ພຣະນິມິດ 18
18
ນະຄອນບາບີໂລນຫຼົ້ມຈົມ
1ຫລັງຈາກນັ້ນແລ້ວ ຂ້າພະເຈົ້າໄດ້ເຫັນເທວະດາອີກຕົນໜຶ່ງ ລົງມາຈາກສະຫວັນ ມີສິດອຳນາດອັນຍິ່ງໃຫຍ່ ແລະຣັດສະໝີຂອງເພິ່ນກໍສ່ອງແຈ້ງທົ່ວແຜ່ນດິນໂລກ. 2ເທວະດານັ້ນໄດ້ຮ້ອງປະກາດສຽງແຮງກ້າຂຶ້ນວ່າ, “ບາບີໂລນມະຫານະຄອນຫຼົ້ມຈົມແລ້ວ ຫຼົ້ມຈົມເສຍແລ້ວ ມັນກາຍເປັນບ່ອນອາໄສຂອງພວກຜີມານຮ້າຍ ເປັນບ່ອນລີ້ຊ່ອນຂອງວິນຍານຊົ່ວຮ້າຍທຸກຢ່າງ ແລະເປັນຄອນນົກບໍ່ສະອາດແລະໜ້າກຽດໜ້າຊັງທຸກຊະນິດ. 3ເພາະວ່າປະຊາຊາດທັງປວງໄດ້ດື່ມເຫລົ້າແວງປຸກຢ່າງເຫລືອເກີນ ແຫ່ງການຜິດສິນທຳທາງເພດຂອງນະຄອນນັ້ນ. ບັນດາກະສັດແຫ່ງແຜ່ນດິນໂລກໄດ້ລ່ວງຜິດສິນທຳທາງເພດກັບນະຄອນນັ້ນ ແລະພໍ່ຄ້າທັງຫລາຍແຫ່ງແຜ່ນດິນໂລກ ໄດ້ລໍ້າລວຍດ້ວຍຊັບອັນຟຸມເຟືອຍຂອງນະຄອນນັ້ນ.”
4ແລ້ວຂ້າພະເຈົ້າກໍໄດ້ຍິນສຽງໜຶ່ງອີກຈາກສະຫວັນກ່າວວ່າ,
“ໄພ່ພົນຂອງເຮົາເອີຍ,
ຈົ່ງອອກມາຈາກມະຫານະຄອນນັ້ນເສຍ
ເພື່ອເຈົ້າທັງຫລາຍຈະບໍ່ມີສ່ວນ
ໃນການບາບຂອງມັນ
ເພື່ອເຈົ້າຈະບໍ່ໄດ້ຖືກໄພອັນຕະລາຍ
ທີ່ຈະເກີດແກ່ມັນນັ້ນ,
5 ເພາະການບາບຂອງນະຄອນນັ້ນ
ກອງສູງຂຶ້ນພຽງຟ້າແລ້ວ
ແລະພຣະເຈົ້າໄດ້ຊົງຈື່ຈຳການກະທຳ
ອັນຊົ່ວຊ້າຂອງມັນໄວ້ແລ້ວ.
6 ນະຄອນນັ້ນໄດ້ໃຫ້ຜົນຢ່າງໃດ
ກໍຈົ່ງໃຫ້ຜົນແກ່ມັນຢ່າງນັ້ນ
ແລະຈົ່ງຕອບແທນແກ່ການກະທຳ
ຂອງມັນເປັນສອງເທົ່າ.
ໃນຈອກທີ່ມັນໄດ້ປະສົມໄວ້
ກໍຈົ່ງປະສົມລົງໃນຈອກນັ້ນສອງເທົ່າ.
7 ນະຄອນນັ້ນໄດ້ອວດຈອງຫອງ
ແລະປ່ອຍຕົວໄປ
ຕາມຄວາມສະໜຸກສະໜານເທົ່າໃດ
ກໍຈົ່ງໃຫ້ມັນໄດ້ຮັບ
ການທໍລະມານ ແລະຄວາມໂສກເສົ້າຫລາຍເທົ່ານັ້ນ
ເພາະມັນຄິດໃນໃຈວ່າ, ‘ເຮົາຢູ່ໃນຕຳແໜ່ງຣາຊີນີ
ບໍ່ແມ່ນແມ່ໝ້າຍ, ເຮົາຈະບໍ່ປະສົບຄວາມໂສກເສົ້າຈັກເທື່ອ’
8 ຍ້ອນການນີ້ ໄພພິບັດຕ່າງໆ
ຂອງນະຄອນນັ້ນ
ຈະຕົກຖືກນາງໃນວັນດຽວ
ຄືຄວາມຕາຍ, ຄວາມໂສກເສົ້າ ແລະຄວາມອຶດຢາກ.
ແລະໄຟເຜົາຜານນາງໃຫ້ຈິບຫາຍ
ເພາະອົງພຣະຜູ້ເປັນເຈົ້າ
ພຣະເຈົ້າ ຜູ້ຊົງຕັດສິນລົງໂທດນະຄອນນັ້ນ
ຊົງປະກອບດ້ວຍພຣະກຳລັງ.”
