Mathais 24

Yexus Has Txug Lub Tuamtsev Yuav Puamtsuaj

(Malakaus 13:1-2; Lukas 21:5-6)

1Thaus Yexus taabtom tawm ntawm lub Tuamtsev moog, Nwg cov thwjtim txawm lug cuag Nwg hab taw teg kuas Yexus saib tej tsev kws nyob ibncig ntawm lub Tuamtsev. 2Yexus has tas, “Yog kawg, mej tub pum taagnrho tej tsev nuav lawm. Tabsis Kuv qha tseeb rua mej has tas, tej txhibzeb kws luas muab tib ib lub tshooj ib lub ntawd, txhua lub yuav pluam nyag nyob nyag taag huv tuabsi.”

Kev Txomnyem Hab Kev Tsimtxom

(Malakaus 13:3-13; Lukas 21:7-19)

3Thaus Yexus nyob peg lub Roob Txiv Ntoo-Roj, Nwg cov thwjtim lug cuag Nwg tuabywv hab nug has tas, “Koj qha rua peb seb thaus twg maamle muaj tej nuav? Hab yuav muaj dlaabtsi tshwm lug qha rua peb paub tas tub yuav txug lub sijhawm kws Koj rov lug hab lub nplajteb kawg?”

4Yexus teb tas, “Mej yuavtsum ceevfaaj, tsi xob ca leejtwg ntxag tau mej yuamkev. 5Yuav muaj ntau leej tuaj ntawm Kuv lub npe tuaj has rua mej tas, ‘Kuv yog tug Mexiyas!’ Hab puab yuav ntxag ntau leej yuamkev. 6Mej yuav nov kev tsuv kev rog nyob ze mej hab nov moo txug tej tebchaws kws nyob dleb mej uatsuv uarog, tabsis mej tsi xob poobsab. Yeej yuav muaj tej ntawd, tabsis tsi tau txhais has tas tub txug lub sijhawm kawg lawm. 7Ib lub tebchaws yuav sawv tawmtsaam ib lub tebchaws, hab ib tsaav tuabneeg yuav sawv tawmtsaam ib tsaav tuabneeg. Yuav muaj kev tshaib kev nqhes hab aav yuav qeeg nyob rua txhua qhov. 8Txhua yaam nuav zoo ib yaam le tug quaspuj kws nyavnyuas pib mob plaab yuav yug mivnyuas xwb.

9“Thaus ntawd yuav muaj tuabneeg nteg mej, coj mej moog tsimtxom hab muab mej tua. Txhua tsaav tuabneeg yuav ntxub mej, vim mej yog cov kws ntseeg Kuv. #Math 10:22 10Lub sijhawm ntawd yuav muaj ntau leej tso puab txuj kev ntseeg tseg; ib leeg yuav ntxeevsab rua ib leeg hab ib leeg yuav ntxub ib leeg. 11Yuav muaj cov xwbfwb cevlug cuav coob leej ntxag ntau leej yuamkev. 12Vim tej kev phem kev qas nuav nthuav luj heev tuaj, ntau tug tuabneeg txuj kev hlub yuav txag zujzug moog. 13Tabsis tug kws ua sabntev tiv taug moog txug thaus kawg, tug ntawd yuav dlim. #Math 10:22 14Thaus txuj Xuv Zoo kws has txug Vaajtswv lub Ntuj Ceebtsheej nuav raug qha moog thoob qaabntuj kws yog ua timkhawv rua txhua tsaav tuabneeg paub lawm, tes lub sijhawm kawg maamle lug txug.

Yaam Phem Kawg Nkaus

(Malakaus 13:14-23; Lukas 21:20-24)

15“Mej yuav pum yaam kws Daniyees, kws yog tug xwbfwb cev Vaajtswv lug tau has tas ‘Yaam phem kawg nkaus’ yuav sawv huv qhov chaw dlawbhuv.” (Tug kws nyeem qhov nuav, nwg yuavtsum totaub has tas lub ntsablug nuav yog txhais lecaag!) #Dani 9:27; 11:31; 12:11 16“Thaus ntawd cov tuabneeg kws nyob huv xeev Yudas yuavtsum tsiv moog rua peg tej roob. 17Tug kws nyob sau ruvtsev, txheej tsev laagtshaav, tsi xob nqeg moog nqaa ib yaam dlaabtsi huv tsev tawm. #Lukas 17:31 18Tug kws nyob tom teb, tsi xob rov lug nqaa nwg lub tsho ntev.

