1 Kɔrintebi 11

1Amoso, men baa kute ma to fanɛ kananɛ mee kute Kristo to na.

Kebaabuu kumu so ashi asɔri to be asheŋ

2Saŋkikɛ mee chɔrɔ menyi nna ŋkpal men ka bee nyiŋi ma kusɔ kama to nɛ kananɛ men baa kɔ keŋini mo nɛ n ta n sa menyi na to so.

3Ama mee sha nna nɛ men pin fanɛ enyɛn kama be kumu e la Kristo, nɛ eche malɛ be kumu la enyɛn nɛ Kristo malɛ be kumu la Ebɔrɛ. 4Amoso, enyɛn kama nɛ e bee ta kusɔ a buu mbe kumu so nsaa kule Ebɔrɛ ŋko nsaa wu abɔrɛsheŋ to a malga basa to bee ŋaba mbe kumu nna na. 5Ama eche kama malɛ nɛ e bee kule Ebɔrɛ ŋko a wu abɔrɛsheŋ to a malga basa to nsaa maa ta shɛŋ a chɛ kumu bee ŋaba mbe kumu nna na. K baa du fanɛ b ka kpasa mbe kumu nna. 6Nɛ eche baa maa ta shɛŋ a chɛ kumu, kumo ere a daga fanɛ e shin nɛ b she mo. Ama nɛ fanɛ keshɛ eche na ŋko kekpesa mo so bee keta mo anishinyɔr bre, kumo ere amo be kache na e baa ta kusɔ a chɛ mbe kumu. 7A maŋ daga enyɛn bre ka ta kusɔ ko m buu mbe kumu so, ŋkpal manɛ so, e la Ebɔrɛ be kaduli nɛ Ebɔrɛ be kemaŋkura nna. Ama eche bre la enyɛn be kemaŋkura nna. 8Ŋkpal manɛ so, mannɛ enyɛn e shi eche to, eche e shi enyɛn to. 9Ebɔrɛ malɛ maŋ pɔr enyɛn nna n sa eche, e pɔr eche nna n sa enyɛn. 10Amoso, a daga fanɛ eche e baa ta kusɔ a chɛ mbe kumu a ŋini fanɛ e wɔ mo kul be kaseto nna ŋkpal emalaika so. 11Ama men baa nyiŋi fanɛ Enyɛnpe na to, nɛ enyɛn maŋ wɔtɔ, eche maŋ la shɛŋ, nɛ eche malɛ maŋ wɔtɔ, enyɛn maŋ la shɛŋ. 12Ŋkpal manɛ so, kananɛ eche baŋ shi enyɛn to na, loŋ koŋwule na nɛ eche bee kurge enyɛn. Ama kusɔ kama malɛ shi Ebɔrɛ kutɔ nna. 13Menyi alɛ gbagba e keni kesheŋ ere to, a daga fanɛ eche e baa kule Ebɔrɛ basa to ŋkaa maŋ ta shɛŋ n chɛ kumu a? 14Nɛ men keni Ebɔrɛ be kapɔr kikɛ to, men maŋ wu fanɛ nɛ enyɛn baa kɔ emin tenteŋ, k la ŋaba nna n sa mo ere gbagba a? 15Ama men maŋ nyi fanɛ nɛ eche bre kɔ emin tenteŋ, k la mbe kemaŋkura nna a? Ŋkpal manɛ so, Ebɔrɛ sa mo emin tenteŋ na nna nɛ a baa buu mo so.

16To, kusɔ nɛ ŋ kaŋɛ ere, nɛ esa kama nɛ e bee sha keji kumo emɔrɔ, kusɔ nɛ mee kaŋɛ amodoŋwura e la fanɛ kusɔ nɛ anyi nɛ Ebɔrɛ be asɔriana na to ebi kikɛ bee bɛ so nna na.

Enyɛnpe be daŋkarejibi be asheŋ

17Le be kesheŋ ŋini ere bre to, m maŋ kɔ kechɔrɔ kama a sa menyi, ŋkpal manɛ so, men be nshɛrana to kejija e wɔtɔ, kelɔŋɛ maŋ wɔtɔ. 18Kusɔ nɛ k juŋkpar nde: N nu fanɛ men baŋ shɛr fanɛ asɔri, men kɔ kebargatoana nna menyi to, ma alɛ yirda kumo ashi ekpa ko so. 19Kumo alɛ la kashenteŋ nna fanɛ menyeeŋ baa kɔr abar to, saŋɛ na so, loŋ beeŋ shin nɛ basa e pin bumo nɛ b yil to nɛnɛ.

