Loos 1

1Kuv yog Paulus, kws yog Yexus Khetos ib tug tubkhai, hab yog ib tug timthawj kws Vaajtswv tau xaiv hab hu lug qha Nwg Txuj Moo Zoo.

2Txuj Moo Zoo ntawd, Vaajtswv tub coglug ntev lug lawm, lug ntawm Nwg cov xwbfwb cev Vaajtswv lug kws tau muab sau tseg rua huv Vaajtswv tej Lug kws Dlawbhuv. 3Txuj Moo Zoo yog has txug Nwg tug Tub, kws yog peb tug Tswv Yexus Khetos: ntawm saab nqajtawv, Nwg yog Daviv le caajceg; 4ntawm saab Ntsujplig kws dlawbhuv, Nwg yog Vaajtswv tug Tub kws muaj fwjchim luj, ruaqhov Nwg tau raug tsaa sawv huv qhovtuag rovqaab lug lawm. 5Lug ntawm Nwg, Vaajtswv txhaj pub rua kuv muaj feem lug ua ib tug timthawj pub rua Khetos, kuas moog coj txhua tsaav tuabneeg lug ntseeg hab noog Vaajtswv lug. 6Xaam taagnrho mej cov kws nyob huv lub nroog Loos nuav, kws Vaajtswv tub hu lug ua Yexus Khetos tug lawm hab.

7Yogle ntawd, kuv txhaj sau tsaab ntawv nuav tuaj rua mej txhua tug kws nyob huv lub nroog Loos nuav, kws Vaajtswv hlub hab Vaajtswv tau hu lug ua Nwg tsaav tuabneeg lawm:

Thov Vaajtswv kws yog peb Leejtxiv hab tug Tswv Yexus Khetos pub txuj moovhlub hab kev nyaabxeeb rua mej.

Paulus Ua Vaajtswv Tsaug

8Uantej nuav, kuv ua kuv tug Vaajtswv tsaug rua mej txhua tug lug ntawm Yexus Khetos, ruaqhov tuabneeg thoob qaabntuj taabtom nov txug mej txuj kev ntseeg. 9Tug Vaajtswv kws kuv teevtam kawg sab kawg ntsws rua, xwsle qhuabqha Txuj Moo Zoo kws has txug Nwg tug Tub, yog tug kws ua povthawj has tas kuv ncuntsoov mej 10txhua zag kws kuv thov Vaajtswv. Kuv thov Vaajtswv has tas yog Nwg pumzoo, thov Nwg qheb kev rua kuv tuaj saib mej. 11Ruaqhov kuv xaav pum mej, sub kuv txhaj faib tau Vaajtswv txuj koobmoov ntawm saab ntsujplig rua mej, kuas mej txuj kev ntseeg ruaj-khov. 12Kuv has le nuav yog txhais has tas kuas peb ib leeg txhawb ib leeg; kuv kev ntseeg yuav txhawb tau mej hab mej kev ntseeg yuav txhawb tau kuv.

13Cov kwvtij suavdlawg, kuv xaav has rua mej tas, kuv yeej npaajsab yuav tuaj saib mej ntau zag lawm, tabsis pheej muaj tej yaam lug taabkaum ua rua kuv tuaj tsi tau. Kuv kuj xaav coj cov tuabneeg kws nrug mej nyob uake kuas puab lug ntseeg, ib yaam le kuv tub coj Lwmtsaav Tuabneeg lug ntseeg lawm. #Tegnum 19:21 14Ruaqhov kuv tshuav cov tuabneeg Kilis hab lwmtsaav tuabneeg, cov txawjntse hab cov ruag le nqe. 15Yogle ntawd, kuv txhaj kubsab lug xaav tuaj qha Txuj Moo Zoo rua mej cov kws nyob huv lub nroog Loos ib yaam nkaus hab.

Txuj Moo Zoo Lub Fwjchim

16Kuv yeej tsi txaajmuag rua Txuj Moo Zoo, ruaqhov Txuj Moo Zoo yog Vaajtswv lub fwjchim kws cawm tau txhua tug kws ntseeg; cov Yudais yog cov uantej, tomqaab ntawd yog Lwmtsaav Tuabneeg. #Malak 8:38 17Txuj Moo Zoo yog qha txug qhov kws Vaajtswv ua rua tuabneeg muaj kev ncaajnceeg: kws yog lug ntawm txuj kev ntseeg thaus pib moog txug thaus xaus. Lawvle Vaajtswv Txujlug tau has tseg has tas, “Tug tuabneeg kws ncaajnceeg lug ntawm txuj kev ntseeg, tug ntawd yuav tau txujsa.”#1:17: ncaajnceeg lug ntawm txuj kev ntseeg, tug ntawd yuav tau txujsa; lossis ncaajnceeg, tug ntawd yuav tau ua lub neej lug ntawm txuj kev ntseeg. #Henpl 2:4

