Ashuŋ Shunso 23

1Nɛ Pɔɔl keni nshɛrwuraana na diimbi nseŋ kaŋɛ: “Ŋ kurgepoana, hale kabre ma kagbene to maa wora ma shikashika Ebɔrɛ be anishito fanɛ m maŋ kɔ kebaawɔtɔ cheembi.” 2Ndoŋ nna nɛ bɔrɛmatapo nimuso Ananiyas shin nɛ basa nɛ b daŋ yili n taga to Pɔɔl na ŋmɛa Pɔɔl be kɔnɔ. 3Nɛ Pɔɔl kaŋɛ mo: “Kebirkɔnshiwura ere! Ebɔrɛ beeŋ ŋmɛa fo kɔnɔ loŋ. Fo yɛ fo chena nfe nna nɛ fo bɔla ekpa nɛ mbra na bee ŋini na so n ji demu, ama ma nɛ fee shin nɛ baa ŋmɛa n naa wora a da mbra na so na.” 4Nɛ basa nɛ b yili n taga to Pɔɔl na kaŋɛ mo: “Ebɔrɛ be bɔrɛmatapo nimuso nɛ fee tege ere a?” 5Nɛ Pɔɔl kaŋɛ: “Ŋ kurgepoana, n daa maŋ nyi fanɛ e la bɔrɛmatapo nimuso nna, ŋkpal manɛ so, abɔrɛsibɛ na bee kaŋɛ fanɛ: ‘Sa maŋ kaŋ malga kamalga lubi ŋ gbiti fo basa be enimu.’ ” 6Pɔɔl ka wu fanɛ basa na be beko la Esadusiana nna nɛ beko malɛ la Efarisiana nɛ e malga awɔrso n sa nshɛrwuraana na ŋ kaŋɛ: “Ŋ kurgepoana, Farisinyɛn e kurge ma nɛ ma alɛ naa la Farisi. Baa ji ma demu nfe ere nna, ŋkpal ŋ ka kɔ tama kpakpaso fanɛ bumo nɛ b wu na ka beeŋ tiŋi luwu to so.” 7E ka malga loŋ epul na to nɛ Efarisiana na nɛ Esadusiana na fara a bile nɛ basa na kikɛ barga to ntuŋ anyɔ so. 8Ŋkpal manɛ so, Esadusiana bee kaŋɛ fanɛ basa maaŋ tiŋi luwu to nseŋ naa kaŋɛ fanɛ emalaika ŋko ayoyu maŋ wɔtɔ, ama Efarisiana daŋ yirda amo asa na kikɛ. 9Ndoŋ nna nɛ bumo be kaponte na naŋ dii ga nɛ mbraŋinipoana nɛ b la Efarisiana na be beko niŋi to n yili m ponte eleŋso ŋ kaŋɛ fanɛ b maŋ shuli ŋ kaŋɛ: “Anyi ere maŋ wu kulubi kikɛ kanyɛn ere so. Ashere kiyoyu ko ŋko malaika e malga mo kutɔ kashenteŋto na.” 10Bumo be kolu na daŋ nyaŋɛ to ga hale basa na be kegberge Pɔɔl n tuge to be asheŋ pɛ benapo be enimu na kufu ga. Nɛ e shin nɛ mbe benapo luri basa na to ŋ keta Pɔɔl n lar bumo to n yɔ kesɔnyige be ebu lempo na to.

11Kumo be kamɔnchɛ be kanyɛso nɛ Enyɛnpe ba yili Pɔɔl kutɔ nseŋ kaŋɛ mo: “Baa kɔ kenyɛn. Kananɛ fo ji ma shɛda ashi Jerusalɛm to ere nɛ fee naŋ yɔ Rom malɛ n ya wora.”

Juwebi ka kre Pɔɔl be kemɔ be nia be asheŋ

12Kumo be ŋklade nɛ Juwebi na shɛr ŋ kre bumo be nia nseŋ sa Ebɔrɛ kɔnɔ fanɛ b baa maŋ mɔ Pɔɔl b maaŋ ji ajibi, bumo alɛ maaŋ nuu shɛŋ. 13Basa nɛ b daŋ yili kusɔ ere le na kikɛ daa chɔ basa adena. 14B ka sa kɔnɔ na n loge nɛ b yɔ bɔrɛmatapowuraana na nɛ benimuana na kutɔ n ya kaŋɛ bumo: “An ba abar so nna m ba sa kɔnɔ kpakpaso fanɛ an baa maŋ mɔ Pɔɔl, an maaŋ ji shɛŋ. 15Amoso, menyi nɛ nshɛrwuraana na e kute n shuŋi kabɔ nɛ e ya kaŋɛ Romebi be benapo be enimu na fanɛ e shin nɛ b bar Pɔɔl menyi kutɔ nɛ e ba malga nɛ men pin mbe demu na to nɛnɛ. Saŋɛ na so nɛ anyee jo mo ekpa to n nya mo m mɔ nɛ e maŋ fo nfe.”

