Tsiv Dlim 37
37
Txua Lub Phijxaab Lug Cogtseg
(Tsiv Dlim 25:10-22)
1Npexalees muab ntoo kubtwg lug txua ua lub Phijxaab Lug Cogtseg, ntev 110 xaatimev, dlaav 66 xaatimev, sab 66 xaatimev. 2Nwg muab cov tseem-tseem kub vuam lub Phijxaab ntawd saabnrau hab saabhuv nruabnrog, hab muab kub lug ua tug ntug thoobplawg. 3Nwg muab kub ua plaub lub khawb ntsa rua ntawm plaub tug ceg, ib saab twg yog ntsa ob lub. 4Nwg muab ntoo kubtwg ua ob tug laag kwv, hab muab kub vuam ob tug laag ntoo ntawd huv tuabsi, 5hab muab ob tug laag ntawd ntxig rua huv cov khawb ntawm lub Phijxaab ib saab ib tug.
6Nwg muab cov tseem-tseem kub lug ua dlaim khwb, qhov ntev yog 110 xaatimev, qhov dlaav yog 66 xaatimev. 7Nwg muab kub ntaus ua ob tug khelunpees, 8txawb ib tug rua ib tog hau Phijxaab. Nwg muab ob tug khelunpees ntawd cog keevxeeb rua lub hau Phijxaab ib tug rua ib tog. 9Tso ob tug khelunpees ntawd tig ntsejmuag tuaj uake, kuas cov koojtis nthuav lug npug lub Phijxaab.
Txua Lub Rooj Rau Ncuav Kws Fij Rua Vaajtswv
(Tsiv Dlim 25:23-30)
10Npexalees muab ntoo kubtwg txua ua ib lub rooj ntev 88 xaatimev, dlaav 44 xaatimev, sab 66 xaatimev. 11Nwg muab cov tseem-tseem kub vuam lub rooj ntawd, hab muab kub ua ib tug ntug ncig thoobplawg lub rooj. 12Nwg ua ib tug npoo tuab le 7.5 xaatimev ncig lub ntug hab muab kub ua tug ntug thoobplawg lub npoo. 13Nwg ua plaub lub khawb kub ntsa rua plaub lub kaum rooj ntawm plaub tug ceg. 14Cov khawb kws ntxig laag kwv lub rooj ntawd, muab ntsa kuas ze rua ntawm tug npoo. 15Nwg muab ntoo kubtwg lug txua ua ob tug laag hab muab kub vuam rua ob tug laag ntawd. 16Nwg muab cov tseem-tseem kub nchuav ua ib cov twj taig tau siv rua sau lub rooj: phaaj, khob, hab taig tau siv rau cawv txivmaab ua khoom fij.
Ua Tug Ncej Txawb Teeb
(Tsiv Dlim 25:31-40)
17Npexalees muab rauj ntaus cov tseem-tseem kub ua tug ncej txawb teeb. Nwg muab kub ntaus ua tug taw hab tug ncej txawb teeb; ntaus ua paaj, cos paaj, hab nplai paaj, kuas keevxeeb rua ntawm tug ncej. 18Hab ua kuas ncau ua rau ceg, ib saab peb ceg. 19Rau ceg ntawd, ib ceg ua peb lub paaj zoole paaj txiv ovmees, nrug cov cos paaj hab tej nplai paaj. 20Tug ncej txawb teeb mas muab zaig ua plaub lub paaj zoole paaj txiv ovmees, nrug cov cos paaj hab tej nplai paaj. 21Ntawm rau tug ceg teeb ntawd, ua ib lub paaj rua huvqaab ntawm cov ceg ncau. 22Cov cos paaj, cov ceg hab tug ncej txawb teeb yog muab rauj ntaus thooj tseem-tseem kub ntaus ua xwb. 23Nwg ua xyaa lub teeb rua ntawm tug ncej txawb teeb, hab nwg muab tej tseem-tseem kub ntaus ua phaaj hab txab txav teebxeeb. 24Nwg muab 35 kilus kws tseem-tseem kub lug ntaus ua tug ncej txawb teeb hab taagnrho tej twj siv rua lub teeb.
Txua Lub Thaaj Hlawv Moov Tshuaj Tswqaab
(Tsiv Dlim 30:1-5)
25Npexalees muab ntoo kubtwg ua ib lub thaaj hlawv moov tshuaj tswqaab. Lub thaaj ntawd yuavtsum muab txua ua xwmfaab xwmmeem, ntev 45 xaatimev hab dlaav 45 xaatimev, hab sab 90 xaatimev. Txua plaub tug kub koom hlo rua plaub cegkaum thaaj. 26Nwg muab tej tseem kub vuam rua plaub saab hab plaub tug kub huv tuabsi, hab muab ib pluaj kub ntsa puab tug ntug thoobplawg. 27Ua khawb kub rua lub thaaj hab muab ntsa rua ob saab huvqaab tug ntug, ib saab twg ob lub ua chaw ntxig laag kwv lub thaaj. 28Nwg muab ntoo kubtwg txua ua laag kwv lub thaaj hab muab kub vuam ob tug laag ntawd huv tuabsi.
Ua Cov Roj Txhawb Meejthawj Hab Cov Moov Tshuaj Tswqaab
(Tsiv Dlim 30:22-38)
29Npexalees tseem ua cov roj txhawb meejthawj dlawbhuv hab muab cov nroj tswqaab lug tov ib yaam le tov tej tshuaj tswqaab.
Currently Selected:
Tsiv Dlim 37: HNJ2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
