Ashuŋ Shunso 11

1Beshuŋipo na nɛ Judiya be efuli na so kikɛ be bekurgepo na daŋ nu nnyamase na malɛ gba ka sɔ Ebɔrɛ be kubɔya na. 2Ama Pita ka bɛta m ba Jerusalɛm nɛ bumo nɛ b yirda katutuku be keŋini na ba fara a ji mo emɔrɔ 3a bishi mo kusɔ nɛ k ba nɛ e yɔ asoliwuraana pe hale n ya kaa tu bumo a ji. 4Nɛ Pita kaŋɛ bumo kananɛ asheŋ na kikɛ nyam fara nɛ kananɛ a ji. E yɛ: 5“Kachako n wɔ Jɔpa a kule Ebɔrɛ nseŋ ku bɔrɛdare n wu kusɔ peŋgeleŋ ko fanɛ wajɛ nɛ kumo be ekarso be nnɔ ana kɔ kumo to ashi ebɔrɛso a ba m ba yili m mata ma. 6Ndoŋ nna nɛ ŋ keni kumo to nɛnɛ n wu kowu nɛ kupuŋ to be asɔbɔya nɛ asɔ gbeyeso nɛ kupuŋ to be mbuibi. 7Ndoŋ nna nɛ n nu ebɔl ko ka bee kaŋɛ: ‘Pita, niŋi to ŋ koso m mɔ n we.’ 8Nɛ ŋ kaŋɛ: ‘Akai, Enyɛnpe, kejibi nɛ k maŋ walɛ so nɛ anyi Juwebi bee kishi maŋ naŋ luri ma kɔnɔ to kikɛ.’ 9Nɛ ebɔl na naŋ shi ebɔrɛso ŋ kaŋɛ: ‘Sa maa tre kusɔ nɛ k la kusɔ lela Ebɔrɛ kutɔ kusɔ nɛ k maŋ walɛ so.’ 10Kusɔ na wora loŋ ale asa pɔɛŋ nɛ b gberge kumo kikɛ n naŋ bɛta n yɔ ebɔrɛso. 11Epul na malɛ to nɛ mbɔ asa shi Sizariya m ba kowu nɛ n daa wɔ na to. 12Nɛ Kiyoyu Cheeŋ na kaŋɛ ma fanɛ n yeŋi so n shuli n tu bumo n yɔ. Ma nɛ bekurgepo ashe nɛ b shi Jɔpa ere e daŋ yɔ Sizariya n ya yɔ Kɔɔnilias pe. 13Nɛ e kaŋɛ anyi kananɛ e wu malaika mo pe nɛ e kaŋɛ: ‘Shuŋi esa ko Jɔpa nɛ e ya tre kanyɛn ko nɛ baa tre Saimɔn Pita 14nɛ e ba kaŋɛ fo asheŋ, nɛ fo nɛ fo kowu to ebi kikɛ e nya kumɔlga.’ 15Ŋ ka fara a malga nɛ Kiyoyu Cheeŋ na gbelge bumo so fanɛ kananɛ e daŋ gbelge anyi so sososo na. 16Saŋɛ na so nɛ n nyiŋi kusɔ nɛ Enyɛnpe daŋ kaŋɛ fanɛ: ‘Nchu nɛ Jɔn daŋ ta m bɛr basa kabɔrɛbɛr, ama Ebɔrɛ beeŋ shin nɛ Kiyoyu Cheeŋ na e gbelge menyi so.’ 17K baŋ fuli nna fanɛ Kiyoyu koŋwule nɛ Ebɔrɛ daŋ sa anyi jemanɛ nɛ an fara n yirda Enyɛnpe Yesu Kristo na nɛ e sa nnyamase ere na, nɛ manɛ be eleŋ nɛ ma alɛ kɔ nɛ n tiŋ n ju Ebɔrɛ ashi kusɔ nɛ e bee sha kewora to?” 18B ka nu kamalga na nɛ b yige bumo be kebaraso na nseŋ di Ebɔrɛ epaŋ ŋ kaŋɛ: “Kumo ere, Ebɔrɛ sa nnyamase gba ekpa nɛ b tiŋ n lar bumo be alubi to n nya ŋkpa na.”

Antiɔk be asɔriebi be asheŋ

19Tɔrɔ nɛ k daŋ ba jemanɛ nɛ b mɔ Stiven na daŋ shin nɛ beyirdapoana na pesaŋ to nna n yɔ mboŋ damta. Beko daŋ yɔ hale Fenisha nɛ Saipres nɛ Antiɔk n ya kaa bɔ Kristo be kubɔya na a sa Juwebi nawule. 20Beyirdapoana nɛ b daŋ shi Saipres nɛ Sairini na be beko malɛ daŋ yɔ Antiɔk nna n ya bɔ Enyɛnpe Yesu be baru lela na be kubɔya na n sa nnyamase malɛ. 21Enyɛnpe be eleŋ ka daa wɔ bumo to na so, basa damta daŋ yirda bumo be kubɔya na nseŋ fara a bɛ Enyɛnpe na so. 22Jerusalɛm be asɔriebi na ka nu kumo be baru nɛ b shuŋi Baanabas Antiɔk. 23E ka ba ndoŋ m ba wu kananɛ Ebɔrɛ nɛfa basa na nɛ mbe kagbene fuli mo ga nɛ e leŋ bumo kikɛ to fanɛ b bugi bumo be ŋgbene kikɛ kashenteŋto a nu a sa Enyɛnpe na. 24Baanabas daa la esa ga a kɔ yirda nɛ Kiyoyu Cheeŋ na bɔlɔ mo to. Ŋkpal loŋ so, basa damta daŋ ba pin Ebɔrɛ bumo be ŋgbene to. 25Kede be kaman nɛ Baanabas yɔ Taases nɛ e ya fin Sɔɔl. 26E ka wu mo nɛ e bar mo Antiɔk nɛ bumo benyɔ na ba ji kafɛ lelemu asɔriebi na kutɔ nsaa ŋini basa damta ko abɔrɛsheŋ na. Antiɔk nɛ b daŋ fara n tre bebɛsopoana na Kristoebi.

27Jemanɛ na so nɛ anebiana ko shi Jerusalɛm n yɔ Antiɔk. 28Bumo to be eko e daa la Agabes, mo e daŋ bɔla Kiyoyu Cheeŋ na be eleŋ to n wu ŋ kaŋɛ fanɛ akoŋgboŋ beeŋ tɔr durnya kikɛ to. Ewurgboŋ Klawdias be jemanɛ na nɛ akoŋgboŋ na daŋ tɔr. 29Ndoŋ nna nɛ bebɛsopoana na kikɛ wora kɔnɔkoŋwule fanɛ bumo be ekama e bar amansherbi kanaŋkamaso nɛ e beeŋ tiŋ nɛ b ta n ya sa bekurgepoana nɛ b daa wɔ Judiya na. 30B ka wora toto na n loge nɛ b ta amansherbi na n shuŋi Baanabas nɛ Sɔɔl nɛ b ya sa ndoŋ be asɔriebi be benimuana na.

Currently Selected:

Ashuŋ Shunso 11: GJNb

Highlight

Copy

Compare