19“Lub sijhawm ntawd tej quaspuj kws suab mivnyuas hab tej quaspuj kws muaj mivnyuas mog noj mig yuav txomnyem kawg nkaus le! 20Thov Vaajtswv paab kuas mej tsi xob tau tsiv rua lub caij ntuj no lossis nub Xanpataus! 21Ruaqhov lub sijhawm ntawd yuav txomnyem kawg nkaus, txij thaus tsim ntuj tsim teb lug txug najnub nua, yeej tsi tau muaj kev txomnyem kws yuav heev npaum le zag nuav, hab yaav tomntej los yuav tsi muaj le zag nuav lawm. #Dani 12:1; Tshwm 7:14 22Tabsis Vaajtswv tub txav noobnyoog ntawm lub sijhawm ntawd kuas tuablu lawm. Yog Nwg tsi ua le ntawd yeej yuav tsi muaj leejtwg dlim le. Qhov kws Vaajtswv txav noobnyoog kuas tuablu le ntawd, tub yog vim Nwg hlub Nwg tsaav tuabneeg kws Nwg tau xaiv ca lawm.

23“Thaus ntawd yog leejtwg has rua mej has tas, ‘Mej saib seb, tug Mexiyas nyob ntawm nuav!’ Lossis has tas, ‘Nwg nyob tod!’ Mej tsi xob ntseeg tej ntawd. 24Ruaqhov yuav muaj tej Mexiyas cuav hab tej xwbfwb cevlug cuav tshwm tuaj. Puab yuav lug ua tej txujci tseemceeb ntxag Vaajtswv tsaav tuabneeg kws Nwg tub xaiv lawm, seb puab puas yuamkev tau. 25Mej yuavtsum ncuntsoov tej lug kws Kuv tub qha uantej rua mej nuav lawm.

26“Yog leejtwg has rua mej has tas, ‘Mej saib seb, Nwg nyob tom roob mojsaab qhua!’ Mej tsi xob moog rua tod; lossis has tas, ‘Mej saib seb, Nwg nkaum ntawm nuav!’ Mej tsi xob ntseeg tej ntawd. #Lukas 17:23-24 27Ruaqhov Tuabneeg Leejtub yuav lug zoo ib yaam le tsagligxub laim tim saab nubtuaj ci moog txug rua tim saab nubpoob.

28“Lub cev tuag nyob qhovtwg, tes dlaav lwjhau yuav sau nthwv moog rua qhov ntawd. #Lukas 17:37

Tuabneeg Leejtub Yuav Lug

(Malakaus 13:24-27; Lukas 21:25-28)

29“Tomqaab tej kev txomnyem ntawd dlhau kag xwb, lub nub yuav tsaus, lub hli yuav tsi ci, tej nubqub sau ntuj yuav poob lug, hab tej kws muaj fwjchim nyob sau nruabntug yuav uazug koog huv tuabsi. #Yaxaya 13:10; Yau 2:10, 31; 3:15; Tshwm 6:12; Yaxaya 13:10; Exek 32:7; Yau 2:10; 3:15; Yaxaya 34:4; Tshwm 6:13 30Thaus ntawd Tuabneeg Leejtub lub cim yuav tshwm sau nruabntug; hab txhua tsaav tuabneeg huv qaabntuj nuav yuav quaj-nyav ntsoogqeeg thaus puab pum Tuabneeg Leejtub lug sau cov fuab nrug Nwg lub fwjchim hab tug tshwjchim kws ci ntsaa-ab lug. #Dani 7:13; Xekhali 12:10-14; Tshwm 1:7 31Thaus lub suab raajxyu nrov, Nwg yuav khaiv Nwg cov timtswv ceebtsheej moog txhuanrho plaub cegkaum ntuj, puab yuav moog qaws cov tuabneeg kws Nwg tub xaiv ca lawm, taagnrho qaabntuj kawg moog txug rua hauvntuj kawg, lug nyob uake.

