ຮັກກາຍ 1
1
ພຣະເຈົ້າສັ່ງໃຫ້ສ້າງພຣະວິຫານຂຶ້ນໃໝ່
1ໃນປີທີສອງ ທີ່ດາຣິອຸດໄດ້ຂຶ້ນເປັນຈັກກະພັດແຫ່ງເປີເຊຍ ອັນກົງກັບວັນທີໜຶ່ງຂອງເດືອນທີຫົກ; ຖ້ອຍຄຳຂອງພຣະເຈົ້າຢາເວໄດ້ມາເຖິງໂດຍທາງຜູ້ທຳນວາຍຮັກກາຍ. ຖ້ອຍຄຳນີ້ແມ່ນສຳລັບເຊຣຸບບາເບນລູກຊາຍຂອງເຊອານຕີເອນ ທີ່ເປັນຜູ້ປົກຄອງຊາດຢູດາຍ ແລະສຳລັບເຢຊູອາລູກຊາຍຂອງໂຢຊາດັກ ຜູ້ເປັນມະຫາປະໂຣຫິດ.
2ພຣະເຈົ້າຢາເວອົງຊົງຣິດອຳນາດຍິ່ງໃຫຍ່ກ່າວຕໍ່ຮັກກາຍວ່າ, “ປະຊາຊົນເຫຼົ່ານີ້ເວົ້າວ່າ, ‘ຍັງບໍ່ເຖິງເວລາເທື່ອ ທີ່ຈະສ້າງວິຫານຂອງພຣະເຈົ້າຢາເວຂຶ້ນໃໝ່.”’ 3ແລ້ວພຣະເຈົ້າຢາເວກໍມອບຖ້ອຍຄຳນີ້ໃຫ້ແກ່ປະຊາຊົນ ໂດຍຜ່ານທາງຜູ້ທຳນວາຍຮັກກາຍວ່າ: 4“ປະຊາຊົນຂອງເຮົາເອີຍ ເປັນຫຍັງພວກເຈົ້າຈຶ່ງຢູ່ໃນເຮືອນທີ່ກໍ່ສ້າງຢ່າງດີ ໃນເມື່ອວິຫານຂອງເຮົາຍັງຮົກຮ້າງເພພັງຢູ່? 5ພຣະເຈົ້າຢາເວອົງຊົງຣິດອຳນາດຍິ່ງໃຫຍ່ກ່າວວ່າ: ພວກເຈົ້າບໍ່ເຫັນຫລືວ່າ ແມ່ນຫຍັງກຳລັງເກີດຂຶ້ນກັບພວກເຈົ້າ? 6ພວກເຈົ້າຫວ່ານເມັດພືດຢ່າງຫລວງຫລາຍ ແຕ່ເກັບກ່ຽວໄດ້ໜ້ອຍດຽວ. ພວກເຈົ້າມີອາຫານ ແຕ່ກໍກິນບໍ່ພໍອີ່ມ. ພວກເຈົ້າມີເຫຼົ້າອະງຸ່ນ ແຕ່ກໍດື່ມບໍ່ພໍເມົາ ພວກເຈົ້າມີເຄື່ອງນຸ່ງຫົ່ມ ແຕ່ກໍອົບອຸ່ນບໍ່ພຽງພໍ. ຄົນເຮັດວຽກໜັກກໍລ້ຽງຊີບຕົນບໍ່ພໍກຸ້ມ. 7ພຣະເຈົ້າຢາເວອົງຊົງຣິດອຳນາດຍິ່ງໃຫຍ່ກ່າວວ່າ: ພວກເຈົ້າເຫັນບໍ່ວ່າ ເປັນຫຍັງເຫດການເຊັ່ນນີ້ຈຶ່ງເກີດຂຶ້ນ? 8ບັດນີ້ ຈົ່ງຂຶ້ນໄປທີ່ເນີນພູຕ່າງໆ ຫາຊອກໄມ້ມາສ້າງວິຫານຂຶ້ນໃໝ່; ແລ້ວເຮົາກໍຈະພໍໃຈນຳແລະພວກເຈົ້າຈະໄດ້ນະມັດສະການເຮົາ ສົມກັບທີ່ເຮົາຄວນໄດ້ຮັບຄຳຍ້ອງຍໍສັນລະເສີນ. ພຣະເຈົ້າຢາເວກ່າວດັ່ງນີ້ແຫຼະ.
