Loos 11

Vaajtswv Taabncuab Cov Yixalayees

1Tes kuv txawm nug has tas: Puas yog Vaajtswv tub tso Nwg tsaav tuabneeg tseg lawm? Yeej tsi tau muab tsotseg le! Kuv tugkheej tub yog ib tug tuabneeg Yixalayees, yog Anplahaas caajceg hab yog xeem Npeeyamees. #Filipi 3:5 2Vaajtswv tsi tau muab Nwg tsaav tuabneeg kws thaus u Nwg tub xaiv tseg lawm tso povtseg ib zag le. Mej tsi paub Vaajtswv Txujlug qhov kws has txug Eliyas thov Vaajtswv rautxim rua cov Yixalayees lov? Eliyas has tas, 3“Tug Tswv, puab muab Koj cov xwbfwb cev Vaajtswv lug tua povtseg, hab muab Koj tej thaaj fij tsoo tawg taag huv tuabsi; tsuas tshuav kuv tuableeg lawm xwb, tabsis puab tseem najnub nrhav kev yuav muab kuv tua povtseg hab.” #1Vaaj 19:10, 14 4Vaajtswv teb nwg lecaag? Vaajtswv has tas, “Kuv tub tseg tau 7,000 leej kws yeej tsi tau txhuscaug pe Npa-aas le ca ua Kuv tug lawm.” #1Vaaj 19:18 5Ib yaam nkaus le ntawd, nwgnuav Vaajtswv tub xaiv tau ib paab kws tsi coob heev tseg, kws yog xaiv lug ntawm Nwg txuj moovhlub. 6Nwg xaiv puab lug ntawm Nwg txuj moovhlub, tsi yog lug ntawm puab tegnum. Yog Vaajtswv xaiv lawvle tuabneeg tegnum, tes Nwg txuj moovhlub tsi yog moovhlub lawm.

7Yog lecaag cov Yixalayees txhajle nrhav tsi tau tej kws puab nrhav ntawd? Tsuas yog paab nyuas tuabneeg tsawg-tsawg kws Vaajtswv xaiv lawm txhaj nrhav tau xwb; dlua le lwm cov tes ua ntsejlaag muagdlig tsi nov Vaajtswv lub suab hu le. 8Lawvle Vaajtswv Txujlug tau sau tseg has tas, “Vaajtswv ua rua puab lub sab hab lub tswvyim ruag lawm; puab muaj qhovmuag, tabsis puab tsi pumkev, muaj qhovntsej, tabsis tsi nov lug; puab ua le ntawd lug txug najnub nua le.” #2Kev 29:4; Yaxaya 29:10 9Hab Daviv has tas:

“Thov kuas puab tej rooj noj rooj haus ua yej ua ntxab maag puab;

thov kuas puab qaug, hab thov kuas puab raug txim! #Nnkauj 69:22-23 (LXX)

10Thov kuas puab tej qhovmuag dlig, kuas puab tsi xob pumkev;

hab thov kuas puab tsaa tsi taug taubhau moog ibtxhis le.”

11Yogle ntawd, kuv nug has tas: Thaus cov Yudais dlawm qaug, puab tub raug kev puamtsuaj lawm lov? Tsi yog le ntawd! Tabsis vim qhov kws puab tau ua txhum, txhaj ua rua Lwmtsaav Tuabneeg tau txais txuj kev cawmdlim, cov Yudais txhaj khib heev. 12Cov Yudais txuj kev txhum tau ua rua tuabneeg nplajteb tau txais koobmoov nplua-mag, hab puab txuj kev pluag ntawm saab ntsujplig tau ua rua Lwmtsaav Tuabneeg tau txais koobmoov nplua-mag. Yogle ntawd, yog tseem xaam taagnrho cov Yudais lug ntxiv hab, mas sov qhov koobmoov ntawd tseem yuav luj npaum lecaag dlag!

