ພຣະນິມິດ 4
4
ການນະມັດສະການໃນສະຫວັນ
1ພາຍຫລັງເຫດການເຫຼົ່ານີ້ແລ້ວ ຂ້າພະເຈົ້າກໍໄດ້ເຫັນນິມິດຢ່າງໜຶ່ງ ຄືມີປະຕູໜຶ່ງເປີດຢູ່ໃນສະຫວັນ.
ແລະສຽງທຳອິດເໝືອນສຽງແກທີ່ຂ້າພະເຈົ້າໄດ້ຍິນນັ້ນ ກ່າວວ່າ, “ຈົ່ງຂຶ້ນມາທີ່ນີ້ ແລະເຮົາຈະສຳແດງໃຫ້ເຈົ້າເຫັນເຫດການທີ່ຕ້ອງເກີດຂຶ້ນໃນພາຍໜ້າ.” 2ໃນທັນໃດນັ້ນ ຂ້າພະເຈົ້າໄດ້ປະກອບໄປດ້ວຍພຣະວິນຍານ ແລະເບິ່ງແມ! ມີຣາຊບັນລັງຕັ້ງຢູ່ໃນສະຫວັນ ມີທ່ານອົງໜຶ່ງປະທັບຢູ່ເທິງບັນລັງນັ້ນ. 3ໃບໜ້າຂອງພຣະອົງເປັນດັ່ງແກ້ວມະນີໂຊດແລະແກ້ວພິລາ ແລະອ້ອມຮອບບັນລັງນັ້ນ, ມີຮຸ້ງກິນນໍ້າສີຄ້າຍຄືແສງແກ້ວມໍຣະກົດ. 4ອ້ອມຮອບບັນລັງນັ້ນ ມີບັນລັງອີກຊາວສີ່ບັນລັງ ແລະມີຜູ້ອາວຸໂສຊາວສີ່ທ່ານ ນັ່ງຢູ່ເທິງບັນລັງນັ້ນ ທຸກທ່ານນຸ່ງເຄື່ອງຂາວ ແລະສວມມົງກຸດຄຳທີ່ຫົວ. 5ຈາກບັນລັງນັ້ນ ມີຟ້າແມບເຫຼື້ອມທັງສຽງຟ້າຮ້ອງດັງສະໜັ່ນຢູ່ບໍ່ຂາດ. ຕໍ່ໜ້າບັນລັງນັ້ນ ມີຕະກຽງໄຕ້ໄວ້ຢູ່ເຈັດໜ່ວຍ ຄືວິນຍານທັງເຈັດຂອງພຣະເຈົ້າ. 6ຢູ່ຕໍ່ໜ້າບັນລັງນັ້ນ ມີສິ່ງໜຶ່ງເໝືອນທະເລແກ້ວມະນີ.
ອ້ອມຮອບບັນລັງທຸກດ້ານມີສິ່ງທີ່ມີຊີວິດສີ່ຕົນ ຊຶ່ງມີຕາເຕັມຢູ່ທັງຂ້າງໜ້າແລະຂ້າງຫລັງ. 7ຕົນທີໜຶ່ງເໝືອນສິງ, ຕົນທີສອງເໝືອນງົວນ້ອຍ, ຕົນທີສາມມີໜ້າເໝືອນມະນຸດ, ຕົນທີສີ່ເໝືອນນົກອິນຊີທີ່ກຳລັງບິນຢູ່. 8ສິ່ງທີ່ມີຊີວິດທັງສີ່ຕົນ ທຸກຕົນມີປີກຫົກປີກ ແລະມີຕາເຕັມຂ້າງນອກແລະຂ້າງໃນ. ພວກເພິ່ນຮ້ອງຕະຫລອດວັນຕະຫລອດຄືນບໍ່ຢຸດບໍ່ເຊົາວ່າ,
“ບໍຣິສຸດ ບໍຣິສຸດ ບໍຣິສຸດ
ອົງພຣະຜູ້ເປັນເຈົ້າ ພຣະເຈົ້າ
ຜູ້ຊົງຣິດທານຸພາບສູງສຸດ
ຜູ້ຊົງດຳລົງຢູ່ໃນອະດີດ
ຜູ້ຊົງດຳລົງຢູ່ໃນປະຈຸບັນ
ແລະຜູ້ຈະຊົງສະເດັດມາ.”
9ເມື່ອສິ່ງທີ່ມີຊີວິດເຫຼົ່ານັ້ນຖວາຍຄຳຍົກຍໍສະຫງ່າຣາສີ ຖວາຍພຣະກຽດ ແລະ ຄຳໂມທະນາຂອບພຣະຄຸນແດ່ພຣະອົງ ຜູ້ປະທັບເທິງຣາຊບັນລັງ ຜູ້ຊົງມີພຣະຊົນດຳລົງຢູ່ຕະຫລອດຊົ່ວນິຣັນດອນ ເມື່ອໃດ, 10ເມື່ອນັ້ນ ບັນດາຜູ້ອາວຸໂສຊາວສີ່ທ່ານ ກໍຂາບລົງຖວາຍບັງຄົມພຣະອົງ ຜູ້ປະທັບເທິງຣາຊບັນລັງນັ້ນ ນະມັດສະການພຣະອົງ ຜູ້ຊົງພຣະຊົນຢູ່ຕະຫລອດຊົ່ວນິຣັນດອນ ແລ້ວຖອດມົງກຸດອອກວາງລົງຕໍ່ໜ້າຣາຊບັນລັງຮ້ອງວ່າ,
11“ຂ້າແດ່ອົງພຣະຜູ້ເປັນເຈົ້າ
ແລະພຣະເຈົ້າຂອງຂ້ານ້ອຍທັງຫລາຍ
ພຣະອົງຊົງສົມຄວນທີ່ຈະໄດ້ຮັບ
ສະຫງ່າຣາສີ ກຽດຕິຍົດ ແລະ ຣິດເດດ
ເພາະວ່າພຣະອົງໄດ້ຊົງສ້າງ
ສັບພະທຸກສິ່ງທັງປວງ.
ແລະສັບພະທຸກສິ່ງທັງປວງນັ້ນ
ກໍຊົງສ້າງຂຶ້ນແລ້ວ
ແລະດຳລົງຢູ່ຕາມຊອບພຣະໄທ
ຂອງພຣະອົງ.”
Currently Selected:
ພຣະນິມິດ 4: ພຄພ
Highlight
Share
Copy
Want to have your highlights saved across all your devices? Sign up or sign in
@ 2012 United Bible Societies. All Rights Reserved.
