Tsiv Dlim 40

Mauxes Tsaa Lub Tsevntaub Sisntsib

1Tug TSWV has rua Mauxes tas, 2“Koj cale tsaa lub Tsevntaub Sisntsib rua lub ib hlis ntuj nub xab ib. 3Muab lub Phijxaab Lug Cogtseg kws ntim Vaajtswv tej lug cogtseg coj moog tso rua huv lub Tsevntaub hab muab dlaim ntaub dlai thaiv lub phijxaab ntawd. 4Nqaa lub rooj lug teeb rua huv hab muab tej cuabyeej tso rua sau lub rooj. Nqaa tug ncej txawb teeb lug hab muab cov teeb lug txawb rua sau.

5“Muab lub thaaj kub kws hlawv moov tshuaj tswqaab lug teeb rua ntawm lub Phijxaab Lug Cogtseg hauvntej hab muab dlaim ntaub thaiv lug dlai rua ntawm lub qhovrooj Tsevntaub. 6Teeb ib lub thaaj kws hlawv khoom fij rua ntawm lub Tsevntaub hauvntej. 7Muab lub phab ntxuav teg ntxuav taw teeb rua kis nruabnraab ntawm tug TSWV lub Tsevntaub hab lub thaaj, hab nqaa dlej lug laub rua kuas puv. 8Xov vaaj ncig thoobplawg lub tshaavloog hab muab dlaim ntaub lug dlai thaiv lub roojloog.

9“Muab cov roj txhawb meejthawj nchus rua lub Tsevntaub hab taagnrho tej cuabyeej siv, sub lub tsevntaub hab tej cuabyeej ntawd txhaj dlawbhuv. 10Dlua le ntawd, muab nchus rua lub thaaj hab tej cuabyeej kws siv sau lub thaaj, sub txhua yaam ntawd txhaj dlawbhuv. 11Hab muab nchus rua lub phab ntxuav teg ntxuav taw hab lub taw tag phab huv tuabsi.

12“Coj Aloos hab nwg cov tub tuaj rua ntawm lub Tsevntaub Sisntsib lub qhovrooj, hab muab dlej lug ntxuav puab. 13Muab lub tsho povthawj hlub rua Aloos naav hab muab nwg tsaa ua povthawj hlub; mej ua le nuav txhaj yog mej muab nwg fij hab tsaa ua povthawj hlub ua Kuv tegnum. 14Coj Aloos cov tub tuaj hab muab cov tsho luj rua puab naav. 15Muab roj pleev puab ib yaam le pleev rua puab txiv, sub puab txhaj ua tau cov povthawj hlub ua Kuv tegnum. Txuj kev kws muab puab tsaa le nuav, yuav ua rua puab ua tau povthawj hlub ib tam rua ib tam.”

16Mauxes ua txhua yaam lawvle tug TSWV tau xaaj rua nwg. 17Yogle ntawd, lub ib hlis ntuj nub xab ib kws yog xyoo thib ob, suav txij le thaus puab tsiv tawm huv tebchaws Iziv lug, yog nub kws Mauxes tsaa lub Tsevntaub. 18Mauxes cog cov tag taw ncej, tsaa cov taab, muab cov laag lug yuam rua hab txhus cov ncej. 19Nthuav ntaub vuv lub Tsevntaub hab nthuav dlaim tawv kws vuv tuaj sau lug vuv lub tsev, lawvle tug TSWV tau xaaj lawm. 20Tes nwg muab ob dlaim txag zeb lug tso rua huv lub Phijxaab Lug Cogtseg. Nwg muab ob tug laag ntxig rua ntawm lub Phijxaab cov khawb hab muab lub hau khwb lub phijxaab. 21Nwg muab lub Phijxaab moog tso rua huv lub Tsevntaub, hab dlai dlaim ntaub thaiv. Qhov kws nwg ua le nuav tub yog muab dlaim ntaub thaiv lub Phijxaab lawvle tug TSWV tau xaaj tseg lawm.

22Mauxes teeb lub rooj rua huv lub Tsevntaub, kws yog saabnrau ntawm dlaim ntaub thaiv saab peg, 23hab muab cov ncuav kws fij rua tug TSWV tib rua sau lub rooj, lawvle tug TSWV tau xaaj tseg rua nwg lawm. 24Nwg muab tug ncej txawb teeb moog txawb rua huv lub Tsevntaub Sisntsib saab nraag, kws yog nyob ntawm lub rooj saab tod, 25hab nwg taws cov teeb ntawd rua huv chaav kws nrug tug TSWV sisntsib, lawvle tug TSWV tau xaaj tseg rua nwg lawm.

26Nwg muab lub thaaj kub coj moog teeb rua huv lub Tsevntaub Sisntsib ntawm dlaim ntaub kws kem lub tsev hauvntej, 27hab hlawv tej moov tshuaj kws tswqaab, lawvle tug TSWV tau xaaj tseg rua nwg lawm. 28Tes nwg txhaj dlai dlaim ntaub thaiv lub qhovrooj Tsevntaub, 29hab nwg muab lub thaaj hlawv khoom fij coj moog teeb rua ntawm hauvntej dlaim ntaub thaiv lub qhovrooj Tsevntaub Sisntsib. Nwg coj tej khoom fij hab tej qoobloo kws yog khoom fij coj moog hlawv huv tuabsi rua sau lub thaaj, lawvle tug TSWV tau xaaj tseg rua nwg lawm.

30Nwg muab lub phab ntxuav teg ntxuav taw coj moog teeb rua kis nruabnraab ntawm tug TSWV lub Tsevntaub hab lub thaaj hab nqaa dlej lug laub rua puvnkaus. 31Mauxes, Aloos, hab Aloos cov tub ntxuav puab tej teg hab tej taw ntawm lub phab ntawd, 32txhua zag kws puab moog rua huv lub Tsevntaub Sisntsib lossis moog rua ntawm lub thaaj, lawvle tug TSWV tau xaaj tseg rua nwg lawm. 33Mauxes xov vaaj ncig tej tshaavloog ntawm lub Tsevntaub hab lub thaaj, hab nwg dlai ib dlaim ntaub thaiv lub roojloog. Yogle ntawd, nwg txhaj ua txhua yaam tav huv tuabsi lawm.

Pus Fuab Laum Nkaus Lub Tsevntaub Sisntsib

(Teev Npe 9:15-23)

34Tes tauv fuab txawm lug laum nkaus lub Tsevntaub Sisntsib hab tug TSWV tug tshwjchim ci ntsaa-ab huv lub Tsevntaub ntawd. #1Vaaj 8:10-11; Yaxaya 6:4; Exek 43:4-5; Tshwm 15:8 35Vimle ntawd, Mauxes txhaj moog tsi tau rua huv lub Tsevntaub. 36Thaus tauv fuab tshem tawm ntawm lub Tsevntaub lawm, cov Yixalayees txhaj tshais chaw tau moog rua lwmqhov. 37Thaus twg yog tauv fuab tsi tshem, tes puab yeej tsi tshais chaw moog rua lwmqhov le. 38Lub sijhawm kws puab pheej ncig moog ncig lug, nruabnub puab pum tug TSWV tauv fuab hab montuj puab pum muaj nplaimtawg cig laamlug nyob rua sau lub Tsevntaub ntawd.

Currently Selected:

Tsiv Dlim 40: HNJ2022

Highlight

Copy