Malakaus 6

Cov Tuabneeg Huv Naxalev Tsi Txais Yuav Yexus

(Mathais 13:53-58; Lukas 4:16-30)

1Yexus txawm tawm qhov ntawd rovqaab moog rua huv Nwg lub zog, Nwg cov thwjtim nrug Nwg moog hab. 2Nub Xanpataus Yexus pib qha huv tsev saablaaj. Cov tuabneeg coob-coob kws nov Yexus qha xaav tsi thoob le. Puab sisnug zumzawg has tas, “Nwg tau tej nuav qhovtwg lug? Lub tswvyim nuav yog leejtwg muab rua Nwg? Uacaag Nwg txhaj ua tau txujci tseemceeb nuav? 3Nwg puas yog tug kwsntoo, kws yog Malis tug tub, hab Nwg cov kwv puas yog Yakaunpaus, Yauxes, Yudas hab Ximoos? Puas yog Nwg cov muam tub nrug peb nyob ntawm nuav hab?” Cov tuabneeg ntawd txawm tsi leeg paub Yexus.

4Yexus has rua puab tas, “Tej tuabneeg ob caag puavleej fwm tug xwbfwb cev Vaajtswv lug, tsuas yog cov tuabneeg kws nyob huv nwg lub zog, nwg cov kwvtij, hab nwg tsev tuabneeg txhaj tsi fwm nwg xwb.” #Yauh 4:44

5Yexus tsi ua tej txujci tseemceeb rua qhov ntawd, Nwg tsuas yog tau tsaa teg rua sau qeeleej kuas zoo mob xwb. 6Yexus xaav tsi thoob, ruaqhov cov tuabneeg ntawd tsi muaj kev ntseeg.

Yexus Khaiv Kaum-Ob Tug Thwjtim Moog Qha Txuj Moo Zoo

(Mathais 10:5-15; Lukas 9:1-6)

Dlhau ntawd, Yexus moog qha rua ntau lub zejzog kws nyob ibncig ntawd. 7Yexus hu kaum-ob tug thwjtim lug uake hab Nwg xaa puab ib nkawg moog rua ib qho. Nwg pub fwjchim rua puab kuas kovyeej tej ntsujplig phem, 8hab Nwg has rua puab tas, “Mej tsi xob nqaa ib yaam dlaabtsi nrug mej moog, tsuas pub mej nqaa tug paas nreg xwb, tsi xob ntim mov, tsi xob khuam naab thoobpuab hab tsi xob nqaa nyaj rua ntawm dluav moog. 9Yuavtsum rau khau, tabsis tsi xob nqaa ib lub tsho moog ntxiv.” 10Yexus has ntxiv rua puab tas, “Yog yim twg zoosab txaistog mej moog huv nwg tsev, mej cale moog su huv yim ntawd moog txug nub kws mej tawm ntawm thaaj chaw ntawd moog. 11Yog mej moog txug huv lub zog twg kws tsi muaj tuabneeg txaistog mej, lossis tsi noog mej tej lug qha, tes thaus mej tawm moog, mej cale nchus tej moov aav kws lu mej kutaw povtseg, kws yog ua ib qhov timkhawv tawmtsaam puab!” #Lukas 10:4-11 #Tegnum 13:51

12Yogle ntawd, puab txhaj tawm moog qhuabqha kuas suavdlawg tso tej kev txhum tseg. 13Puab ntab tau ntau tug dlaab tawm hab muab roj pleev rua cov tuabneeg muaj mob hab khu puab zoo lawm. #Yakau 5:14

Yauhaas Tug Kws Muab Tuabneeg Ua Kevcai Rausdlej Kev Tuag

(Mathais 14:1-12; Lukas 9:7-9)

14Vaajntxwv Helauj#6:14: Vaajntxwv Helauj: Helauj Aatipas kws kaav lub xeev Kalilais. nov txug Yexus, ruaqhov Yexus lub moo nrov-nchaa moog thoobplawg txhua qhov chaw lawm. Muaj qeeleej has tas, “Yauhaas tug kws muab tuabneeg ua kevcai rausdlej tau sawv rovqaab lug lawm, vimle ntawd nwg txhaj muaj fwjchim ua tau tej txujci tseemceeb nuav!”

15Tabsis muaj qeeleej has tas, “Yexus yog Eliyas.” #Math 16:14; Malak 8:28; Lukas 9:19

Muaj qeeleej has tas, “Yexus yog ib tug xwbfwb cev Vaajtswv lug, ib yaam le cov xwbfwb cev Vaajtswv lug thaus u.”