9ບັນດາກະສັດແຫ່ງແຜ່ນດິນໂລກ ທີ່ໄດ້ລ່ວງຜິດສິນທຳທາງເພດກັບນະຄອນນັ້ນ ແລະໄດ້ປ່ອຍຕົວໄປຕາມຄວາມສະໜຸກສະໜານຮ່ວມກັນນັ້ນ ເມື່ອໄດ້ເຫັນຄວັນໄຟໄໝ້ ມັນກໍຈະຕີເອິກຮ້ອງໄຫ້. 10ກະສັດເຫຼົ່ານັ້ນກໍຢືນຢູ່ຫ່າງໄກ ເພາະຢ້ານໄພແຫ່ງການທໍລະມານຂອງນະຄອນນັ້ນ ແລະຈະກ່າວວ່າ, “ວິບັດ ວິບັດແລ້ວ ບາບີໂລນມະຫານະຄອນທີ່ແຂງແຮງເອີຍ ເຈົ້າໄດ້ຖືກການພິພາກສາລົງໂທດເສຍ ພາຍໃນຊົ່ວໂມງດຽວເທົ່ານັ້ນ.”
11ບັນດາພໍ່ຄ້າແຫ່ງແຜ່ນດິນໂລກ ຕ່າງກໍຈະຮ້ອງໄຫ້ແລະໂສກເສົ້າ ເພາະນະຄອນນັ້ນເໝືອນກັນ, ເພາະວ່າບໍ່ມີຜູ້ໃດຊື້ສິນຄ້າທີ່ພວກເຂົາບັນທຸກມານັ້ນ. 12ສິນຄ້າເຫຼົ່ານັ້ນຄື: ຄຳ, ເງິນ, ເພັດພອຍຕ່າງໆແລະໄຂ່ມຸກ, ຜ້າປ່ານເນື້ອລະອຽດ, ຜ້າສີມ່ວງ, ຜ້າໄໝແລະຜ້າສີແດງເຂັ້ມ, ໄມ້ຫອມທຸກຊະນິດ, ເຄື່ອງໃຊ້ຕ່າງໆທີ່ເຮັດດ້ວຍງາຊ້າງ ແລະເຮັດດ້ວຍໄມ້ອັນມີຄ່າ, ເຮັດດ້ວຍທອງສຳຣິດ ເຮັດດ້ວຍເຫຼັກ ແລະເຮັດດ້ວຍຫີນອ່ອນ, 13ເຄື່ອງເທດແລະເຄື່ອງຫອມ, ກຳຍານ, ນໍ້າມັນຫອມແລະເຄື່ອງຫອມເຜົາບູຊາ, ເຫຼົ້າອະງຸ່ນແລະນໍ້າມັນໝາກກອກເທດ, ເຂົ້າແປ້ງລະອຽດແລະເຂົ້າບະເລ, ງົວແລະແກະ, ມ້າແລະລົດມ້າ, ຂ້ອຍໃຊ້, ຕະຫລອດທັງຊີວິດຈິດໃຈມະນຸດດ້ວຍ. 14ພວກເຂົາກ່າວວ່າ, “ຜົນທຸກຢ່າງທີ່ໃຈເຈົ້າປາຖະໜາຢາກໄດ້ນັ້ນ ກໍສູນຫາຍໄປແລ້ວ ສິ່ງສາລະພັດອັນມີຄ່າແລະຄວາມສວຍສົດງົດງາມ ກໍສູນເສຍໄປຈາກເຈົ້າແລ້ວ ແລະເຈົ້າຈະບໍ່ພົບເຫັນອີກຈັກເທື່ອ.” 15ບັນດາພໍ່ຄ້າທີ່ໄດ້ຮັ່ງມີຈາກການຄ້າຂາຍໃນນະຄອນນີ້ ຕ່າງກໍຈະຢືນຢູ່ຫ່າງໆ ເພາະຢ້ານໄດ້ຮັບສ່ວນທົນທຸກທໍລະມານກັບນາງ ພວກເຂົາຈະຮ້ອງໄຫ້ແລະໂສກເສົ້າ 16ແລະເປັ່ງສຽງດັງວ່າ, “ວິບັດ ວິບັດແລ້ວ ມະຫານະຄອນນັ້ນ ທີ່ເຄີຍນຸ່ງຫົ່ມຜ້າປ່ານເນື້ອລະອຽດ ຜ້າສີມ່ວງອ່ອນ ຜ້າສີແດງເຂັ້ມ ທີ່ເຄີຍປະດັບຕົວດ້ວຍຄຳ ດ້ວຍເພັດພອຍຕ່າງໆ ແລະດ້ວຍໄຂ່ມຸກນັ້ນ. 17ພຽງແຕ່ຊົ່ວໂມງດຽວ ຊັບສົມບັດເຫຼົ່ານັ້ນກໍໄດ້ຖືກທຳລາຍເສຍໄປໝົດ.”
