Ashuŋ Shunso 19

Pɔɔl ka ba Ɛfeses be asheŋ

1Jemanɛ nɛ Apɔlɔs daa wɔ Kɔrint na nɛ Pɔɔl malɛ na kasawule na kikɛ so loŋ n ya fo Ɛfeses. 2Ndoŋ nɛ e ya tu beyirdapo ko m bishi bumo: “Men ka ki beyirdapo, Kiyoyu Cheeŋ na gbelge menyi so a?” Nɛ b kaŋɛ: “Anyi ere maŋ nu fanɛ Kiyoyu Cheeŋ ko malɛ wɔtɔ gba.” 3Nɛ Pɔɔl bishi bumo: “Nɛ nuso be kabɔrɛbɛr nɛ b bɛr menyi?” Nɛ b kaŋɛ: “Kabɔrɛbɛr nɛ Jɔn daŋ bɔ kumo be asheŋ na.” 4Nɛ Pɔɔl kaŋɛ: “Kabɔrɛbɛr nɛ Jɔn daa bɛr basa na daa ŋini fanɛ basa na yɛ b lar bumo be alubi to, ama e daa kaŋɛ ekama nna fanɛ a daga fanɛ e yirda esa nɛ e wɔ mo ere Jɔn be kaman a ba na, mo e la Yesu na.” 5Ɛfeses be beyirdapoana na ka nu loŋ nɛ b shin nɛ b bɛr bumo kabɔrɛbɛr Enyɛnpe Yesu be ketre to. 6Nɛ Pɔɔl ta mbe enɔana n deŋi bumo so nɛ Kiyoyu Cheeŋ na gbelge bumo so nɛ b gbar ŋgbar nɛ bumo gbagba maa nu nseŋ naŋ wu abɔrɛsheŋ ŋ kaŋɛ. 7Bumo kikɛ daŋ fo fanɛ benyɛn kuduanyɔ.

8Pɔɔl be afɔl asa nɛ e wɔtɔ a yɔ ndoŋ be nshɛrbu to n ya kaa malga basa na kutɔ kenyɛnso a ji bumo emɔrɔ a sha b ka yirda fanɛ Ebɔrɛ be kuwura na to be asheŋ nɛ e daa malga na la kashenteŋ nna. 9Ama bumo be beko daŋ ta amu kpakpaso ŋ kini kenu nseŋ malga mmalga lubi basa na kikɛ to ŋ gbiti ekpa nɛ Enyɛnpe bee ŋini na. Nɛ Pɔɔl yige bumo nseŋ keta beyirdapoana na nɛ b wɔtɔ a shɛr kachɛ kama a ber abɔrɛsheŋ na be bare ashi lambu nɛ Tiranes daa shɛr basa a malga a sa bumo na to. 10Pɔɔl be nfɛ anyɔ nɛ e wɔtɔ a wora loŋ hale nɛ basa nɛ b daa wɔ Eeshia be efuli so na kikɛ, Juwebi nɛ nnyamase gba ya nu Enyɛnpe be kubɔya na.