Lwmtsaav Tuabneeg Txuj Kev Dlim Txim

13Zagnua kuv has rua mej cov kws yog Lwmtsaav Tuabneeg. Vim kuv yeej yog ib tug timthawj rua Lwmtsaav Tuabneeg, kuv yuav muab tegnum kws kuv ua saib tseemceeb. 14Tejzag qhov nuav yuav ua rua kuv tsaav tuabneeg khib, tabsis yuav cawm tau puab qeeleej dlim. 15Ruaqhov thaus Vaajtswv tso cov Yudais tseg lawm, cale ua rua tuabneeg nplajteb kws ua yeebncuab rua Vaajtswv hloov lug ua Nwg le phoojywg lawm. Yogle ntawd, yog Vaajtswv rov txais yuav cov Yudais rovqaab lug, puab yuav zoo ib yaam le cov tuabneeg tuag kws sawv huv qhovtuag rov lug.

16Yog qhov nyuas ncuav kws muab ndlais tawm ntawm thooj ncuav kws xub muab fij rua Vaajtswv ntawd dlawbhuv lawm, tes taagnrho lub ncuav ntawd yeej dlawbhuv; hab yog cov caag ntoo yeej dlawbhuv lawm, tes cov ceg puavleej dlawbhuv ib yaam nkaus. 17Muaj qee ceg ntawm tsob txiv ntoo-roj nyeg tub raug muab txav hab tub muab ib ceg txiv ntoo-roj qus lug txuas rua ntawm tsob txiv ntoo-roj nyeg lawm. Mej cov kws yog Lwmtsaav Tuabneeg, mej zoo nkaus le ceg nyuas txiv ntoo-roj qus, kws nwgnuav mej tau lug koom nrug cov dlej kws tsob txiv ntoo-roj nyeg tug caag, kws yog cov Yudais, nqug lug yug mej. 18Yogle ntawd, mej tsi xob saib tsi taug cov ceg kws raug muab txav povtseg ntawd. Mej yuav khaavtheeb tau lecaag? Mej tsuas yog ib tug nyuas ceg xwb, mej tub tsi yug cov caag, tsuas yog cov caag txhaj yug mej xwb.

19Tabsis koj yuav has tas, “Cov ceg ntawd raug muab txav povtseg kuas txhaj tau chaw muab kuv txuas rua.” 20Yeej yog le ntawd ntaag. Tub yog vim puab tsi ntseeg, puab txhaj raug muab txav povtseg; qhov kws mej tseem txuas khovkho tub yog vim mej ntseeg. Tabsis mej yuavtsum ceevfaaj; mej tsi xob khaav has tas mej tau lug nyob puab qhov chaw lawm. 21Yog Vaajtswv tub muab cov Yudais kws zoole tej ceg txiv ntoo-roj nyeg txav povtseg; mej xaav tas Nwg yuav tseg mej hab nua lov?

22Xaav kuas mej pum tas Vaajtswv sabzoo npaum lecaag hab Nwg rautxim nyaav npaum lecaag: Nwg rautxim nyaav rua cov tuabneeg kws ua txhum, tabsis Nwg ua lub sabzoo rua mej, yog tas mej rausab ntso ua mej lub neej nyob rua huv Nwg lub sabzoo ntawd moog le. Tabsis yog mej tsi ua le ntawd, mej yuav raug muab txav povtseg hab. 23Yog cov Yudais tso puab txuj kev kws tsi ntseeg tseg, Vaajtswv yuav muab puab rov lug txuas rua ntawm puab qhov chaw; ruaqhov Vaajtswv yeej muaj fwjchim ua tau le ntawd. 24Mej cov kws yog Lwmtsaav Tuabneeg, mej zoo nkaus le ceg nyuas txiv ntoo-roj qus kws tub raug muab txav povtseg lawm tabsis Vaajtswv tau muab lug txuas rua tsob txiv ntoo-roj nyeg lawm. Cov Yudais tes zoo ib yaam le tsob txiv ntoo-roj nyeg ntawd ntaag; yog Vaajtswv yuav muab cov ceg kws tub raug muab txav lawm coj rov lug txuas rua ntawm nwg hom ntoo mas tseem yuav yoojyim dlua.