ນາຍເຮືອກຳປັ່ນທຸກຄົນ ແລະຄົນໂດຍສານ ບັນດາລູກເຮືອ ແລະຄົນທັງໝົດ ທີ່ມີອາຊີບທາງທະເລ ຕ່າງກໍພາກັນຢືນຢູ່ຫ່າງໄກ, 18ເມື່ອເຫັນຄວັນຈາກແປວໄຟທີ່ໄໝ້ນະຄອນນັ້ນ ພວກເຂົາຈຶ່ງຮ້ອງຂຶ້ນວ່າ, “ບໍ່ມີນະຄອນໃດເລີຍ ທີ່ຈະເປັນດັ່ງມະຫານະຄອນນີ້.” 19ພວກເຂົາໄດ້ເອົາຂີ້ຝຸ່ນດິນໃສ່ຫົວຂອງຕົນ ພ້ອມທັງຮ້ອງໄຫ້ແລະໂສກເສົ້າ ເອີ່ຍຂຶ້ນວ່າ, “ວິບັດ ວິບັດແລ້ວ ມະຫານະຄອນນີ້ ຊຶ່ງໄດ້ເຮັດໃຫ້ຄົນທັງໝົດທີ່ມີເຮືອກຳປັ່ນເດີນທະເລ ເປັນຄົນຮັ່ງມີດ້ວຍຊັບສົມບັດຂອງນາງ, ພາຍໃນຊົ່ວໂມງດຽວ ກໍຖືກຊົງທຳລາຍເສຍໄປໝົດ.”
20“ໂອ ສະຫວັນ ແລະບັນດາໄພ່ພົນຂອງພຣະເຈົ້າ ໂອ ອັກຄະສາວົກ ແລະຜູ້ປະກາດພຣະທຳທັງຫລາຍເອີຍ ຈົ່ງຊົມຊື່ນຍິນດີເພາະນະຄອນນັ້ນ. ດ້ວຍວ່າ, ພຣະເຈົ້າໄດ້ຊົງພິພາກສາລົງໂທດນະຄອນນັ້ນ ເພື່ອເປັນການແກ້ແຄ້ນໃຫ້ເຈົ້າທັງຫລາຍແລ້ວ.”
21ແລ້ວມີເທວະດາຜູ້ມີຣິດຕົນໜຶ່ງ ໄດ້ຍົກຫີນກ້ອນໜຶ່ງເໝືອນຫີນໂມ້ໃຫຍ່ ຖິ້ມລົງໃນທະເລ ກ່າວວ່າ, “ບາບີໂລນ ມະຫານະຄອນນັ້ນ ຈະຖືກຖິ້ມລົງໂດຍຮຸນແຮງຢ່າງນີ້ແຫຼະ, ແລ້ວຈະບໍ່ມີຜູ້ໃດເຫັນມັນອີກຈັກເທື່ອ. 22ສຽງນັກດີດພິນ ນັກເສບ ນັກເປົ່າຂຸ່ຍ ແລະເປົ່າແກຈະບໍ່ໄດ້ຍິນໃນເຈົ້າຕໍ່ໄປອີກ ຈະບໍ່ພົບຄົນທີ່ມີວິຊາຊ່າງຢ່າງໃດຈັກຄົນໃນເຈົ້າຕໍ່ໄປອີກ ແລະສຽງໂມ້ແປ້ງຈະບໍ່ໄດ້ຍິນໃນເຈົ້າຕໍ່ໄປອີກຈັກເທື່ອ. 23ຈະບໍ່ມີແສງໂຄມສ່ອງສະຫວ່າງໃນເຈົ້າຕໍ່ໄປອີກ, ຈະບໍ່ມີຜູ້ໃດໄດ້ຍິນສຽງເຈົ້າບ່າວ ເຈົ້າສາວໃນເຈົ້າຕໍ່ໄປອີກຈັກເທື່ອ, ເພາະວ່າບັນດາພໍ່ຄ້າຂອງເຈົ້າ ໄດ້ເປັນເຈົ້ານາຍແຫ່ງແຜ່ນດິນໂລກ ແລະບັນດາປະຊາຊາດໄດ້ຖືກຫລອກລວງ ດ້ວຍເວດມົນຄາຖາຂອງເຈົ້າ.
24ໃນນະຄອນນັ້ນ ເຂົາໄດ້ພົບເລືອດຂອງພວກຜູ້ປະກາດພຣະທຳ ແລະຂອງພວກໄພ່ພົນຂອງພຣະເຈົ້າ ກັບເລືອດຂອງບັນດາຄົນທີ່ຖືກຂ້າເທິງແຜ່ນດິນໂລກນັ້ນ.”
Currently Selected:
ພຣະນິມິດ 18: ພຄພ
Highlight
Share
Copy
Want to have your highlights saved across all your devices? Sign up or sign in
@ 2012 United Bible Societies. All Rights Reserved.