Skiva be mbinyɛnbi nɛ ayoyu lubi ko be asheŋ

11Ebɔrɛ daa bɔla Pɔɔl so nna a wora emamachisheŋ popɔr damta ga. 12B daa ta Pɔɔl be antikiana nɛ mbe kushuŋ to be asɔbuuso gba nna n ya kaa sa belɔpo nɛ a bee shin nɛ basa na be alɔ nɛ ayoyu lubiana malɛ gba bee lar bumo to. 13Juwebi ko gba daa na a kilgi to a ju ayoyu lubi nseŋ wora ania nɛ b ta Enyɛnpe Yesu be ketre gba n wora loŋ ŋ kaŋɛ ayoyu lubi na: “Yesu nɛ Pɔɔl bee bɔ mbe kubɔya na be ketre to nɛ mee kaŋɛ menyi na, men lar esa ere to.” 14Bɔrɛmatapo nimuso nɛ baa tre Skiva na be mbinyɛnbi ashunu e daa wora loŋ na. 15Nɛ kiyoyu lubi na kaŋɛ bumo: “N nyi Yesu nsaa nyi Pɔɔl be asheŋ nɛ basa mo malɛ e la menyi alɛ?” 16Ndoŋ nna nɛ kanyɛn nɛ kiyoyu lubi na wɔ mo to na nyaŋɛ to m buu bumo n doro bumo nseŋ kpɛa bumo be asɔbuuso to n lɛ nɛ b lar mbe kowu na to n delge so n shile n choŋ. 17Juwebi nɛ nnyamase nɛ b daa wɔ Ɛfeses na kikɛ ka nu kumo nɛ kufu pɛ bumo kikɛ ga nɛ b sa Enyɛnpe Yesu be ketre kemaŋkura ga. 18Nɛ beyirdapoana na be bedamta ba basa to m ba kaa bugi bumo gbagba be afito a kaŋɛ alubi nɛ b wora. 19Bumo be bedamta nɛ b daŋ ta ŋkilgi be nwɔl ŋ koya ŋkilgi na daŋ bar amo kikɛ abar so m ba chɔɔ amo basa kikɛ be anishito. B ka daŋ ber nwɔl na be amansherbi a daa wɔ pɔŋ ŋgboŋ adesa. 20Ŋkpal le be asheŋgboŋ ere so Enyɛnpe be kubɔya na daŋ sɔ kakpa kikɛ nna nɛ basa damta bee yirda a ti so.

Kolu ka ku Ɛfeses be asheŋ

21Asheŋ nɛ a wora na be kaman nɛ Kiyoyu Cheeŋ na shin nɛ Pɔɔl yili kumo mbe kagbene to fanɛ e beeŋ bɔla Masɛdonia nɛ Griis to n ta n yɔ Jerusalɛm. Le nɛ e daŋ kaŋɛ: “A daga fanɛ, ŋ kaŋ yɔ ndoŋ, n fo Rom gba.” 22Ndoŋ nna nɛ e shuŋi mbe bechɛtopo anyɔ ko Masɛdonia nseŋ kraa wɔ Eeshia be kasawule so. Mbe bechɛtopo na e daa la Timoti nɛ Irastes.

23Jemanɛ na so nɛ kenishipere be kayurnyaŋ koso Ɛfeses ŋkpal Enyɛnpe be ekpa na so. 24Gbitibɔyɛponyɛn ko e daa wɔ Ɛfeses nɛ baa tre mo Demitrias. E daa ta egbiti nna a lɔŋɛ asɔ nɛ a du fanɛ kegbirche Aatemis be ebu. Mbe beshumpo daa nya tɔnɔ ga ashi kushuŋ na to. 25Ndoŋ nna nɛ e tre mbe beshumpoana na nɛ bekama nɛ bumo alɛ gba daa shuŋ loŋ be kushuŋ na m ba shɛr ŋ kaŋɛ: “Men nyi fanɛ kushuŋ ere e naa nyalɛ anyi. 26Menyi alɛ gba bee wu nseŋ naa nu kusɔ nɛ kanyɛn nɛ baa tre Pɔɔl na wɔtɔ a wora. E wɔtɔ nna a kaŋɛ basa fanɛ agbirana nɛ baa lɔŋɛ na maŋ la ebɔrɛana kikɛ. Mo alɛ tiŋ n shin nɛ basa damta ashi Ɛfeses nfe nɛ Eeshia be kasawule ere so be basa damta shuli fanɛ mbe kamalga na la kashenteŋ nna. 27Nɛ an maŋ de so, basa beeŋ jija anyi be kushuŋ ere be ketre. Kumo alɛ be kaman, nɛ an maŋ de so, basa beeŋ ba kaa fɛl kegbirche Aatemis be ebu na nɛ mbe ketre maaŋ naŋ dii kikɛ. Men keni, kegbirche nɛ basa kikɛ bee bunyaŋ ashi Eeshia be efuli ere so na nɛ baa sha kewora loŋ na.”

