Mathais 26

Cov Thawjcoj Nrhav Kev Nteg Yexus

(Malakaus 14:1-2; Lukas 22:1-2; Yauhaas 11:45-53)

1Thaus Yexus qha tej nuav rua puab taag lawm, Nwg has rua Nwg cov thwjtim has tas, 2“Mej tub paub lawm has tas, tshuav ob nub xwb tes txug lub caij ua kevcai Hlaa Dlhau, hab luas yuav muab Tuabneeg Leejtub coj moog ntsa rua sau ntoo khaublig.” #Tsiv 12:1-27

3Thaus ntawd, cov thawj povthawj hlub hab cov txwjlaug tuaj saablaaj uake huv Kaiyafas, kws yog tug Tuam Povthawj Hlub lub vaajloog, 4hab nrhav kev tuabywv yuav nteg Yexus coj moog tua. 5Puab has tas, “Peb tsi xob nteg rua thaus tseem taabtom ua kevcai, nyobtsaam tej pejxeem yuav ua kev kubntxhuv.”

Muab Roj Tswqaab Laub Rua Yexus Nyob Rua Lub Zog Npethanis

(Malakaus 14:3-9; Yauhaas 12:1-8)

6Thaus Yexus nyob huv lub zog Npethanis, Nwg su huv Ximoos tug kws thaus u mob ruas lub tsev. 7Thaus Yexus taabtom noj mov, muaj ib tug quaspuj nqaa ib lub fwj alanpaxataws kws ntim roj tswqaab kim heev tuaj laub rua Yexus taubhau. #Lukas 7:37-38 8Thaus cov thwjtim pum le ntawd, puab tsi txaussab hab has tas, “Uacaag nwg yuav muab cov roj tswqaab ntawd nkim povtseg? 9Yog muab fwj roj tswqaab ntawd coj moog muag ntshe yuav tau nyaj ntau coj moog pub rua cov tuabneeg pluag!”

10Yexus tub paub tej kws puab has ntawd lawm, Nwg txhaj has rua puab tas, “Mej ua rua tug quaspuj nuav ntxhuvsab ua dlaabtsi? Qhov kws nwg ua rua Kuv ntawd yog ib qhov zoo heev. 11Yeej yuav muaj cov tuabneeg pluag nrug mej nyob moog le, tabsis Kuv yuav tsi nrug mej nyob moog le. #2Kev 15:11 12Qhov kws tug quaspuj nuav laub roj tswqaab rua Kuv lub cev, tub yog nwg npaaj tu Kuv kuas txhij rua kev yuav muab Kuv log. 13Kuv qha tseeb rua mej has tas, txhua thaaj chaw huv qaabntuj nuav kws tuabneeg qha Txuj Moo Zoo moog txug, qhov kws tug quaspuj nuav tau ua yuav raug muab qha tawm kuas suavdlawg ncu txug nwg.”

Yudas Pumzoo Ntxeevsab Rua Yexus

(Malakaus 14:10-11; Lukas 22:3-6)

14Dlhau ntawd, ib tug ntawm kaum-ob tug thwjtim, tug kws hu ua Yudas Ixakali-us txawm moog cuag cov thawj povthawj hlub, 15hab nug has tas, “Yog kuv muab tau Yexus rua mej, mej yuav muab dlaabtsi rua kuv?” Puab txawm suav tau 30 npib nyaj rua nwg. #Xekhali 11:12 16Txij nub ntawd lug Yudas txawm nrhav sijhawm muab kuas tau Yexus rua puab.

Yexus Nrug Nwg Cov Thwjtim Noj Pluag Mov Ua Kevcai Hlaa Dlhau

(Malakaus 14:12-21; Lukas 22:7-13, 21-23; Yauhaas 13:21-30)

17Thawj nub kws ua kevcai Noj Ncuav Tsi Xyaw Keeb, cov thwjtim txawm lug cuag Yexus hab nug Nwg has tas, “Koj xaav kuas peb moog npaaj pluag mov ua kevcai Hlaa Dlhau rua Koj noj qhovtwg?”

18Yexus teb puab has tas, “Mej cale moog cuag ib tug txivneej kws nyob huv nroog hab has rua nwg tas, ‘Xwbfwb has tas, Kuv lub sijhawm lug ze lawm; Kuv hab Kuv cov thwjtim yuav lug ua kevcai Hlaa Dlhau huv koj tsev.’ ”

19Cov thwjtim txawm moog npaaj pluag mov ua kevcai Hlaa Dlhau lawvle Yexus has rua puab lawm.

20Thaus tsausntuj, Yexus hab kaum-ob tug thwjtim nyob quastsawg noj mov. 21Thaus puab taabtom noj mov, Yexus has tas, “Kuv qha tseeb rua mej has tas, mej cov ko muaj ib tug yuav ntxeevsab rua Kuv.”

