔ be asheŋ

54Nshɛrwuraana na ka nu kusɔ nɛ Stiven bee kaŋɛ na nɛ b nya agbo ga n we anyi to agboso. 55Nɛ Kiyoyu Cheeŋ na luri m bɔlɔ Stiven to nɛ e maŋ kumu so ŋ keni ebɔrɛso n wu Ebɔrɛ be kemaŋkura nɛ Yesu yil Ebɔrɛ be jisoso, ebunyampo be kakpa. 56Nɛ e kaŋɛ basa na: “Men keni, n wu ebɔrɛso ka bugi nɛ Nyiŋgbasa Pibinyɛn yil Ebɔrɛ be jisoso.” 57Ndoŋ nna nɛ b ponte eleŋso ga nseŋ ti bumo be asoe nseŋ yarase epul na to kɔnɔkoŋwuleso 58n ya gberge mo n lar kadegboŋ na to ŋ kpa mo ajembu m mɔ. Kabrantiɛbia ko nɛ b daa tre Sɔɔl kutɔ nɛ eshɛdajipoana na daŋ yige bumo be asɔbuuso nɛ e bee keni so. 59B daŋ kraa wɔ kekpa Stiven ajembu to nna nɛ e kule Enyɛnpe le: “Enyɛnpe Yesu, shin nɛ ma kiyoyu e ba fo kutɔ.” 60Ndoŋ nna nɛ e gbir nseŋ kaŋɛ awɔrso: “Enyɛnpe, ta bumo be kulubi ere m paŋ bumo.” Kede be kaman nɛ e wu.

Currently Selected:

Ashuŋ Shunso 7: GJNb

Highlight

Copy

Compare