Levis Kevcai 1
1
Hlawv Taagnrho Tej Khoom Fij
1Tug TSWV hu Mauxes ntawm lub Tsevntaub Sisntsib tuaj hab muab cov kevcai nuav 2rua cov Yixalayees siv thaus puab muab khoom tuaj fij.
“Thaus mej coj ib tug tsaj tuaj tua hlawv fij, txawm yog mej yuav coj tug nyuj lossis tug yaaj lossis tug tshis los xij. 3Yog mej coj ib tug nyuj tuaj tua hlawv fij, mej yuavtsum coj tug kws tsi muaj ib qhov phem hlo le. Mej yuavtsum caab tuaj rua ntawm lub qhovrooj kws moog rua huv lub Tsevntaub Sisntsib, sub tug TSWV txhaj txaussab txais yuav mej. 4Mej yuavtsum tsaa teg rua sau tug nyuj lub taubhau, tug nyuj ntawd txhaj yuav ua tau khoom theej txhoj tshem mej lub txim. 5Mej yuavtsum muab tug nyuj ntawd tua taabmeeg tug TSWV, hab Aloos cov tub kws yog cov povthawj hlub yuav muab cov ntshaav ntawd coj moog fij rua tug TSWV hab muab coj moog laub ywg thoobplawg lub thaaj ntawd plaub saab huv tuabsi kws nyob ntawm lub qhovrooj kws moog rua huv lub Tsevntaub Sisntsib. 6Mej yuavtsum muab tug tsaj ntawd laws tawv hab muab txav ua tej thooj, 7tes Aloos cov tub kws yog cov povthawj hlub maam muab tawg coj moog teeb rua sau lub thaaj hab tis suavtawg rua. 8Puab maamle muab cov nqaj kws txav ua tej thooj, lub taubhau, hab cov nqaj rog moog tso rua sau cov tawg kws teeb sau lub thaaj. 9Mej yuavtsum muab dlej ntxuav tej plaab nyuv, sab-ntsws, hab ob cegqaab, tes tug povthawj hlub kws dlha dlejnum maamle muab hlawv huv tuabsi rua sau lub thaaj ua khoom fij theej txhoj. Tej paa khoom noj kws muab fij nuav yuav tswqaab ntxag ua rua tug TSWV txaussab.
10“Yog mej muab mej ib tug yaaj lossis ib tug tshis tuaj ua khoom fij, mej yuavtsum muab tug txiv kws tsi muaj ib qhov phem hlo le. 11Mej yuavtsum muab tug tsaj ntawd tua rua ntawm lub thaaj saab peg, hab cov povthawj hlub muab cov ntshaav coj moog laub ywg thoobplawg lub thaaj ntawd plaub saab huv tuabsi. 12Tomqaab mej muab tug tsaj ntawd txav ua tej thooj lawm, tes tug povthawj hlub kws dlha dlejnum maamle muab lub taubhau hab cov nqaj rog moog tso rua sau cov tawg kws teeb rua sau lub thaaj. 13Mej yuavtsum muab dlej ntxuav tej plaab nyuv, sab-ntsws, hab ob cegqaab, tes tug povthawj hlub muab coj moog fij rua tug TSWV hab muab hlawv huv tuabsi rua sau lub thaaj. Tej paa khoom noj kws muab fij nuav yuav tswqaab ntxag ua rua tug TSWV txaussab.
14“Yog mej muab noog tuaj tua hlawv ua khoom fij, tug noog ntawd yuavtsum yog ib tug nquab taug lossis nquab nyeg. 15Tug povthawj hlub yuav coj tug noog ntawd moog rua ntawm lub thaaj, muab lub cejdlaab ntswj kuas tu, hab muab lub taubhau hlawv rua sau lub thaaj. Ca cov ntshaav ndlwg kuas taag rua ntawm lub thaaj ib saab. 16Nwg yuav tau muab lub txa dlawj povtseg rua saab nubtuaj ntawm lub thaaj kws yog qhov chaw nchuav cov tshauv. 17Nwg yuav tau tuav ob saab tis dlua kuas tug noog lub cev ndluag, tabsis tsi xob pub ob saab tis tu, hab muab tug noog ntawd hlawv kuas taagnrho rua sau lub thaaj. Tej paa khoom noj kws muab fij nuav yuav tswqaab ntxag ua rua tug TSWV txaussab.
Currently Selected:
Levis Kevcai 1: HNJ2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
