Loos Lug Tawqha
Lug Tawqha
Paulus tsaab ntawv kws nwg sau moog rua cov ntseeg huv nroog Loos nuav yog nwg sau moog rua puab kuas puab npaaj tog qhov kws nwg yuav moog saib pawg ntseeg tim lub nroog Loos. Nwg lub homphaj yog yuav moog nrug cov ntseeg tid ua dlejnum uake ib ntus, dlhau ntawd, kuas puab paab nwg moog rua tim tebchaws Xapees. Nwg sau moog qha rua puab txug nwg txuj kev totaub txug txuj kev ntseeg hab kev coj ua lub neej lawvle tug ntseeg. Phoo ntawv nuav muaj Paulus cov lug qha txhij-txhua nyob rua huv.
Tomqaab kws Paulus haslug nojqaab nyobzoo rua pawg ntseeg huv lub nroog Loos hab qha txug nwg tej kev thov Vaajtswv paab rua puab lawm, nwg has txug lub ntsablug ntawm tsaab ntawv nuav le nuav: “Txuj Moo Zoo yog qha txug qhov kws Vaajtswv ua rua tuabneeg ncaajnceeg: kws yog lug ntawm txuj kev ntseeg thaus pib moog txug thaus xaus” (1:17).
Paulus muab lub ntsablug nuav qha kuas meej tas, txhua tug tuabneeg, taagnrho cov Yudais hab Lwmtsaav Tuabneeg huvsi, yuav tau lug nrug Vaajtswv sis raugzoo, vim suavdlawg puavleej nyob huvqaab txuj kev txhum lub fwjchim. Qhov kws tuabneeg lug nrug Vaajtswv sis raugzoo tau, yog lug ntawm txuj kev ntseeg Yexus Khetos. Dlhau ntawd, Paulus qha txug lub neej tshab kws nyob rua huv Yexus lug ntawm qhov kws tuabneeg lug nrug Vaajtswv sis raugzoo. Tug ntseeg muaj kev nyaabxeeb nrug rua Vaajtswv hab Vaajtswv tug Ntsujplig yog tug tso puab dlim ntawm txuj kev txhum hab txuj kev tuag lub fwjchim. Nyob huv tshooj 5-8, Paulus qha txug lub homphaj ntawm Vaajtswv txuj Kevcai hab Vaajtswv tug Ntsujplig lub fwjchim kws nyob rua huv tug ntseeg lub neej. Dlhau ntawd, Paulus muab cov Yudais hab Lwmtsaav Tuabneeg lug ntsuag seb yuav ua lecaag txhaj dlhos Vaajtswv lub homphaj kws Nwg npaaj rua txhua tug tuabneeg. Paulus xaus lug has tas qhov kws cov Yudais tsi leeg yuav Yexus, yog ib feem ntawm Vaajtswv lub homphaj kws coj txhua tsaav tuabneeg lug ncaav kuas cuag Vaajtswv txuj moovhlub kws nyob rua huv Yexus Khetos, hab nwg ntseeg tas cov Yudais yuav tsi muab Yexus tsotseg moog le. Thaus kawg, Paulus sau txug tug ntseeg yuavtsum ua lub neej zoo lecaag, tshwjxeeb yog txuj kev hlub kws nrug lwmtug sis raugzoo. Paulus sau txug ntau lub ntsablug xwsle kev ua Vaajtswv dlejnum, kev coj ntawm tug ntseeg rua lub teb lub chaw hab rua lwmtug, hab ntau yaam lug nug txug txuj kev xaav. Nwg xaus tsaab ntawv nuav nrug ib cov lug kws tawm huv nwg lub sab tuaj hab tej lug qhuas Vaajtswv.
Txheejtxheem
Lug tawqha hab lub ntsablug (1:1-17)
Tuabneeg xaav tau txuj kev cawmdlim (1:18—3:20)
Vaajtswv txuj kev cawmdlim (3:21—4:25)
Lub neej tshab nyob rua huv Khetos (5:1—8:39)
Vaajtswv lub homphaj rua cov Yixalayees (9:1—11:36)
Cov ntseeg tug cwjpwm (12:1—15:13)
Xaus lug hab has nojqaab nyobzoo (15:14—16:27)
Currently Selected:
Loos Lug Tawqha: HNJ2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.