Mathais 18

Leejtwg Yog Tug Luj Dlua Ndlais?

(Malakaus 9:33-37; Lukas 9:46-48)

1Lub sijhawm ntawd cov thwjtim lug cuag Yexus hab nug has tas, “Leejtwg yog tug luj dlua ndlais huv Vaajtswv lub Ntuj Ceebtsheej?” #Lukas 22:24

2Yexus hu ib tug mivnyuas yau lug sawv ntawm puab xubndlag 3hab has tas, “Kuv qha tseeb rua mej has tas, yog mej tsi hloov hab tsi coj zoole tej mivnyuas yau nuav, tes mej yeej yuav moog tsi tau rua Vaajtswv lub Ntuj Ceebtsheej hlo le. #Malak 10:15; Lukas 18:17 4Tug kws luj dlua ndlais huv Vaajtswv lub Ntuj Ceebtsheej yog tug kws txu fwjchim le tug mivnyuas yau nuav. 5Tug kws txais yuav tug mivnyuas yau nuav huv Kuv lub npe, yog nwg txais yuav Kuv.

Yaam Kws Ntxag Tuabneeg Ua Kev Txhum

(Malakaus 9:42-48; Lukas 17:1-2)

6“Yog leejtwg ua rua cov mivnyuas kws ntseeg Kuv nuav ib tug ua txhum, cale muab hlua khi ib txhibzeb kws luj dlai rua nwg cejdlaab hab muab pov rua huv havtxwv kuj zoo dlua. 7Lub nplajteb nuav yuav raug puamtsuaj, ruaqhov pheej muaj tej yaam kws ua rua tuabneeg ua txhum! Tej yaam ntawd yeej yuav tshwmsim lug, tabsis tug kws xeeb lub keeb ntawd yuav raug kev puamtsuaj!

8“Yog koj txhais teg lossis txhais kutaw ua rua koj ua txhum, cale muab txav povtseg! Koj muaj ib saab teg lossis ib saab taw xwb tabsis koj tau txujsa, yuav zoo dlua le koj muaj ob saab teg lossis ob saab taw, tabsis koj raug muab pov rua huv cubtawg kws cig tsi paub tuag moog ibtxhis le. #Math 5:30 9Hab yog koj ib saab qhovmuag ua rua koj ua txhum, cale muab saab qhovmuag ntawd kaus povtseg! Koj muaj ib saab qhovmuag xwb tabsis koj tau txujsa, yuav zoo dlua le koj muaj ob saab qhovmuag, tabsis raug muab pov rua huv ntujtawg. #Math 5:29

Zaaj Lug Pevtxwv Has Txug Tug Yaaj Kws Pluj Lawm

(Lukas 15:3-7)

10“Mej yuavtsum ceevfaaj, tsi xob saib tsi taug cov mivnyuas nuav ib tug twg. Kuv qha rua mej has tas, puab cov timtswv ceebtsheej nyob rawv ntawm Kuv Txiv lub xubndlag sau ntuj ceebtsheej. 11#18:11: Tej phoo ntawv qub kws xuas teg sau ntxiv nqai 11 nuav rua: Tuabneeg Leejtub yeej lug cawm cov kws pluj lawm (saib Lukas 19:10). #Lukas 19:10

12“Mej xaav lecaag? Yog muaj ib tug txivneej kws nwg muaj ibpuas tug yaaj, yog ib tug pluj lawm, nwg puas yuav tso cuajcaum-cuaj tug rua sau roob hab moog nrhav tug kws pluj lawm? 13Kuv qha rua mej has tas, thaus nwg nrhav tau lawm, nwg tseem zoosab rua tug yaaj kws pluj ntawd heev dlua le nwg zoosab rua cuajcaum-cuaj tug kws tsi pluj. 14Ib yaam nkaus le ntawd, mej#18:14: mej; tej phoo ntawv qub kws xuas teg sau, muaj Kuv. Leejtxiv kws nyob sau ntuj ceebtsheej yeej tsi xaav kuas cov mivnyuas nuav ib tug pluj le.

Thaus Ib Tug Ua Txhum

15“Yog koj ib tug kwvtij ua txhum rua koj,#18:15: Tej phoo ntawv qub kws xuas teg sau tsi muaj rua koj. koj cale moog hab qha nwg qhov txhum rua nwg tuabywv ntawm meb ob leeg xwb. Yog nwg noog koj has, tes koj kuj rov tau kwvtij. #Lukas 17:3 16Tabsis yog nwg tsi noog koj has, tes koj yuav tau coj ib lossis ob tug nrug koj moog, sub ‘tej lug siskom txhaj muaj ob-peb leeg ua timkhawv.’ #2Kev 19:15 17Yog nwg tsi kaam noog puab has, tes mej cale coj yaam ntawd moog qha rua pawg ntseeg. Thaus kawg, yog nwg tseem tsi kaam noog pawg ntseeg has hab, tes mej cale suav has tas nwg zoole ib tug kws tsi paub Vaajtswv lossis ib tug tuabneeg sau se.

