YouVersion Logo
Search Icon

Loos 10

10
1Cov kwvtij, kuv lub sab ntshaw hab kuv txuj kev thov Vaajtswv tes yog xaav kuas kuv tsaav tuabneeg Yixalayees dlim puab lub txim. 2Kuv ua tau timkhawv has tas puab yeej kubsab lug rua Vaajtswv, tabsis qhov kws puab kubsab ntawd tsi yog lawvle txuj kev txawjntse kws tseeb. 3Vim puab tsi paub tas txuj kev ncaajnceeg yog lug ntawm Vaajtswv lug, puab txhajle nrhav kev ua kuas puab ncaajnceeg, yogle ntawd puab txhaj tsi kaam txais yuav Vaajtswv txuj kev ncaajnceeg. 4Khetos yog tug kws ua rua txuj Kevcai ntawd xaus lawm, kuas txhua tug kws ntseeg txhaj tau ua tuabneeg ncaajnceeg.
Kev Dlim Txim Yog Rua Txhua Tug
5Mauxes sau txug tug ncaajnceeg kws coj lawvle txuj Kevcai, nwg sau has tas, “Tug kws coj lawvle txuj Kevcai tej lug qha, tug ntawd yuav muaj sa nyob.” #Levi 18:5 6Tabsis txuj kev ncaajnceeg kws lug ntawm txuj kev ntseeg, yog has le nuav: “Tsi xob has huv koj lub sab has tas, ‘Leejtwg yuav moog rua sau ntuj ceebtsheej?’ ” (kws yog moog coj Khetos lug). #2Kev 30:12-14 7“Lossis has tas, ‘Leejtwg yuav moog rua huv lub qhov tub-tub?’ ” (kws yog moog coj Khetos huv qhovtuag rovqaab lug.) 8Tseeb tag, txuj kev ncaajnceeg yog has le nuav: “Vaajtswv Txujlug nyob ze koj, nyob huv koj lub qhovncauj hab huv koj lub sab” (kws yog txujlug kws has txug txuj kev ntseeg kws peb qha). 9Yog koj lub ncauj leeg has tas Yexus yog tug Tswv hab koj lub sab ntseeg tas Vaajtswv tub tsaa Nwg sawv huv qhovtuag rovqaab lug lawm, tes koj yuav dlim. 10Ruaqhov tug kws ntseeg huv nwg lub sab, Vaajtswv suav has tas nwg yog tuabneeg ncaajnceeg, hab tug kws leeg ntawm nwg lub ncauj, tug ntawd yog tug kws dlim txim. 11Vaajtswv Txujlug has tas, “Txhua tug kws ntseeg Nwg, tug ntawd yuav tsi poob ntsejmuag.” #Yaxaya 28:16 (LXX) 12Qhov nuav yog has rua txhua tug, ruaqhov cov Yudais hab Lwmtsaav Tuabneeg yeej zoo tuabyaam nkaus; Vaajtswv yog suavdlawg tug Tswv hab Nwg yeej foom koobmoov nplua-mag rua txhua tug kws thov txug Nwg. 13Vaajtswv Txujlug has tas, “Txhua tug kws thov txug tug Tswv lub npe, tug ntawd yuav dlim.” #Yau 2:32
14Tabsis puab yuav ua lecaag thov tug kws puab tub tsi tau ntseeg? Hab puab yuav ua lecaag ntseeg tug kws puab tub tsi tau nov dlua? Hab puab yuav ua lecaag nov yog tsi muaj tuabneeg qha puab? 15Hab puab yuav ua lecaag qha yog tsi muaj leejtwg xaa puab moog? Vaajtswv Txujlug txhaj sau tseg has tas, “Cov tuabneeg kws xaa Txuj Moo Zoo mas puab txhais kutaw zoonkauj kawg le!” #Yaxaya 52:7 16Tabsis tsi yog txhua tug yuav kaam ntseeg Txuj Moo Zoo ntawd. Yaxayas has tas, “Tug Tswv, leejtwg tub ntseeg tej kws peb qha ntawd lawm?” #Yaxaya 53:1 (LXX) 17Yogle ntawd, kev ntseeg yog lug ntawm qhov kws nov Txuj Moo Zoo, hab kev nov Txuj Moo Zoo yog lug ntawm qhov kws qha txug Khetos.
18Tabsis kuv nug has tas, puab tsi tau nov Txuj Moo Zoo lov? Qhov tseeb tag, puab yeej nov lawm, ruaqhov Vaajtswv Txujlug has tas:
“Puab lub suab tub nrov moog thoob nplajteb,
hab puab tej lug tub nchaa moog txug qaabntuj kawg lawm.” #Nnkauj 19:4 (LXX)
19Kuv rov nug dlua has tas, puas yog cov tuabneeg Yixalayees tsi totaub? Mauxes tub xub has lawm has tas:
“Kuv yuav ua kuas mej khib
cov tuabneeg kws tsi muaj tebchaws;
hab Kuv yuav ua kuas mej chim
rua tsaav tuabneeg ruag.” #2Kev 32:21 (LXX)
20Hab Yaxayas tseem muaj sab tawv has tas:
“Cov tuabneeg kws tsi nrhav Kuv,
puab tub ntsib Kuv lawm,
cov tuabneeg kws tsi nug txug Kuv,
Kuv tub lug tshwm rua puab pum lawm.” #Yaxaya 65:1 (LXX)
21Tabsis nwg has txug cov Yixalayees has tas, “Vaajtswv has tas, ‘Kuv tsaa Kuv ob txhais teg taagnub txaistog cov tuabneeg kws tsi nooglug hab cov tuabneeg kws ntxeevsab.’ ” #Yaxaya 65:2 (LXX)

Currently Selected:

Loos 10: HNJ2022

Highlight

Share

Copy

None

Want to have your highlights saved across all your devices? Sign up or sign in