Tuabneeg Txuj Kev Txhum

18Vaajtswv ua Nwg txuj kev npautawg tshwm sau ntuj lug tawmtsaam txhua yaam kev txhum hab kev phem kws tuabneeg ua, ruaqhov puab tej kev phem ntawd ua rua tuabneeg tsi paub qhov tseeb lawm. 19Vaajtswv rautxim rua puab, ruaqhov nwg yoojyim heev rua puab lug paub txug Vaajtswv, vim Vaajtswv yog tug kws ua kuas tej ntawd yoojyim. 20Txij thaus Vaajtswv tsim ntuj tsim teb lug, txawm yog tuabneeg qhovmuag tsi pum Vaajtswv tug kws muaj fwjchim nyob moog ibtxhis hab qhov kws Nwg yog Vaajtswv los yog puab saib ibpuas tsaavyaam kws Nwg tsim, puab yeej paub tas muaj Vaajtswv tag. Yogle ntawd, puab yuav has tas puab tsi paub Vaajtswv yeej has tsi tau le!

21Puab yeej paub Vaajtswv, tabsis puab tsi kaam fwm Nwg has tas Nwg yog Vaajtswv, lossis tsi kaam ua Nwg tsaug. Puab tej kev xaav cale tsi muaj qaabhau, hab puab lub hlwb kws khoob lug ntawd cale puvnpo kev tsausntuj lawm. #Efex 4:17-18 22Puab khaav has tas puab yog tuabneeg ntse, tabsis puab ruag kawg le; 23tub tsimnyog puab pehawm Vaajtswv tug kws muaj sa nyob moog ibtxhis, tabsis puab ho moog pe tej mlom kws tuabneeg txua zoole tej tuabneeg kws txawj tuag, zoole noog, zoole tsaj, lossis zoole naab. #2Kev 4:16-18

24Tub yog vimle ntawd, Vaajtswv txhaj ca puab moog ua phem ua qas lawvle puab lub sab ntshaw, hab ua ntau yaam kev txaajmuag rua puab lub cev. 25Puab muab qhov tseeb kws has txug Vaajtswv pauv ua qhov cuav. Puab pehawm hab teev tej kws Vaajtswv tsim, tabsis ho tsi pehawm tug Vaajtswv kws tsim txhua yaam ntawd. Vaajtswv txhaj yog tug tsimnyog suavdlawg qhuas moog taag ibtxhis! Amees.

26Tub yog vimle ntawd, Vaajtswv txhaj ca puab moog ua ntau yaam lawvle puab lub sab ntshaw kws raug kev txaajmuag. Txawm yog tej quaspuj los ib leeg cale dleev ib leeg, kws ibtxwm yeej tsi muaj le ntawd. 27Tej txivneej los ua ib yaam nkaus le ntawd; lawvle ibtxwm quaspuj hab txivneej txhaj ua namtxiv xwb, tabsis tej txivneej cale tso qhov ntawd tseg, hab ib leeg cale dleev ib leeg kws yog ua tej yaam txaajmuag kawg le. Thaus kawg puab txhaj tau txais Vaajtswv txuj kev teemtxim kws tsimnyog le tej kev phem qas kws puab tau ua ntawd.

28Tub yog vim puab tsi kaam leeg paub qhov tseeb txug Vaajtswv, Vaajtswv txhaj tso puab tseg, ua rua puab lub hlwb txhaj xaav txug tej kev phem kev qas xwb, yogle ntawd puab txhaj moog ua tej kws tsi tsimnyog ua. 29Puab lub neej puvnpo txhua yaam kev phem, puab limham, sabhlub, uanruj uatsiv, muaj lub sabkhib, tua tuabneeg, siscaav sistshe, dlaag-ntxag, hab xaav phem rua lwmtug. Puab taugxaiv 30hab ib leeg haslug chob rua ib leeg; puab ntxub Vaajtswv, thuam lwmtug, khaavtheeb, hab muabhlub; puab najnub nrhav kev ua phem, puab tsi noog namtxiv lug; 31puab tsi paub qhov phem qhov zoo, puab tsi ua lawvle tej kws puab tau coglug tseg, hab puab yeej tsi muaj kev hlub los yog kev taabncuab rua leejtwg le. 32Puab yeej paub tas Vaajtswv txuj kevcai yeej qha has tas cov tuabneeg kws ua lub neej zoole ntawd yeej tsimnyog raug kev tuag; txawm le ntawd los tub tsi yog puab najnub ua tej kev phem ntawd xwb, puab tseem pumzoo rua lwmtug ua tej kev phem ntawd hab.

Currently Selected:

Loos 1: HNJ2022

Highlight

Copy