Xekhaliyas 4
4
Zaaj Ywgtoog Pum Tug Ncej Txawb Teeb
1Tug timtswv ceebtsheej kws pheej nrug kuv thaam rov lug rua ntawm kuv hab tsaa kuv le tsaa tug tuabneeg kws tsaugzug sawv. 2Nwg nug kuv tas, “Koj pum dlaabtsi?”
Kuv teb tas, “Kuv pum ib tug ncej txawb teeb kws yog muab kub ua. Muaj ib lub taig ntim roj txawb rua sau. Sau tug ncej txawb teeb ntawd muaj xyaa lub teeb kws nyag muaj nyag ib tug teebxeeb. 3Tseem muaj ob tsob txiv ntoo-roj nyob ntawm tug ncej txawb teeb ntawd, ib tsob nyob ib saab.” #Tshwm 11:4 4Tes kuv nug tug timtswv ceebtsheej tas, “Tug tswv, lub ntsablug ntawm tej nuav yog dlaabtsi?”
5Nwg nug kuv tas, “Koj tsi paub lov?”
Kuv teb tas, “Tug tswv, kuv tsi paub os.”
6Tug timtswv ceebtsheej kuas kuv coj tug TSWV cov lug nuav moog qha rua Xelunpanpees tas, “Koj yuav kovyeej, tsi yog lug ntawm tubrog lub zug lossis lug ntawm koj lub zug, tabsis yog lug ntawm Kuv tug Ntsujplig. #Exala 5:2 7Txawm muaj kev covnyom luj luaj lub hauv roob los yuav yaaj ntshis ntawm koj hauvntej moog. Koj yuav rov txhimkhu lub Tuamtsev dlua; thaus kws koj tso lub pobzeb kawg rua ntawm nwg qhov chaw lawm, cov tuabneeg yuav qw has tas, ‘Zoo kawg nkaus, zoo kawg nkaus!’ ”
8Tug TSWV rov has ib cov lug rua kuv dlua. 9Nwg has tas, “Xelunpanpees tub pua lub plaag Tuamtsev taag lawm, hab nwg yuav ua kuas tav. Thaus muaj le nuav lawm, Kuv tsaav tuabneeg yuav paub tas Kuv yog tug kws tau khaiv koj moog cuag puab. 10Puab tub taag kev casab lawm, ruaqhov pheej ua tsi tav le. Tabsis puab yuav pum Xelunpanpees rausab ntso ua lub Tuamtsev, hab puab yuav zoosab heev.”
Tug timtswv ceebtsheej has rua kuv tas, “Xyaa lub teeb ntawd yog tug TSWV xyaa lub qhovmuag, kws pum thoobplawg lub nplajteb nuav.” #Tshwm 5:6
11Tes kuv nug nwg tas, “Ob tsob txiv ntoo-roj kws ib tsob nyob ib saab ntawm tug ncej txawb teeb yog txhais lecaag? #Tshwm 11:4 12Hab ob tug ceg ntoo-roj kws ib tug nyob ib saab ntawm tug kaig kub kws laub roj ntawd yog txhais lecaag?”
13Nwg teb kuv tas, “Koj tsi paub lov?”
Kuv teb tas, “Tug tswv, kuv tsi paub os.”
14Tes nwg has tas, “Ntawd yog pev txug ob tug tuabneeg kws Vaajtswv tau xaiv hab muab txhawb meejthawj lug ua tug TSWV kws kaav taagnrho lub nplajteb nuav tegnum.”
Currently Selected:
Xekhaliyas 4: HNJ2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