22Thaus cov thwjtim nov le ntawd, puab nyuajsab heev, puab nyag taug nyag nug Yexus has tas, “Tug Tswv, Koj has le ko, puas yog kuv?”

23Yexus teb tas, “Tug kws nrug Kuv koom muab ncuav ntsw huv ib lub taig yog tug kws yuav ntxeevsab rua Kuv. #Nnkauj 41:9 24Tuabneeg Leejtub yeej yuav tuag lawvle Vaajtswv tej Lug sau has txug Nwg lawm, tabsis tug kws ntxeevsab rua Tuabneeg Leejtub, nwg yuav raug kev puamtsuaj luj heev! Yog nwg tsi xob yug lug kuj yuav zoo dlua!”

25Yudas tug kws ntxeevsab rua Yexus nug has tas, “Xwbfwb, Koj has le ko, puas yog Koj has kuv?”

Yexus teb tas, “Yog le koj has lawm.”

Tug Tswv Rooj Mov

(Malakaus 14:22-26; Lukas 22:14-20; 1 Kauleethaus 11:23-25)

26Thaus puab tseem taabtom noj mov, Yexus muab ib lub ncuav lug ua Vaajtswv tsaug, muab ndlais hab cev rua Nwg cov thwjtim, hab has tas, “Lub ncuav nuav yog Kuv lub cev, mej cale txais moog noj.”

27Tes Nwg muab ib khob cawv txivmaab lug ua Vaajtswv tsaug, Nwg muab cev rua puab, hab has tas, “Mej txhua tug cale txais moog haus. 28Nuav yog Kuv cov ntshaav, yog Vaajtswv lulug cogtseg, kws tau ndlwg lug rua ntau leej sub Vaajtswv txhaj zaam puab tej kev txhum. #Tsiv 24:8; Yelemi 31:31-34 29Kuv qha rua mej has tas, Kuv yuav tsi haus cov cawv txivmaab nuav ntxiv lawm, moog txug nub kws Kuv nrug mej haus cov cawv txivmaab tshab huv Kuv Txiv lub Tebchaws.”

30Tes puab hu ib zaaj nkauj qhuas Vaajtswv hab txawm tawm moog rua peg Roob Txiv Ntoo-Roj lawm.

Yexus Qha Uantej Txug Qhov Kws Petus Yuav Tsi Leeg Paub Nwg

(Malakaus 14:27-31; Lukas 22:31-34; Yauhaas 13:36-38)

31Yexus has rua cov thwjtim tas, “Mo nuav ntaag lau, mej txhua tug yuav tsiv taag hab tso Kuv tseg, ruaqhov Vaajtswv Txujlug sau ca has tas, ‘Vaajtswv yuav tua tug tswv yug yaaj, hab paab yaaj yuav tawg uasaab uasua moog.’ #Xekhali 13:7 32Tabsis tomqaab Kuv sawv huv qhovtuag rovqaab lug muaj txujsa lawm, Kuv yuav ua mej ntej moog rua peg Kalilais.” #Math 28:16

33Petus teb tas, “Txawm yog suavdlawg tso Koj tseg los kuv yuav tsi tso Koj tseg ib zag le!”

34Yexus has rua Petus tas, “Kuv qha tseeb rua koj has tas mo nuav uantej qab qua, koj yuav tsi leeg paub Kuv txug peb zag.”

35Petus teb tas, “Txawm yog kuv nrug Koj tuag uake los kuv yuav tsi has tas kuv tsi paub Koj ib zag le!”

Hab cov thwjtim txhua tug puavleej has ib yaam le ntawd.

Yexus Thov Vaajtswv Huv Lub Vaaj Khexemanes

(Malakaus 14:32-42; Lukas 22:39-46)

36Yexus nrug Nwg cov thwjtim moog rua ntawm ib qhov chaw kws hu ua Khexemanes, Nwg has rua puab tas, “Mej nyob ntawm nuav, Kuv yuav moog thov Vaajtswv lawm tod.” 37Nwg coj Petus hab Xenpedais ob tug tub nrug Nwg moog. Nwg nyuajsab hab nyaavsab kawg le. 38Nwg has rua puab tas, “Kuv nyuajsab tshuav tuag lawm xwb, mej cale nrug Kuv nyob ntawm nuav hab zuv tog.”

39Yexus moog tomntej mivntsiv, tes Nwg txawm txhuscaug ndlua rua huv aav hab thov Vaajtswv has tas, “Kuv Txiv, yog tas ua tau, thov Koj muab lub khob ab khob dlaw nuav tshem ntawm Kuv moog! Txawm lecaag los thov tsi xob ua lawvle Kuv lub sab nyam, tabsis ca ua lawvle Koj lub sab nyam xwb.”

