Malakis 4

Vaajtswv Nub Tub Lug Yuav Txug

1Tug TSWV kws muaj Fwjchim Luj Kawg Nkaus has tas, “Thaus txug nub ntawd cov tuabneeg khaavtheeb hab cov ua phem ua qas yuav kubnyab ib yaam le tej quavnyaab. Nub ntawd puab yuav kubnyab taag, yuav tsi tshuav ib yaam dlaabtsi seem le. 2Tabsis rua cov kws fwm Kuv, Kuv lub fwjchim yuav tawm tuaj cawm mej zoo le lub nub tawm tuaj hab coj kev khu mob lug rua mej ib yaam le tej dluab nub. Mej yuav nyob ywjsab hab muaj kev zoosab ib yaam le tej mivnyuas nyuj kws dlha cawsqa tawm huv nkuaj lug noj zaub. 3Thaus txug nub kws Kuv txavtxim, mej yuav tsuj cov tuabneeg ua phem; puab yuav zoo yaam le tej moov aav huv mej qaab xibtaws.

4“Ncuntsoov Kuv tug tubkhai Mauxes tej lug qha, kws yog tej kevcai hab tej lug xaaj kws Kuv tau muab rua nwg sau Roob Xinais, kuas cov Yixalayees txhua tug yuavtsum coj hab ua lawvle ntawd.

5“Tabsis uantej nub kws tug TSWV txuj kev txavtxim nyaav lug txug, Kuv yuav khaiv tug xwbfwb cev Vaajtswv lug, kws yog Eliyas lug rua mej. #Math 11:14; 17:10-13; Malak 9:11-13; Lukas 1:17; Yauh 1:21 6Nwg yuav tig cov kws ua txiv lub sab moog rua ntawm nwg cov mivnyuas, hab tig cov mivnyuas lub sab moog rua ntawm cov kws ua txiv; yog tsi le ntawd, Kuv yuav lug hab rhuav mej lub tebchaws kuas puamtsuaj moog.”

Currently Selected:

Malakis 4: HNJ2022

Highlight

Copy