Vaajtswv Txuj Kev Taabncuab Rua Txhua Tug

25Cov kwvtij, kuv xaav kuas mej paub txug ib txujlug tseeb kws tsi muaj tuabneeg paub, sub mej txhaj yuav tsi khaav has tas mej ntse heev. Qhov ntawd yog le nuav: Cov Yixalayees tsuas tawv ncauj ib ntus xwb, yuav tsi yog tawv ncauj taag moog le. Puab tsuas tawv moog txug thaus kws Lwmtsaav Tuabneeg lug puv tug lej rua ntawm Vaajtswv xwb. 26Thaus ntawd, cov Yixalayees txhua tug yuav dlim; lawvle Vaajtswv Txujlug has tas:

“Tug Cawmseej yuav lug sau lub roob Xi-oos lug;

hab Nwg yuav muab txhua yaam kev txhum ntawm Yakhauj le caajceg tshem huvsi moog. #Yaxaya 59:20-21 (LXX)

27Nuav yog Kuv cov lug cogtseg rua puab,

thaus Kuv zaam puab tej kev txhum lawm.” #Yaxaya 27:9 (LXX)

28Vim cov Yudais tsi kaam leeg txais yuav Txuj Moo Zoo, puab txhajle ua Vaajtswv le yeebncuab. Qhov ntawd, ua rua mej cov kws yog Lwmtsaav Tuabneeg kuj tau lug cuag Vaajtswv; tabsis Vaajtswv suav has tas puab yog Nwg cov phoojywg vim Nwg tub xaiv puab cov yawmkoob lawm. 29Ruaqhov Vaajtswv yeej tsi hloov sab rua tug kws Nwg tub xaiv hab foom koobmoov rua lawm. 30Mej cov kws yog Lwmtsaav Tuabneeg, thaus u mej yeej tsi noog Vaajtswv lug hab, tabsis nwgnuav mej tau txais Vaajtswv txuj kev taabncuab vim cov Yudais tsi noog Vaajtswv lug. 31Tuabyaam nkaus le ntawd, vim mej tau txais Vaajtswv txuj kev taabncuab lawm, nwgnuav cov Yudais txhaj tsi noog Vaajtswv lug, sub nwgnuav#11:31: Tej phoo ntawv qub kws xuas teg sau, tsi muaj nwgnuav. puab txhaj yuav tau txais Vaajtswv txuj kev taabncuab ib yaam le mej hab. 32Vaajtswv ua rua txhua tug zoole cov tuabneeg raug kaw vim puab tsi noog Nwg lug, sub Nwg txhaj taabncuab tau puab txhua tug.

Qhuas Vaajtswv

33Vaajtswv txuj kev npluanuj mas ntau tag-tag le! Nwg tej tswvyim hab kev txawjntse mas tub tag-tag le! Leejtwg txhaj yuav paub pav txug Nwg txuj kev txavtxim sab? Leejtwg txhaj yuav totaub txug tej kws Nwg ua? #Yaxaya 55:8 34Lawvle Vaajtswv Txujlug has tas,

“Leejtwg tub paub txug tug Tswv lub sab lawm?

Leejtwg tub paab tswvyim rua tug Tswv lawm? #Yaxaya 40:13 (LXX)

35Leejtwg tau muab ib yaam dlaabtsi rua Vaajtswv lawm,

es Vaajtswv yuavtsum tau pauj rovqaab rua nwg?” #Yauj 41:11

36Ruaqhov txhua yaam yog Nwg tsim, txhua yaam yog lug ntawm Nwg lug, hab txhua yaam yog tsim lug rua Nwg. Thov kuas Vaajtswv tau koobmeej moog ibtxhis le! Amees. #1Klt 8:6

Currently Selected:

Loos 11: HNJ2022

Highlight

Copy