40Thaus Yexus rovqaab lug, Nwg pum puab peb tug thwjtim tsaugzug taag lawm; Nwg has rua Petus tas, “Mej tub yoo tsi taug dlaabndlub nrug Kuv nyob ib nyuas txoogteev le lov? 41Mej yuavtsum ceevfaaj hab thov Vaajtswv paab, mej txhaj tsi poob rua kev simsab. Lub sab yeej txaussab hlo, tabsis lub cev qaugzug zig.”

42Yexus rov moog thov Vaajtswv dlua zag thib ob has tas, “Kuv Txiv, yog Koj tsi pumzoo muab lub khob ab khob dlaw nuav tshem ntawm Kuv moog, yuav ca Kuv haus xwb, tes ca ua lawvle Koj lub sab nyam.” 43Nwg rovqaab lug dlua hab pum cov thwjtim tsaugzug taag lawm; puab rua tsi taug qhovmuag le.

44Yexus rov moog thov Vaajtswv zag thib peb, Nwg has tuabyaam le qub. 45Tes Nwg rovqaab lug hab has rua cov thwjtim tas, “Mej tseem yuav tsaugzug hab su kuas txaus tsaiv lov? Mej saib seb, tub txug lub sijhawm kws Tuabneeg Leejtub raug luas nteg coj moog rua cov tuabneeg txhum txhais teg lawm. 46Cale sawv es peb moog. Mej saib maj, tug tuabneeg kws ntxeevsab rua Kuv tub tuaj txug nuav lawm!”

Yexus Raug Nteg

(Malakaus 14:43-50; Lukas 22:47-53; Yauhaas 18:3-12)

47Thaus Yexus tseem taabtom has le ntawd, tes Yudas kws yog ib tug ntawm kaum-ob tug thwjtim txawm tuaj txug. Muaj ib paab tuabneeg coob-coob nqaa ntaaj nqaa qws nrug nwg tuaj. Puab yog cov kws cov thawj povthawj hlub hab cov txwjlaug tso tuaj. 48Tug kws ntxeevsab ntawd tub xub qha rua cov tuabneeg ntawd lawm has tas, “Kuv nwj tug twg, tes yog tug ntawd ntaag; mej cale nteg Nwg!”

49Yudas txawm ncaajnraim moog rua ntawm Yexus hab has tas, “Nyobzoo Xwbfwb,” tes nwg txawm nwj kag Yexus.

50Yexus teb tas, “Phoojywg, koj yuav ua dlaabtsi tes cale ua nrawm nroog.”#26:50: Phoojywg, koj yuav ua dlaabtsi tes cale ua nrawm nroog; lossis Phoojywg, koj tuaj ua dlaabtsi ntawm nuav?

Puab txawm sau nthwv lug nteg Yexus hab tuav nwg ruaj-ruaj. 51Cov kws nrug Yexus nyob ntawd muaj ib tug txawm rhu hlo nwg raab ntaaj lug tuab ntaag rua tug Tuam Povthawj Hlub tug tubqhe ib saab nploojntseg tunrho. 52Yexus has rua nwg tas, “Cale muab koj raab ntaaj ntxig rov rua huv lub naab, ruaqhov txhua tug kws siv ntaaj yeej yuav tuag rua nav ntaaj. 53Koj tsi paub tas Kuv muaj peevxwm thov Kuv Txiv, hab Nwg yeej yuav khaiv cov tubrog timtswv coob dlua le kaum-ob pawg#26:53: Lulug “pawg” kws siv nuav yog has txug tsaav tuabneeg Loos le tej pawg tubrog. Lub sijhawm ntawd ib pawg tubrog twg yog muaj txug le 6,000 leej. lug paab kuv taamsim nuav nua lov? 54Tabsis yog ua le ntawd tes Vaajtswv tej Lug kws has tas yuavtsum muaj le nuav yuav ua lecaag tav tau?”

55Thaus ntawd, Yexus has rua puab tas, “Mej nqaa ntaaj nqaa qws tuaj nteg Kuv ib yaam le Kuv yog tubsaab nua lov? Kuv najnub nyobtsawg qha mej huv lub Tuamtsev, tabsis mej ho tsi nteg Kuv. #Lukas 19:47; 21:37 56Tabsis txhua yaam yeej yog yuav muaj le nuav, txhaj tav lawvle Vaajtswv tej Lug kws cov xwbfwb cev Vaajtswv lug tau sau tseg lawm.”

Tes cov thwjtim txawm tsiv taag moog lawm tso Yexus tseg.