Txwv Hab Tsocai

18“Kuv qha tseeb rua mej has tas, yaam twg kws mej txwv huv nplajteb nuav, yaam ntawd yuav raug txwv sau ntuj ceebtsheej; yaam twg kws mej tsocai huv nplajteb nuav, yaam ntawd yuav raug tsocai sau ntuj ceebtsheej. #Math 16:19; Yauh 20:23

19“Kuv qha rua mej ntxiv has tas, yog muaj ob leeg kws nyob huv nplajteb nuav pumzoo thov Vaajtswv rua ib yaam dlaabtsi, Kuv Txiv kws nyob sau ntuj ceebtsheej yuav pub yaam ntawd rua obtug. 20Yog muaj ob lossis peb leeg tuaj nyob uake ntawm Kuv lub npe rua qhovtwg, Kuv yuav nrug puab nyob qhov ntawd.”

Zaaj Lug Pevtxwv Has Txug Tug Tubkhai Kws Tsi Zaamtxim

21Thaus ntawd Petus lug nug Yexus has tas, “Tug Tswv, yog kuv ib tug kwvtij pheej ua txhum rua kuv, kuv yuav zaamtxim rua nwg pistsawg zag? Zaam xyaa zag lov?” #Lukas 17:3-4

22Yexus teb tas, “Tsi yog xyaa zag xwb, tabsis yog xyaacaum zag xyaa;#18:22: xyaacaum zag xyaa; lossis xyaacaum-xyaa zag. #Chiv 4:24 23ruaqhov Vaajtswv lub Ntuj Ceebtsheej pev ib yaam le ib tug vaajntxwv kws moog txheeb nwg cov tubkhai tej ntawv saib seb puas muaj leejtwg tshuav nwg nqe. 24Thaus nwg nyavnyuas pib txheeb, txawm muaj tuabneeg coj ib tug tubkhai kws tshuav vaajntxwv nqe 10,000 taslaas#18:24: 1 taslaas yog raug nqe le ntawm 6,000 denalis. 1 denalis yog raug nqe le ib tug tuabneeg moog khwv ib nub. 10,000 taslaas dlag mas raug nqe ntau heev. lug cuag nwg. 25Tug tubkhai ntawd tsi muaj nyaj them, tes vaajntxwv txawm has kuas cale muab nwg hab nwg quaspuj mivnyuas hab txhua yaam kws nwg muaj coj moog muag kuas tau nyaj lug them nwg tej nujnqes. 26Tug tubkhai ntawd txawm txhuscaug ndlua ntawm vaajntxwv kutaw thov has tas, ‘Thov koj ua sabntev rua kuv, kuv maamle them rov rua koj huv tuabsi!’ 27Vaajntxwv hlub tug tubkhai ntawd, tes vaajntxwv txawm zaam tej nqe huv tuabsi rua nwg hab tso nwg moog.

28“Thaus tug tubkhai ntawd tawm moog, nwg txawm moog ntsib ib tug kws yog nwg ib paab tubkhai. Tug ntawd tshuav nwg nqe le ntawm 100 denalis xwb. Nwg txawm ntsab nkaus tug ntawd nyem cejdlaab hab has tas, ‘Koj cale them kuv tej nqe lug rua kuv!’ 29Tug ntawd txhuscaug ndlua thov nwg has tas, ‘Thov koj ua sabntev rua kuv, kuv maamle nrhav lug them rua koj!’ 30Tabsis tug tubkhai ntawd tsi yib le, nwg txawm coj tug ntawd moog kaw rua huv tsev lojcuj moog txug nub kws tug ntawd them nqe taag.

31“Thaus nwg tuab paab tubkhai pum nwg ua le ntawd, puab chim heev, puab txhaj moog qha txhua yaam rua vaajntxwv. 32Yogle ntawd, vaajntxwv txhaj hu tug tubkhai ntawd lug cuag nwg hab has tas, ‘Tug nam tubqhe kws phem! Kuv zaam koj tej nujnqes kws koj tshuav kuv huv tuabsi, vim koj thov kuv. 33Kuv tub taabncuab koj lug lawm, tsimnyog koj yuavtsum taabncuab tug tubkhai kws yog koj ib paab ntawd hab!’ 34Vaajntxwv chim heev, nwg txhaj kuas puab muab tug tubkhai ntawd coj moog kaw rua huv tsev lojcuj moog txug nub kws nwg them nqe taag.”

35Yexus xaus lug has tas, “Yog mej ib leeg tsi zaamtxim rua ib leeg kws yog tawm huv lub sab tuaj tag-tag, kuv Txiv kws nyob sau ntuj ceebtsheej yuav ua tuabyaam nkaus le ntawd rua mej hab.”

Currently Selected:

Mathais 18: HNJ2022

Highlight

Copy