Ashuŋ Shunso 12

B ka naŋ lɔŋɛ n tɔrɔ bebɛsopo na ga be asheŋ

1Jemanɛ ere so nɛ Ewura Hɛrɔd daŋ fara a tɔrɔ asɔriebi na be beko. 2Mo e daŋ shin nɛ b ta tokobi ŋ ŋe Jɔn mo sipo Jeems m mɔ na. 3E ka pin fanɛ k par Juwebi na nɛ e naŋ shin nɛ b pɛ Pita malɛ. Kejigboŋ nɛ baa tre Bodobodo nɛ a maŋ kɔ yiisi be Kejigboŋ na be jemanɛ nɛ e daŋ wora kumo. 4B ka pɛ Pita nɛ b ta mo n ya ti ebu n shin nɛ benapo ana be ntuŋ ana so bee keni mo so. Kebansonchoŋ be kejigboŋ na be kaman nɛ Hɛrɔd daa sha keji mo demu basa kikɛ be anishito. 5Amoso nɛ b daŋ shin nɛ Pita daŋ kraa wɔ kabuti to na. Ama jemanɛ na so nɛ asɔriebi na malɛ wɔ kabɔrɛkule kpakpaso to a sa Pita.

Malaika ka shin nɛ Pita lar kabuti to be asheŋ

6Kachɛ nɛ Hɛrɔd daa sha kelara Pita kabuti to m ba ji mo demu basa kikɛ be anishito na be kanyɛso b ta ŋgbɛlɛbi anyɔ ŋ kre Pita n nase bekumpo anyɔ ko be nferinto nɛ e dese a di nɛ bekumpo ko malɛ yil ebu na be kabuna a de so. 7Epul na to nɛ Enyɛnpe be malaika ko ba yili ndoŋ nɛ kefulto ko nyaŋɛ n fuli ebu na to nɛ malaika na beta Pita be kekel so n tiŋi mo nseŋ kaŋɛ mo: “Yeŋi so ŋ koso.” Epul na to nɛ ŋgbɛlɛbi na lar mbe enɔana to n tɔr. 8Nɛ malaika na kaŋɛ mo: “Lɔŋɛ fo kreso n chɛ nseŋ lɔŋɛ fo asɛbta n wɔtɔ.” Ndoŋ nna nɛ Pita wora loŋ nɛ malaika na naŋ kaŋɛ mo: “Ta fo piŋi m buu nseŋ bɛ ma so.” 9Nɛ Pita bɛ mo so n lar ebu na to. Ama e daa maŋ nyi ŋko kusɔ nɛ malaika na daa wora na daa la kashenteŋ nna. E daa tama fanɛ bɔrɛdare nɛ e daa ku. 10B daŋ ya baŋ sososo be bekumpo be eyilikpa na so n ya baŋ kenyɔsopo so pɔɛŋ nseŋ ta n yɔ abɛlso be kabuna nɛ k bee bugi a yɔ kade na to na nɛ kabuna na gbagba bugi nɛ b lar m bɔla kubɔrbi ko so nɛ malaika na yige Pita epul na to nseŋ yɔ. 11Ndoŋ nna nɛ Pita pin kusɔ nɛ k wora mo na nseŋ kaŋɛ: “Naniere nɛ m pin kashenteŋto fanɛ Enyɛnpe e shuŋi mbe malaika nɛ e ba lara ma ashi Hɛrɔd be eleŋ nɛ asɔ nɛ Juwebi na daa fɛ na kikɛ to.”

12E ka pin kumo be loŋ nɛ e yɔ Jɔn Maak mo nio Mɛɛri pe. Kumo be jemanɛ na nɛ basa damta ko shɛr ndoŋ a kule Ebɔrɛ. 13Nɛ Pita ya ŋmɛa ebu na be kabuna nɛ kebichebi ko nɛ baa tre Roda ba nɛ e ba keni esa nɛ e la. 14Ndoŋ nna nɛ e pin Pita be ebɔl nɛ mbe kagbene fuli mo ga nɛ e yige kabuna na be kebugi nseŋ nya manaŋ m bɛta n ya kaŋɛ ekama fanɛ Pita e yil kabuna to na. 15Nɛ b bishi mo: “Fee lɔ nna a?” Nɛ e kraa kaŋɛ bumo fanɛ kashenteŋ nna. 16Ndoŋ nna nɛ b kaŋɛ: “Mbe malaika nna.” Jemanɛ ere so malɛ kikɛ nɛ Pita kraa yil a ŋmɛa. Kumo be kaman nɛ b ba bugi kabuna na n wu mo nɛ k chinchiŋ bumo ga. 17Nɛ e wora bumo enɔ fanɛ b lo to nseŋ kaŋɛ bumo kananɛ Enyɛnpe lara mo ashi kabuti na to. Kumo be kaman nɛ e kaŋɛ bumo: “Men kaŋɛ Jeems nɛ bekurgepo nɛ b ka na.” E ka kaŋɛ bumo loŋ n loge nɛ e yige bumo nseŋ yɔ kakpa ko.

18Kare ka chɛ nɛ kebagato gboŋ ko tɔr bekumpo na to nɛ b fara a bishi abar: “Manɛ e wora Pita na?” 19Nɛ Hɛrɔd sa kɔnɔ fanɛ basa e fin mo, nɛ b fin mo ŋ gben. Nɛ e shin nɛ b bishi bekumpo na mbe asheŋ nɛnɛ nseŋ shin nɛ b mɔ bumo. Kumo be kaman nɛ Hɛrɔd shi Jerusalɛm n yɔ Sizariya n ya wora nchɛnnyɔ ndoŋ.

Hɛrɔd be luwu be asheŋ

20Hɛrɔd ka nya agbo ga n wora Tayɛ nɛ Saidɔn ebi so, b daŋ wora kɔnɔkoŋwule nna n shuŋi bumo to be basa ko Hɛrɔd kutɔ. Ama kumo ere be pɔɛŋ, b daŋ wule nna nɛ bumo nɛ Blastes nɛ e daa la ewura na be kowu to be enimu na wora kɔnɔkoŋwule n yili, ŋkpal manɛ so, ewura na be efuli na so ebi kutɔ nɛ bumo be efuli so ebi daa nya bumo be ajibi. 21Hɛrɔd be kachɛgboŋ ko nɛ e lara mbe kuwurpiŋi m buu nseŋ chena mbe kuwurputi so nseŋ malga n sa basa na. 22Nɛ basa na malga eleŋso ŋ kaŋɛ: “Mannɛ nyiŋgbasa e naa malga ere. Ebɔrɛ ko nna.” 23Epul na to nɛ Enyɛnpe be malaika ba ta kulɔ n lɛ Hɛrɔd so ŋkpal e ka maŋ ta kemaŋkura na n sa Ebɔrɛ so. Ashushombi e daŋ ji mbe eyur nɛ e wu.

24Jemanɛ na so malɛ kikɛ nɛ Ebɔrɛ be kamalga na bee yɔ anishito nɛ bebɛsopoana na bee wora keshi a ti so.

25Baanabas nɛ Sɔɔl ka loge bumo be kushuŋ nɛ b keta Jɔn Maak nɛ mo nɛ bumo lar Jerusalɛm to m bɛta n yɔ.

Currently Selected:

Ashuŋ Shunso 12: GJNb

Highlight

Copy

Compare