Cov Numtswv Taug Yexus Zaaj

(Malakaus 14:53-65; Lukas 22:54-55, 63-71; Yauhaas 18:13-14, 19-24)

57Cov tuabneeg kws nteg Yexus txawm coj Yexus moog rua tom tug Tuam Povthawj Hlub Kaiyafas lub tsev, kws cov xwbfwb qha Kevcai hab cov txwjlaug tau tuaj txoos uake saablaaj. 58Petus lawv Yexus qaab nrug dleb tsawv moog txug ntawm lub tshaavloog ntawm tug Tuam Povthawj Hlub lub tsev. Nwg txawm nkaag moog nrug cov faajxwm nyob uake ntawm tshaavloog, tog saib seb luas yuav ua lecaag rua Yexus. 59Cov thawj povthawj hlub hab taagnrho cov thawjcoj huv Koomhum qebsab txawm nrhav qeeyaam puavpheej tsi tseeb lug nkaug Yexus, sub puab txhaj tau cai muab Yexus tua. 60Txawm yog muaj ntau leej sawv lug ua timkhawv dlaag los puab yeej nrhav tsi tau ib qhov puavpheej lug nkaug Yexus le. Thaus kawg muaj ob tug txivneej 61txawm sawv lug hab has tas, “Tug txivneej nuav tau has tas, ‘Kuv muaj peevxwm muab Vaajtswv lub Tuamtsev rhuav povtseg hab peb nub tomqaab ntawd, Kuv yuav rov ua kuas tau dlua tshab.’ ” #Yauh 2:19

62Tug Tuam Povthawj Hlub txawm sawvtseeg hab nug Yexus has tas, “Obtug kom Koj le ntawd, Koj tsi muaj lug teb le lov?” 63Tabsis Yexus ua tuabywv xwb. Tug Tuam Povthawj Hlub rov has rua Yexus has tas, “Ntawm Vaajtswv tug kws muaj sa nyob lub npe, Koj qha tseeb-tseeb rua kuv seb Koj puas yog tug Mexiyas kws yog Vaajtswv Tug Tub.”

64Yexus teb tas, “Yog le koj has lawm. Tabsis Kuv has rua mej suavdlawg tas, txij nuav moog mej yuav pum Tuabneeg Leejtub nyob ntawm Vaajtswv tug kws muaj Fwjchim Luj Kawg Nkaus saab xis, hab nrug fuab nrug cua lug sau ntuj lug!” #Dani 7:13

65Tes tug Tuam Povthawj Hlub txawm dlua rhe nwg lub tsho hab has tas, “Nwg haslug saib tsi taug Vaajtswv! Tsi taag peb yuav moog nrhav timkhawv ntxiv! Mej tub nov Nwg tej lug thuam Vaajtswv ntawd lawm! 66Mej xaav lecaag?” #Levi 24:16

Puab teb tas, “Nwg ua txhum lawm, tsimnyog Nwg yuavtsum tuag.”

67Puab txawm ntu quavncaug rua Yexus ntsejmuag hab ntaus Nwg; qeeleej xuas tawgncuav rua Nwg #Yaxaya 50:6 68hab has tas, “Tug Mexiyas, Koj sim qha rua peb seb, leejtwg ntaus Koj!”

Petus Tsi Leeg Paub Yexus

(Malakaus 14:66-72; Lukas 22:56-62; Yauhaas 18:15-18, 25-27)

69Thaus Petus tseem nyob quastsawg nrauzoov ntawm lub tshaavloog, muaj ib tug ntxhais qhev txawm tuaj has rua nwg has tas, “Koj yog ib tug kws txeev nrug Yexus tug kws yog tuabneeg Kalilais uake los sav!”

70Tabsis Petus tsi leeg taabmeeg puab suavdlawg; nwg has tas, “Kuv tsi paub txug tej kws koj has ko.” 71Tes nwg txawm moog rua tom roojvaag lawm. Muaj dlua ib tug ntxhais qhev pum Petus, hab nwg has rua cov tuabneeg kws nyob ntawd tas, “Tug nuav yeej txeev nrug Yexus tug kws yog tuabneeg Naxalev uake.”

72Petus rov tsi leeg dlua hab nwg txawm twv ntxhas has tas, “Kuv tsi paub tug txivneej ntawd!”

73Tomqaab ntawd mivntsiv xwb, cov tuabneeg kws sawv ntawd txawm lug has rua Petus has tas, “Koj yeej los yog puab cov ib tug xwb, ruaqhov noog koj lub suab haslug xwb tes paub lawm!”

74Petus txawm twv has tas, “Kuv twv lub ntuj has tas kuv has qhov tseeb xwb! Yog kuv dlaag, thov Vaajtswv rautxim rua kuv! Kuv tsi paub tug txivneej ntawd!”

Taamsim ntawd qab txawm qua, 75tes Petus txawm ncudlheev txug tej lug kws Yexus has rua Petus has tas, “Uantej qab tsi tau qua, koj yuav tsi leeg paub Kuv txug peb zag.” Petus txawm tawm moog rua saabnrau hab quaj tusab kawg le.

Currently Selected:

Mathais 26: HNJ2022

Highlight

Copy