16Thaus Helauj nov suavdlawg has le ntawd, nwg has tas, “Yeej yog Yauhaas tug kws muab tuabneeg ua kevcai rausdlej ntaag! Kuv tub muab Nwg txav cejdlaab lawm, tabsis nwgnuav nwg sawv rovqaab lug lawm!” 17Helauj tugkheej ntaag yog tug kws has kuas luas nteg Yauhaas khi hab coj moog kaw rua huv tsev lojcuj. Helauj ua le nuav tub yog vim Helaudias, kws nwg tau yuav lug ua nwg quaspuj, txawm yog Helaudias yog nwg tug kwv Filiv tug quaspuj los nwg tseem yuav hab. 18Vim Yauhaas pheej txeev ntuag Helauj has tas, “Koj tsi muaj cai yuav koj tug namntxawm lug ua koj tug quaspuj!” #Lukas 3:19-20

19Vimle ntawd Helaudias txhaj cibnyeej Yauhaas heev, hab xaav muab Yauhaas tua tabsis tua tsi tau, 20ruaqhov Helauj ntshai Yauhaas, vim Helauj paub tas Yauhaas yog ib tug tuabneeg ncaajnceeg hab dlawbhuv, nwg txhaj tsi pub leejtwg ua phem rua Yauhaas. Txawm yog txhua zag kws Helauj noog tej lug kws Yauhaas qha ntawd ua rua nwg nyuajsab los nwg nyam noog Yauhaas qha kawg le.

21Muaj ib nub yog nub zoo sijhawm rua Helaudias. Nub ntawd yog Helauj nub yug, nwg txawm ua tau ib rooj mov rua nwg cov numtswv, cov thawj tubrog hab cov tuabneeg tseemceeb huv lub xeev Kalilais tuaj noj. 22Helaudias tug ntxhais#6:22: Helaudias tug ntxhais; tej phoo ntawv qub kws xuas teg sau, muaj nwg tug ntxhais Helaudias. txawm lug seevcev rua suavdlawg saib, ua rua Helauj hab nwg cov qhua txaussab kawg le. Vaajntxwv Helauj txawm has rua tug ntxhais tas, “Koj xaav yuav dlaabtsi koj cale thov, kuv yuav muab yaam ntawd pub rua koj.” 23Helauj txawm coglug has tas, “Kuv coglug rua koj has tas koj thov yaam twg, kuv yuav muab yaam ntawd rua koj; txawm yuav yog ibnraab ntawm kuv lub tebchaws los kuv yeej kaam!”

24Tug ntxhais txawm tawm moog nug nwg nam has tas, “Kuv yuav thov dlaabtsi?”

Nwg nam teb tas, “Koj cale thov yuav Yauhaas tug kws muab tuabneeg ua kevcai rausdlej lub taubhau.”

25Taamsim ntawd tug ntxhais txawm rov lug cuag vaajntxwv hab has tas, “Kuv xaav kuas koj muab Yauhaas tug kws muab tuabneeg ua kevcai rausdlej lub taubhau tso rua huv lub phaaj nqaa lug rua kuv taamsim nuav!”

26Vaajntxwv nyuajsab kawg le, tabsis nwg hloov tsi tau lawm, vim nwg tau coglug taabmeeg suavdlawg lawm. 27Taamsim ntawd Helauj txawm khaiv kag ib tug tubrog moog nqaa kuas tau Yauhaas lub taubhau lug. Tes tug tubrog txawm moog rua tom tsev lojcuj hab txav Yauhaas cejdlaab; 28nwg muab Yauhaas lub taubhau tso rua huv ib lub phaaj nqaa lug rua tug ntxhais, tes tug ntxhais txawm muab rua nwg nam. 29Thaus Yauhaas cov thwjtim nov le ntawd, puab txhaj tuaj muab nwg lub cev coj moog log.

Yexus Pub Mov Rua 5,000 Leej Noj

(Mathais 14:13-21; Lukas 9:10-17; Yauhaas 6:1-14)

30Yexus cov timthawj rovqaab lug cuag Nwg, hab qha txhua yaam kws puab tau moog ua hab qha lawm rua Yexus noog. 31Muaj tuabneeg coob-coob pheej tuaj noog Yexus qha, paab taag paab tuaj, ua rua Yexus hab Nwg cov thwjtim tsi muaj sijhawm noj mov le. Yexus txhaj has rua cov thwjtim tas, “Ca peb moog rua tej qhov chaw kws nyob ntsagtu, mej txhaj tau su mivntsiv.” 32Yexus hab Nwg cov thwjtim txawm caij nkoj hlaa havtxwv moog rua ib qhov chaw kws nyob ntsagtu.

33Txawm le ntawd los muaj tuabneeg ntau leej pum puab sawvkev moog hab paub tas yog Yexus hab Nwg cov thwjtim. Puab txhaj dlha moog huv txhua lub zog moog, puab tseem xub uantej moog txug qhov chaw kws Yexus hab Nwg cov thwjtim yuav moog. 34Thaus Yexus tawm huv nkoj lug, Nwg pum cov tuabneeg coob-coob ntawd, ua rua Nwg hlub puab kawg le, ruaqhov puab zoole paab yaaj kws tsi muaj tug tswv yug. Yogle, Yexus txhaj pib qha ntau zaaj rua puab noog. #Teev 27:17; 1Vaaj 22:17; 2Xwm 18:16; Exek 34:5; Math 9:36 35Thaus yuav tsausntuj Yexus cov thwjtim lug has rua Nwg has tas, “Tub lig-lig lawm hab ntawm thaaj chaw nuav tsi muaj dlaabtsi le; 36yuav tau has kuas suavdlawg moog nrhav yuav mov tom tej zog kws nyob ibncig ntawm nuav rua puab noj.”