9ພວກເຈົ້າຫວັງເກັບກ່ຽວໄດ້ຫລາຍ ແຕ່ພັດໄດ້ໜ້ອຍ. ເມື່ອພວກເຈົ້ານຳຜົນລະປູກມາບ້ານ ເຮົາຊໍ້າພັດໃຫ້ມັນປິວໜີໄປ. ເປັນຫຍັງເຮົາຈຶ່ງໄດ້ເຮັດເຊັ່ນນັ້ນ? ພຣະເຈົ້າຢາເວກ່າວວ່າ: ເພາະວ່າວິຫານຂອງເຮົາຍັງຮົກຮ້າງເພພັງຢູ່ ໃນຂະນະທີ່ພວກເຈົ້າແຕ່ລະຄົນຫຍຸ້ງຢູ່ກັບເຮັດວຽກເຮັດງານເພື່ອບ້ານເຮືອນຂອງຕົນເອງ. 10ເຫດສະນັ້ນ ຝົນຈຶ່ງບໍ່ຕົກແລະບໍ່ມີຫຍັງງອກຂຶ້ນໄດ້. 11ເຮົາໄດ້ນຳໄພແຫ້ງແລ້ງມາສູ່ດິນແດນຄື: ເນີນພູຕ່າງໆ, ທົ່ງນາ, ສວນອະງຸ່ນ, ສວນໝາກກອກເທດ ຕະຫລອດທັງເຄື່ອງປູກຂອງຝັງທຸກໆຊະນິດ ທີ່ໄດ້ເກີດຂຶ້ນຕາມພື້ນດິນ; ສູ່ມະນຸດແລະສັດທັງຫລາຍ ແລະທຸກສິ່ງທີ່ພວກເຈົ້າພະຍາຍາມປູກຂຶ້ນ.”
ປະຊາຊົນເຊື່ອຟັງຄຳສັ່ງຂອງອົງພຣະຜູ້ເປັນເຈົ້າ
12ແລ້ວເຊຣຸບບາເບນລູກຊາຍຂອງເຊອານຕີເອນ, ເຢຊູອາລູກຊາຍຂອງໂຢຊາດັກ ມະຫາປະໂຣຫິດ ແລະປະຊາຊົນທັງໝົດ ຜູ້ທີ່ໄດ້ກັບມາຈາກການເປັນຊະເລີຍໃນຕ່າງຖິ່ນ ໃນບາບີໂລນ ກໍເຮັດຕາມພຣະເຈົ້າຢາເວ ພຣະເຈົ້າຂອງພວກຕົນໄດ້ບອກ. ພວກເຂົາຢ້ານກົວພຣະເຈົ້າຢາເວຈຶ່ງເຊື່ອຟັງຜູ້ທຳນວາຍຮັກກາຍ ຜູ້ນຳຂ່າວຂອງພຣະເຈົ້າຢາເວ ພຣະເຈົ້າຂອງພວກເຂົາສົ່ງມາເຖິງເພິ່ນ. 13ແລ້ວຮັກກາຍຜູ້ນຳຂ່າວຂອງພຣະເຈົ້າຢາເວກໍບອກຖ້ອຍຄຳຂອງພຣະເຈົ້າຢາເວແກ່ປະຊາຊົນວ່າ, “ເຮົາຈະຢູ່ກັບພວກເຈົ້າ ນີ້ຄືຄຳສັນຍາຂອງເຮົາ.” ພຣະເຈົ້າຢາເວກ່າວດັ່ງນີ້ແຫຼະ. 14ພຣະເຈົ້າຢາເວໄດ້ບັນດົນໃຈທຸກຄົນໃຫ້ຊ່ວຍກັນສ້າງພຣະວິຫານ: ເຊຣຸບບາເບນລູກຊາຍຂອງເຊອານຕີເອນ ຜູ້ປົກຄອງຢູດາຍ; ເຢຊູອາລູກຊາຍຂອງໂຢຊາດັກ ມະຫາປະໂຣຫິດ, ຕະຫລອດທັງປະຊາຊົນທຸກຄົນ ທີ່ໄດ້ກັບມາຈາກການເປັນຊະເລີຍໃນຕ່າງຖິ່ນ. ພວກເຂົາໄດ້ເລີ່ມສ້າງວິຫານຂອງພຣະເຈົ້າຢາເວອົງຊົງຣິດອຳນາດຍິ່ງໃຫຍ່ ພຣະເຈົ້າຂອງພວກເຂົາ 15ໃນວັນທີຊາວສີ່ເດືອນຫົກ ກົງກັບຣາຊການປີທີສອງຂອງກະສັດດາຣິອຸດ.
Currently Selected:
ຮັກກາຍ 1: ພຄພ
Highlight
Share
Copy
Want to have your highlights saved across all your devices? Sign up or sign in
@ 2012 United Bible Societies. All Rights Reserved.