Kalatias 5

Ceev Mej Txuj Kev Ywjpheej

1Qhov kws Khetos tso peb dlim ntawd tub yog Nwg xaav kuas peb muaj kev ywjpheej ntaag. Yogle ntawd, mej yuavtsum sawv khovkho tsi xob ca leejtwg coj mej rovqaab moog ua qhev dlua.

2Mej ua tuabzoo noog kuv tej lug! Kuv yog Paulus, kuv qha rua mej has tas yog mej tseem kaam ua kevcai txav hab, tes txhais tau has tas tej kws Khetos tau ua rua mej taag lug lawm yeej tsi muaj qaabhau dlaabtsi hlo le. 3Kuv rovqaab qha dlua rua mej has tas tug kws ua kevcai txav lawm, nwg yuavtsum coj lawvle txuj Kevcai txhua nqai huv tuabsi. 4Mej cov kws xaav tas mej yuav ua lawvle txuj Kevcai ntawd kuas mej yog tuabneeg ncaajnceeg, tes tub yog mej raug txav tawm ntawm Yexus Khetos moog lawm; mej tub poob ntawm Vaajtswv txuj moovhlub moog lawm.

5Tabsis peb txuj kev casab yog qhov kws Vaajtswv yuav coj peb lug nrug Nwg sis raugzoo; qhov ntawd yog qhov kws peb najnub ua sabntev tog, lug ntawm Vaaj Ntsujplig lub fwjchim kws ua dlejnum nyob rua huv peb txuj kev ntseeg. 6Ruaqhov thaus peb nrug Yexus Khetos koom uake lawm, txawm yuav ua kevcai txav hab tsi ua los tsi tseemceeb dlaabtsi. Qhov kws tseemceeb tes yog txuj kev ntseeg kws ua dlejnum tshwm lug ntawm txuj kev hlub xwb.

7Mej tub dlha tau zoo heev lawm! Leejtwg ho lug ntxag mej tsi pub mej ntseeg Vaajtswv Txujlug tseeb? 8Tej kws puab ntxag mej ntawd yeej tsi yog lug ntawm Vaajtswv tug kws hu mej lug cuag Nwg. 9Suavdlawg yeej ibtxwm has tas, “Ib qhov nyuas keeb xwb, los yeej ua rua ib thoob ncuav su taagnrho.” #1Klt 5:6 10Tabsis kuv yeej ruajsab rua ntawm Vaajtswv has tas mej yuav tsi laam cale moog ntseeg lwm zaaj. Tug kws tuaj ua rua mej ntxhuv ntawd, txawm nwg yog leejtwg los xij, Vaajtswv yeej yuav rautxim rua nwg.

11Cov kwvtij, yog tas kuv tseem pheej najnub qhuabqha kuas suavdlawg yuavtsum ua kevcai txav, vim lecaag kuv ho raug tsimtxom? Yog muaj le ntawd tag, tes zaaj kws kuv qhuabqha has txug Khetos tug ntoo khaublig kuj yuav tsi ua teebmeem rua suavdlawg. 12Kuv xaav kuas cov tuabneeg kws tuaj tsim kev kubntxhuv rua mej ntawd, puab yijmeem ua kuas kawg hab cale rov muab puab saam kag xwb!

13Cov kwvtij, qhov kws Vaajtswv hu mej lug, yog Nwg xaav kuas mej muaj kev ywjpheej. Tabsis mej tsi xob muab txuj kev ywjpheej ntawd ua txuj haukev rua mej moog ua kev phem kev qas lawvle mej lub sab nyam. Ca txuj kev hlub ua rua mej ib tug txaussab hlo paab ib tug. 14Ruaqhov txhua nqai Kevcai puavleej muab sau zog lug ua ib nqai kws has tas, “koj yuavtsum hlub koj tug kwvtij zejzog ib yaam le koj hlub koj tugkheej.” #Levi 19:18 15Tabsis yog mej ua le tej tsaj nyaum, es mej ib tug tum ib tug hab ib tug noj ib tug le nqaj, tes ceevfaaj, nyobtsaam mej txhua tug yuav puamtsuaj moog taag huvsi.

Vaaj Ntsujplig Hab Tuabneeg Nqajtawv

16Kuv has le nuav rua mej: mej yuavtsum ca Vaaj Ntsujplig ua tug coj mej lub neej, mej txhajle yuav tsi ua lawvle tuabneeg nqajtawv lub sab ntshaw. 17Ruaqhov tuabneeg nqajtawv lub sab yeej tsi nyam tej kws Vaaj Ntsujplig nyam, hab Vaaj Ntsujplig yeej tsi nyam tej kws tuabneeg nqajtawv lub sab nyam. Tuabneeg nqajtawv lub sab hab Vaaj Ntsujplig yeej ua yeebncuab, yogle ntawd, mej txhaj ua tsi tau lawvle mej lub sab nyam. #Loos 7:15-23 18Yog Vaaj Ntsujplig ua tug coj mej lawm, tes mej tsi nyob huvqaab txuj Kevcai lawm.

19Suavdlawg yeej paub txug tej kws tuabneeg nqajtawv lub sab nyam ua. Tej ntawd yog tshwm nyob rua huv kev nkauj kev nraug, kev phem kev qas hab kev ua le dlev le npua; 20pe dlaab pe mlom, ua khawvkoob; ua yeebncuab, siscaav sistshe, siskhib, npautawg, xaav ua tug hlub, muaj paab muaj pawg hab sisfaib, 21ntshaw luas tug, qaugcawv, qw ua nqaaj ua nqug, hab ua ntau yaam kws zoole tej nuav. Yaav taag lug kuv tub ntuag mej lawm, tabsis nwgnuav kuv rov ntuag mej dlua ib zag ntxiv has tas: cov tuabneeg kws ua tej ntawd, yuav tsi tau Vaajtswv lub Tebchaws lug ua puab tug.

22Tabsis lub txiv ntawm Vaaj Ntsujplig yog kev hlub, kev zoosab, kev kaajsab, kev ua sabntev, kev muaj sabdlawb sabzoo, kev ua zoo, kev ncaajnceeg, 23kev ua sabmog sabmuas, hab kev paub tswj tugkheej. Yeej tsi muaj ib txuj kevcai yuav txwv tej nuav hlo le. 24Cov kws nyob rua huv Yexus Khetos, puab tub muab taagnrho tej kws saab nqajtawv nyam hab ntshaw ntsa rua sau tug ntoo khaublig lawm. 25Vim Vaaj Ntsujplig tau ua rua peb cajsa, peb yuavtsum ca Nwg ua tug coj taagnrho peb lub neej. 26Peb yuavtsum tsi xob muabhlub, tsi xob khaav tas yug zoo dlua luas, lossis ib tug tsi xob khib ib tug.

Currently Selected:

Kalatias 5: HNJ2022

Highlight

Copy