28Jimaŋ na ka nu asheŋ nɛ Demitrias malga na nɛ agbo pɛ bumo nɛ b fara a ponte a kaŋɛ: “Ɛfesesebi be kegbirche Aatemis e la elempo.” 29Ndoŋ nna nɛ kebagato na sɔ kade na to kikɛ nɛ jimaŋ yenso na nyaŋ Gayes nɛ Aristaakes, Masɛdonia be basa anyɔ ko nɛ bumo nɛ Pɔɔl daa na na ŋ gberge bumo n yɔ kade na be nshɛrkpa. 30Pɔɔl gbagba daa sha keyɔ jimaŋ na be anishito nna ashi nshɛr na to nɛ beyirdapoana na ju mo. 31Nɛ efuli na so be benimuana nɛ b daa la Pɔɔl mo teriana na gba shuŋi ŋ kaŋɛ mo fanɛ e sa maŋ kaŋ ba nshɛrkpa na to. 32Jemanɛ ere so kikɛ nɛ nshɛr na kikɛ bee baga to, nɛ ekama bee gbar a juge to, ŋkpal manɛ so, bumo be bedamta gba daa maŋ nyi kusɔ nɛ b shɛr ndoŋ nɛ b wora. 33Basa na be beko daa tama fanɛ Alɛkzaanda be asheŋ nna, ŋkpal Juwebi na ka daŋ shin nɛ e ya yili anishito na so. Ndoŋ nna nɛ Alɛkzaanda wora jimaŋ na enɔ a sha kemalga m mɔlga mbe kumu ashi jimaŋ na kutɔ. 34B ka pin fanɛ e la Juw nna nɛ bumo kikɛ ponte awa anyɔ a kaŋɛ kusɔ koŋwule nɛ b daŋ fara ŋ kaŋɛ na: “Ɛfesesebi be kegbirche Aatemis e la elempo.” 35Jimaŋ na wora awɔr na loŋ nɛ kade na to be krachigboŋ na ya tiŋ n lɔlɔ bumo nɛ b lo to nɛ e kaŋɛ bumo: “Ɛfesesebi, ekama nyi fanɛ Ɛfeses e naa keni kegbirche Aatemis be ebu na nɛ kejembu cheembi nɛ k shi ebɔrɛso n tɔr na so. 36Esa kama maaŋ tiŋ n chɛ kumo be loŋ, amoso, men wushi eyur boeŋ n sa maŋ kuse n wora asheŋ brembreŋ. 37Basa nɛ men bar nfe ere maŋ yuri kegbirlambu na to be kusɔ kama, bumo alɛ maŋ malga kulubi ŋ gbiti anyi be kegbirche na. 38Nɛ Demitrias nɛ mbe beshumpo nɛ esa ko kɔ abar gba nna, baaŋ tiŋ n yɛr amodoŋwura benimuana na kutɔ nchɛ nɛ baa kaa lar a chena demujikpa na to na nɛ bumo nɛ amodoŋwura ya kaŋɛ kusɔ nɛ b wora abar. 39Ama nɛ fanɛ men kraa sha kusɔ ko n ti so, kakpa nɛ baaŋ ji loŋ be demu e la ndetobia be nshɛr nɛ mbra na bee ŋini na to. 40Ŋkpal manɛ so, nɛ anyi maŋ de so, Romebi na beeŋ kaŋɛ fanɛ kusɔ nɛ k wora ere la kelantokɔ nna. Le be kebagato ere maŋ kɔ kifi. Anyi alɛ maaŋ tiŋ ŋ kaŋɛ bumo kusɔ nɛ k bar le be kebagato ere.” 41Krachi na ka malga n loge nɛ e shin nɛ basa na pesaŋ to n yɔ epe.

Currently Selected:

Ashuŋ Shunso 19: GJNb

Highlight

Copy

Compare