Kawm Lug Ntawm Tsob Txiv Ncuavpas

(Malakaus 13:28-31; Lukas 21:29-33)

32“Mej cale kawm lug ntawm tsob txiv ncuavpas. Thaus nwg tej ceg rov tawg kaug ntsuab hab chiv hlaav nplooj mognyoos tuaj, mej paub tas tub yuav txug lub caij ntuj kub. 33Ib yaam nkaus le ntawd, thaus mej pum txhua yaam ntawd, mej yuav paub tas lub sijhawm tub lug yuav txug, tub nyob ntawm qhovrooj lawm.#24:33: lub sijhawm tub lug yuav txug, tub nyob ntawm qhovrooj lawm; lossis Nwg tub yuav lug sai-sai nuav, Nwg tub npaaj txhij yuav lug lawm. 34Ncuntsoov tas txhua yaam nuav yuav tshwmsim lug uantej cov tuabneeg tam nuav tuag taag. 35Lub ntuj hab lub nplajteb yuav pluj moog, tabsis Kuv tej lug qha yuav tsi pluj hlo le.

Tsi Muaj Leejtwg Paub Nub Hab Sijhawm

(Malakaus 13:32-37; Lukas 17:26-30, 34-36)

36“Tsi muaj leejtwg paub tas yog nub ntawd lossis lub sijhawm ntawd, txawm yog cov timtswv ceebtsheej lossis Leejtub#24:36: Tej phoo ntawv qub kws xuas teg sau tsi muaj lossis Leejtub. los yeej tsi paub; tsuas yog Leejtxiv tuableeg txhaj paub xwb.

37“Lub sijhawm kws Tuabneeg Leejtub lug, yuav zoo ib yaam le tej kws tshwmsim rua tam Nau-as nyob. #Chiv 6:5-8 38Thaus dlej tseem tsi tau nyaab nplajteb, suavdlawg noj hab haus, ua tshoob ua kug moog txug ncua nub kws Nau-as nce moog rua huv nkoj; 39tabsis puab tsi paub tas yuav muaj dlaabtsi tshwmsim lug, moog txug thaus kws dlej tub lug nyaab hab kuav puab moog taag huv tuabsi. Thaus Tuabneeg Leejtub lug, yuav zoo ib yaam le ntawd. #Chiv 7:6-24

40“Lub sijhawm ntawd muaj ob tug txivneej taabtom ua num uake tom teb los yuav coj ib tug moog, yuav tseg ib tug ca. 41Muaj ob tug quaspuj taabtom zumzeb uake los yuav coj ib tug moog, yuav tseg ib tug ca. 42Yogle ntawd, mej yuavtsum ceevfaaj zuv tog, ruaqhov mej tsi paub tas nub twg mej tug Tswv yuav lug. 43Kuas mej ncuntsoov tas yog tug tswvtsev xub paub tas thaus twg tubsaab yuav tuaj, nwg yeej yuav zuv tog tsi pub kuas tubsaab tsoo hab nkaag tau lug rua huv nwg tsev. #Lukas 12:39-40 44Yogle ntawd, mej los yuavtsum npaaj kuas txhij, ruaqhov Tuabneeg Leejtub yuav lug lub sijhawm kws mej tsi ncu ceevfaaj txug Nwg.

Tug Tubkhai Kws Ncaajnceeg Lossis Tug Kws Tsi Ncaajnceeg

(Lukas 12:41-48)

45“Yogle ntawd, leejtwg txhaj yog tug tubkhai kws ncaajnceeg hab ntse? Nwg yog tug kws tug tswv muab tsaa ua tug luj saib tug tswv cov tubkhai, hab ua tug faib zaub faib mov rua puab noj lawvle lub sijhawm. 46Thaus tug tswv rov lug tsev hab pum tug tubkhai ntawd taabtom ua tej num nuav, tes tug tubkhai ntawd yuav tau txais txuj kev kaajsab! 47Kuv qha tseeb rua mej has tas, tug tswv yuav tsaa tug tubkhai ntawd ua tug saib txhua yaam kws yog tug tswv le. 48Tabsis yog nwg yog ib tug tubkhai kws sabphem hab xaav tas tseem tshuav ntev nwg tug tswv maam rov lug, 49tes nwg txawm pib muab nwg cov tubkhai ntawd ntaus hab moog nrug cov tuabneeg quavcawv nojhaus uake. 50Muaj ib nub, thaus tug tubkhai ntawd tsi ceevfaaj hab tsi paub txug, tes tug tswv yuav rov lug lub sijhawm ntawd ntaag. 51Tug tswv yuav muab nwg hlais ua tej dlwb dlaig#24:51: muab nwg hlais ua tej dlwb dlaig; lossis muab nwg pov rua saabnrau. hab muab nwg moog nrug cov tuabneeg kws ntsejmuag ncaaj sabnkhaus nyob. Nwg yuav quaj qw qes nav qawv qhov ntawd.

Currently Selected:

Mathais 24: HNJ2022

Highlight

Copy