Malakis 3
3
1Tug TSWV kws muaj Fwjchim Luj kawg nkaus teb has tas, “Kuv yuav khaiv kuv ib tug tubkhai ua ntej moog khu kev tog kuv. Thaus ntawd tug TSWV kws mej naj nub tog yuav lug rua huv nwg lub Tuamtsev. Tug tubkhai kws mej xaav pum lug ntev lawm, yuav lug hab tshaajtawm kuv tej lug cog tseg.”#Mat 11.10; Mak 1.2; Luk 1.76; 7.27
2Tabsis nub kws nwg lug, leejtwg yuav muaj cuabkaav fim taug nwg? Thaus nwg tshwm plawg lug, leejtwg tseem yuav muaj sa nyob? Nwg yuav zoo ib yaam le cov tshuaj kws zawv khaub dluag dlawb paug, hab zoo ib yaam le cov nplaim tawg kws cig huv lub yeejvub nchuav hlau.#Yau 2.11; Tsm 6.17 3Nwg yuav lug txav txim ib yaam le tug tuabneeg nchuav nyaj, nwg muab nyaj nchuav kuas tau cov tseem nyaj. Tug TSWV tug tubkhai yuav lug muab cov povthawj ntxuav kuas dlawbhuv ib yaam le tej nyaj tej kub kws tug nchuav nyaj tub muab nchuav tau lawm, yog le ntawd, puab txhaj yuav coj tej khoom kws hum tug TSWV sab tuaj fij rua nwg. 4Yog le ntawd, tej khoom kws cov Yudas hab cov tuabneeg huv Yeluxalees coj tuaj fij rua tug TSWV txhaj yuav txaus nwg sab ib yaam le thaus u puab ibtxwm ua lug lawm.
5Tug TSWV kws muaj Fwjchim Luj kawg nkaus has tas, “Kuv yuav lug saib mej hab txav txim rua suavdlawg, hab kuv yuav nthuav suavdlawg tej kev txhum, tsi has cov tuabneeg kws txawj ua yeegsiv, cov tuabneeg kws ntxag luas quaspuj luas quasyawg, cov tuabneeg kws ua timkhawv tsi tseeb, cov tuabneeg kws dlaag nwg tej tub zug tej nyaj yuav, hab cov tuabneeg kws txhaav cov puj ntsuag, tej mivnyuas ntsuag, hab cov tuabneeg txawv tebchaws tug noj, hab txhua tug kws tsi fwm kuv.”
Muab Ib Feem Kaum
6“Kuv yog tug TSWV, kuv yeej tsi hloov le; yog le ntawd, mej cov kws yog Yakhauj cov xeebntxwv tseem tsi tau tu noob. 7Mej zoo ib yaam le mej cov yawmkoob kws nyob ua ntej mej lawm hab ntaag. Mej tau tso kuv tej kevcai tseg hab tsi ua lawv le tej kevcai ntawd. Mej ca le tig rov lug cuag kuv, kuv txhaj yuav tig lug cuag mej. Tabsis mej nug has tas, ‘Peb yuav ua le caag txhaj tig tau rov lug cuag koj?’ 8Kuv nug mej has tas, puas tsimnyog ib tug tuabneeg twg qee Vaajtswv tug? Yeej tsi tsimnyog, tabsis mej pheej qee kuv tug. Mej nug has tas, ‘Peb qee koj dlaabtsi?’ Tub yog mej tsi muab ib feem kaum hab tej khoom fij rua kuv. 9Kuv tub foom phem rua mej txhua tug lawm, rua qhov taagnrho mej tsaav tuabneeg puavleej qee kuv tug. 10Mej yuavtsum nqaa tej kws mej muaj ib feem kaum tuaj tso rua huv lub Tuamtsev, txhaj le muaj noj muaj haus nplua mag nyob rua huv. Mej sim ua lawv le kuv has saib, mej yeej yuav pum kuv qheb rooj ntug nchuav koob moov ntau nplua mag lug rua mej.#Lek 27.30; Tnp 18.21-24; 2 Kev 12.6; 14.22-29; Neh 13.12 11Kuv yuav tsi pub kaab hab kooj noj mej tej qoobloo, hab mej tej txiv maab yuav txi txiv ncw. 12Thaus ntawd txhua tsaav tuabneeg yuav hu mej ua cov tuabneeg kws tau koob moov, rua qhov mej lub tebchaws yog lub kws tau zoo noj tau zoo nyob.”
Vaajtswv Coglug Hlub Nwg Tsaav Tuabneeg
13Tug TSWV has tas, “Mej has lug phem kawg nkaus thuam kuv, tabsis mej tseem nug has tas, ‘Peb has lug phem le caag thuam koj?’ 14Mej has tas, ‘Qhov kws peb tu Vaajtswv ntawd yeej tsi muaj nqes dlaabtsi le. Yog peb ua lawv le tug TSWV kws muaj Fwjchim Luj kawg nkaus has lossis leeg tej kev txhum kws peb ua taag lug lawm rua nwg huv tuabsi, puas yuav muaj qaabhau dlaabtsi rua peb hab? 15Peb ibtxwm pum cov tuabneeg khaavtheeb yog cov kws tau koob moov; cov tuabneeg ua phem tsi yog muaj kev vaammeej xwb, tabsis puab tseem txhobtxwm ua txhum sim Vaajtswv sab los Vaajtswv yeej tsi rau txim rua puab le.’ ”
16Thaus cov tuabneeg kws paub ntshai tug TSWV, puab ib leeg has rua ib leeg, tug TSWV yeej noog ntsoov hab nov tej lug kws puab has ntawd. Cov tuabneeg kws paub ntshai tug TSWV hab fwm nwg, puab tej npe puavleej muab sau rua huv ib phoo ntawv rua tug TSWV khaws tseg lawm. 17Tug TSWV kws muaj Fwjchim Luj kawg nkaus has tas, “Puab yuav yog kuv tsaav tuabneeg. Thaus txug nub kws kuv lug ua kuv teg num, puab yuav yog kuv tug. Kuv yuav hlub puab ib yaam le leej txiv hlub nwg tug tub kws tu nwg ntaag. 18Kuv tsaav tuabneeg yuav pum cov tuabneeg ncaaj nceeg hab cov tuabneeg ua phem ua qas dlua ib zag ntxiv saib sis txawv le caag, cov tuabneeg kws ua kuv teg num hab cov tuabneeg kws tsi ua txawv le caag.”
Currently Selected:
Malakis 3: HNJ2000
Highlight
Share
Copy
Want to have your highlights saved across all your devices? Sign up or sign in
© 2000 United Bible Societies. All rights reserved.