Kalatias 6
6
Sispaab Ris Nraa
1Cov kwvtij, yog mej nteg tau ib tug kws ua kev txhum, mej cov kws paub Vaajtswv zoo lawm, yuav tau ua lub sabmog sabmuas ntuag tug ntawd kuas nwg rovqaab lug ua zoo. Tabsis mej yuavtsum ceevfaaj, nyobtsaam mej yuamkev ua txhum hab. 2Mej yuavtsum sispaab ris nraa, yog mej ua le ntawd mej txhaj yuav coj#6:2: mej txhaj yuav coj tej phoo ntawv qub kws xuas teg sau, muaj txhaj yog mej coj. tau lawvle Yexus Khetos txuj kevcai. 3Yog mej leejtwg xaav tas nwg yog ib tug tseemceeb heev tabsis qhov tseeb tag nwg tub tsi tseemceeb dlaabtsi le, tes yog nwg rov dlaag nwg tugkheej xwb. 4Txhua tug nyag yuavtsum ua tuabzoo saib nyag tegnum. Yog leejtwg tegnum zoo lawm, mas nwg txhaj khaav tau ntawm nwg tugkheej txug yaam kws nwg ua tau ntawd, tsi taag nwg yuav coj nwg tegnum moog pev rua lwmtug teg. 5Ruaqhov mej txhua tug nyag yuavtsum ris nyag lub nraa.
6Mej cov kws tau nov tej lug qhuabqha lawm, mej yuavtsum zoosab hlo muab txhua yaam zoo kws mej muaj faib rua tug kws qha mej.
7Mej tsi xob xaav yuamkev tas mej yuav dlaag tau Vaajtswv. Txhua tug nyag yuav tau sau lawv nraim le tej kws nyag tseb. 8Tug kws tseb lawvle nwg saab nqajtawv, nwg yuav tau sau kev pluj kev tuag; tabsis tug kws tseb lawvle saab Ntsujplig, nwg yuav tau sau txujsa ntev dlhawv moog ibtxhis. 9Yogle ntawd, ca peb tsi xob nkeeg rua txuj kev ua zoo; yog peb pheej ua tsi tsotseg, muaj ib nub peb yeej yuav tau sau xwb. 10Yogle, thaus kws muaj zoo sijhawm, ca peb ua zoo rua txhua tug, tshwjxeeb yog ua zoo rua cov kws nyob rua huv tsev tuabneeg ntseeg Vaajtswv.
Lug Ntuag Hab Lug Xaa Xuv Thaus Kawg
11Mej sim ua tuabzoo saib tej npe ntawv kws kuv txhais teg sau xaa tuaj rua mej seb luj npaum lecaag dlag! 12Cov tuabneeg kws pheej yuav yuam kuas mej ua kevcai txav ntawd, tub yog puab xaav khaav txug puab cev nqaj dlaim tawv saabnrau nuav xwb. Puab ua le ntawd, tsuas yog ua kuas puab tsi xob raug tsimtxom vim Khetos tug ntoo khaublig nkaus xwb. 13Txawm yog cov kws tub ua kevcai txav lawm los puab yeej tsi ua lawvle txuj Kevcai le hab; cov tuabneeg ntawd xaav kuas mej ua kevcai txav, sub puab txhajle muaj lug khaav txug mej cev nqaj dlaim tawv xwb.
14Ntawm kuv, tes kuv tsuas khaav txug peb tug Tswv Yexus Khetos tug ntoo khaublig xwb. Tub yog vim tug ntoo khaublig, lub nplajteb nuav txhajle tuag rua kuv, hab kuv los txhajle tuag rua lub nplajteb nuav lawm hab. 15Qhov kws tuabneeg ua kevcai txav lossis tsi ua, qhov ntawd yeej tsi tseemceeb dlaabtsi; qhov tseemceeb yog qhov kws tuabneeg tso puab tej kev txhum tseg. 16Thov kuas cov kws coj hab ua lawvle tej lug kws kuv qha nuav tau txais kev nyaabxeeb hab kev taabncuab, xaam cov Yixalayees huv tuabsi!
17Thaus kawg nuav, thov kuas tsi xob muaj leejtwg ua rua kuv nyuajsab ntxiv lawm, ruaqhov tej cosplav kws nyob ntawm kuv lub cev tub qha rua suavdlawg pum lawm has tas kuv yog Yexus Khetos tug tubqhe.
18Cov kwvtij, thov kuas peb tug Tswv Yexus Khetos txuj moovhlub nrug mej txhua tug nyob. Amees.
Currently Selected:
Kalatias 6: HNJ2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