16Ndoŋ nna nɛ Pɔɔl mo sipoche pibi nu bumo be nia na nseŋ ya luri kesɔnyige be ebu lempo na to n ya kaŋɛ Pɔɔl kesheŋ na. 17Nɛ Pɔɔl tre benapo be benimuwurbiana na be eko ŋ kaŋɛ mo: “Keta kabrantiɛbia ere n yɔ benapo be enimu na kutɔ. E bee sha kekaŋɛ mo kusɔ ko nna.” 18Nɛ benapo be enimubi na juŋkpar ŋ keta mo n yɔ benapo be enimu na kutɔ n ya kaŋɛ mo: “Pɔɔl kabutipo na e tre ma ŋ kaŋɛ fanɛ ŋ keta kabrantiɛbia ere m ba fo kutɔ, ŋkpal manɛ so, e kɔ kusɔ ko nna nɛ e kaŋɛ fo.” 19Ndoŋ nna nɛ benapo be enimu na gbagba pɛ kabrantiɛbia na be enɔ to nseŋ keta mo n lar ekarso m bishi mo: “Manɛ nɛ fee sha kekaŋɛ ma?” 20Nɛ e yɛ: “Juwebi na yili kumo fanɛ baaŋ kute ŋ kule fo echefo fanɛ fo keta Pɔɔl m ba nshɛrwuraana na kutɔ nɛ e malga nɛ b pin mbe demu na to nɛnɛ. 21Ama kplaŋ bumo so, ŋkpal manɛ so, basa ko chɔ basa adena ŋ ŋana a jo mo. Amo be basa na kikɛ bɔ ntaŋ nna fanɛ b maŋ mɔ Pɔɔl, b maaŋ ji ajibi, bumo alɛ maaŋ nuu shɛŋ. B bela ase nɛ b wora loŋ nsaa jo nɛ b nu kusɔ nɛ feeŋ kaŋɛ.” 22Nɛ benapo be enimu na kaŋɛ mo: “Sa maŋ kaŋɛ esa kikɛ fanɛ fo e kute le be kesheŋ ere n sa ma kikɛ.” Kumo be kaman nɛ e shin nɛ kabrantiɛbia na yɔ.

B ka keta Pɔɔl n yɔ Gomena Filiks kutɔ be asheŋ

23Kumo be kaman nɛ benapo be enimu na tre mbe benapowurbi benyɔ ko ŋ kaŋɛ bumo: “Men shin nɛ benapo alfa anyɔ nɛ egbaŋɛdiipoana be benapo adushunu nɛ akpawuraana be benapo alfa anyɔ e bela ase nɛ men yɔ Sizariya. Menyeeŋ koso nfe kerfi akpanu kanyɛ ere. 24Men fin egbaŋɛ n sa Pɔɔl nɛ e dii nɛ men keni mo so nɛnɛ n yɛr mo nɛ alenfia n ya sa Gomena Filiks.” 25Kumo be kaman nɛ benapo be enimu na sibɛ kawɔl ŋ kaŋɛ:

26“Ma, Klawdias Lisias e naa sibɛ kawɔl ere a sa fo, ebunyampogboŋ Gomena Filiks na. Mee chɔrɔ fo. 27Juwebi e daŋ nyaŋ kanyɛn ere a sha kemɔ mo nɛ n nu fanɛ e la Rom be esa nna nseŋ keta ma benapo n ya mɔlga mo bumo kutɔ. 28N daa sha kenu kusɔ nɛ e wora bumo nna, 29ŋkpal loŋ so ŋ keta mo n yɔ nshɛrwuraana na kutɔ n ya wu fanɛ e maŋ wora kulubi kikɛ nɛ k daga mbe luwu ŋko kabuti. Bumo gbagba be mbraana be emɔrɔsheŋ nɛ b kɔ a wu mo kulubi. 30Ma alɛ nu fanɛ Juwebi na bee kre mbe kemɔ be nia nna, amoso nɛ n shin nɛ b kɔ mo a ba fo kutɔ na. Ŋ kaŋɛ basa nɛ bumo nɛ mo kɔ abar na fanɛ b ba kaŋɛ fo alubi nɛ e wora.”

31Ndoŋ nna nɛ benapo na wora asɔ nɛ benapo be enimu na kaŋɛ bumo na kikɛ ŋ keta Pɔɔl kanyɛso na kikɛ hale n ya fo Antipatris. 32Kumo be ŋklade nɛ aya so be benapo na yili Antipatris m bɛta n yɔ kesɔnyige be ebu lempo na to ŋ ka egbaŋɛdiipoana nɛ bumo nɛ Pɔɔl e baa yɔ. 33B ka fo Sizariya nɛ b ta kawɔl na n sa gomena na nseŋ ta Pɔɔl m bɔɔ mo enɔ. 34Gomena na ka kraŋ kawɔl na nɛ e bishi Pɔɔl efuli na so be kaba mo nɛ e shi. E ka pin fanɛ Silisia nɛ e shi 35nɛ e kaŋɛ: “Basa nɛ baa wu fo kulubi na kaŋ ba, meeŋ keni fo demu na to.” Kumo be kaman nɛ e shin nɛ benapo na ta Pɔɔl n yɔ kowu nɛ Hɛrɔd daŋ pɔr na to n ya kaa keni mo so.

Currently Selected:

Ashuŋ Shunso 23: GJNb

Highlight

Copy

Compare