20Men ka bee kaa shɛr a sha keji Enyɛnpe be kejibi na, mannɛ Enyɛnpe be kejibi na nɛ menyee ji, 21ŋkpal manɛ so, men ka bee kaa ji na, ekama baa ji mo peya nna a maŋ naa jo esa kama. Amoso, beko wɔ akoŋ to nna nɛ beko malɛ nuu nsa m boo. 22Men maŋ kɔ epeana nna nɛ men baa ji nsaa nuu ndoŋana a? Ŋko menyee fɛl Ebɔrɛ be asɔri nna nsaa ŋaba bumo nɛ b maŋ kɔ shɛŋ na nna a? To, nɛ le ere, nuso nɛ mee kaŋɛ menyi? N chɔrɔ menyi ŋkpal le ere so a? Loŋ maaŋ wora kikɛ kuraa. 23Ŋkpal manɛ so, kusɔ nɛ n nya ashi Enyɛnpe kutɔ nɛ ma alɛ gba bee ta a sa menyi na fanɛ: Kanyɛ mo nɛ b daŋ debɔr Enyɛnpe Yesu na, e daŋ ta bodobodo nna 24n chɔrɔ Ebɔrɛ n loge nseŋ bu kumo to nseŋ kaŋɛ: “Ma eyur nɛ ŋ kɔ a sa menyi nde, men baa wora kesheŋ ere a nyiŋi ma.” 25B ka ji n loge nɛ e ta kawiebi na malɛ n wora kananɛ e daŋ wora na ŋ kaŋɛ: “Kawiebi ere e la Ebɔrɛ nɛ dimɛdi be ŋkre popɔr ŋkpal ma ŋklaŋ so na. Men baa wora loŋ saŋkikɛ nɛ menyee nuu asɔrso be asɔnuuso ashi kumo to na a nyiŋi ma.” 26Ŋkpal manɛ so, saŋkama nɛ menyee we bodobodo ere nsaa nuu kawiebi ere to be asɔ, menyee kute Enyɛnpe na be luwu be asheŋ to nna na hale n ya fo saŋɛ nɛ e beeŋ ya ba na. 27Amoso, ekama nɛ e we Enyɛnpe be bodobodo na nseŋ nuu asɔrso be asɔnuuso na ekpa nɛ k maŋ daga so, wora alubi nna ŋ gbiti Enyɛnpe be eyur nɛ mbe ŋklaŋ na nna na. 28Amoso, a daga fanɛ esa e keni mbe kumu so nɛnɛ pɔɛŋ nseŋ we Enyɛnpe be bodobodo na nseŋ nuu asɔnuuso na ashi kawiebi na to. 29Ŋkpal manɛ so, ekama nɛ e ji kejibi na nseŋ nuu asɔnuuso na ashi kawiebi na to nsaa maŋ nyi kusɔ nɛ eyur na bee ŋini, bee ji nna nsaa nuu kasogberge a sa mbe kumu nna na. 30Amoso nɛ menyi to be bedamta maŋ kɔ eleŋ nsaa lɔ nɛ menyi be beko malɛ gba wu na. 31Ama nɛ an baŋ keni anyi gbagba be ŋgbene to nɛnɛ bre, anyi maaŋ luri demuji kama to. 32Ama nɛ Enyɛnpe na baŋ sa anyi kasogberge n niŋi anyi ekpa, e bee wora loŋ nna, saŋɛ na so, e maaŋ ta anyi n ti durnyaebi so m mur. 33Amoso, ŋ kurgepoana, men baŋ ba nɛ men ba tu abar n ji, men baa jo abar. 34Ekama nɛ akoŋ kɔ, amodoŋwura e ji epe, saŋɛ na so, men baŋ ba shɛr abar so, kumo be lalaloge maaŋ bar kasogberge.

To, asheŋ nɛ a ka na bre, ŋ kaŋ ba, meeŋ ŋini menyi amo alɛ be afito.

Currently Selected:

1 Kɔrintebi 11: GJNb

Highlight

Copy

Compare