37Yexus teb cov thwjtim has tas, “Mej cale nrhav rua puab noj.”

Cov thwjtim nug Yexus has tas, “Koj xaav kuas peb siv 200 lub npib nyaj#6:37: npib nyaj: ib npib nyaj yog raug nqe ib yaam le ib tug tuabneeg kws ua zug ib nub (saib Math 20:2). Phoo Kilis sau has tas 200 denalis. moog yuav mov lug rua suavdlawg noj lov?”

38Yexus nug puab has tas, “Moog saib seb, mej muaj pistsawg lub ncuav?”

Thaus puab nrhav tau lawm, puab qha rua Yexus has tas, “Peb muaj tsib lub ncuav hab ob tug ntseg.”

39Yexus kuas cov thwjtim moog has rua cov tuabneeg coob-coob ntawd kuas nyob quastsawg ua tej paab tej pawg rua ntawm tej nyom. 40Cov tuabneeg ntawd txawm nyob quastsawg ua tej paab, qee paab muaj ibpuas leej, hab qee paab muaj tsibcaug leej. 41Tes Yexus txawm muab tsib lub ncuav hab ob tug ntseg lug, Nwg tsaa qhovmuag saib rua sau ntuj hab ua Vaajtswv tsaug. Nwg muab cov ncuav ndlais hab cev rua Nwg cov thwjtim nqaa moog faib rua suavdlawg. Nwg kuj muab ob tug ntseg faib rua puab hab. 42Txhua tug puavleej tau noj tsau huv tuabsi. 43Cov thwjtim moog sau tej ncuav hab tej ntseg kws suavdlawg noj tsi taag tau kaum-ob tawb puvnkaus. 44Cov kws tau noj mov ntawd, cov txivneej xwb yog muaj 5,000 leej.

Yexus Moog Sau Nplaimdlej

(Mathais 14:22-23; Yauhaas 6:15-21)

45Taamsim ntawd Yexus txawm has kuas cov tuabneeg suavdlawg rov moog tsev, hab has kuas Nwg cov thwjtim nce nkoj hab caij hlaa dlej havtxwv ua Nwg ntej moog rua tim lub nroog Npexaidas. 46Thaus cov tuabneeg moog taag lawm, Yexus nce moog thov Vaajtswv peg roob. 47Thaus tsausntuj cov thwjtim tub caij nkoj moog txug ibnraab dlej lawm, tabsis Yexus tseem nyob ib leeg peg roob. 48Yexus pum Nwg cov thwjtim nkuam nkoj moog nyuaj kawg le, vim muaj cua hlub lug ntaus lub nkoj. Kwvlaam le thaus peb teev moog rua rau teev yaav yuav kaajntug ntawd, Yexus txawm moog kutaw sau nplaimdlej lug cuag cov thwjtim. Zoole Nwg yuav hlaa dlhau puab moog,#6:48: yuav hlaa dlhau puab moog; lossis koom nrug puab. 49tabsis thaus puab pum Nwg moog kutaw sau nplaimdlej, puab xaav tas ntshe yog dlaab, puab txawm qw ntsoogqeeg. 50Thaus puab pum Nwg, puab ntshai kawg le.

Taamsim ntawd Yexus has rua puab tas, “Xob poobsab! Yog Kuv xwb, tsi xob ntshai.” 51Yexus txawm nce moog nrug cov thwjtim nyob huv lub nkoj, tes cua txawm tu zujzug lawm. Cov thwjtim yeej xaav tsi thoob le, 52puab yeej tseem tsi totaub lub ntsablug ntawm zaaj kws Yexus muab ncuav faib rua 5,000 leej noj; ruaqhov puab lub sab tawv heev.

Yexus Khu Mob Huv Nkenexales

(Mathais 14:34-36)

53Yexus hab Nwg cov thwjtim caij nkoj hlaa havtxwv moog txug tim Nkenexales, puab txawm muab lub nkoj khi rua ntawm ntug havtxwv. 54Thaus puab taabtom tawm huv lub nkoj lug, cov tuabneeg kws nyob ntawd paub tas yog Yexus. 55Tes puab txawm dlha moog qha rua tej tuabneeg kws nyob thoobplawg ib cheebtsaam ntawd. Thaus puab paub tas Nwg nyob qhovtwg lawm, puab txawm muab lev nqaa cov tuabneeg kws muaj mob tuaj cuag Nwg. 56Txhua qhov kws Yexus moog, tsi has huv tej zejzog, huv tej nroog lossis peg tej yaajsaab, pheej muaj tuabneeg coj cov kws muaj mob tuaj tso rua ntawm tej kab tej khw hab thov Nwg kuas ca cov tuabneeg muaj mob ntawd kov Nwg lub tw tsho. Txhua tug kws tau kov lawd puavleej zoo huv tuabsi.

Currently Selected:

Malakaus 6: HNJ2022

Highlight

Copy