Tsiv Dlim 36

1“Npexalees, Auhauli-as hab txhua tug kws tug TSWV tau pub kev txujteg zoo hab kev totaub, paub txug txhua yaam kws cheemtsum kws yuav ua rua lub Tsevntaub dlawbhuv, yuavtsum ua txhua yaam lawvle tug TSWV tau xaaj tseg.”

Cov Tuabneeg Coj Khoom Tuaj Fij Ntau Heev

2Mauxes hu Npexalees, Auhauli-as hab taagnrho cov txivneej kws txujteg zoo kws tug TSWV pub kuas muaj peevxwm hab cov kws txaussab paab tuaj, hab Mauxes kuas puab cale pib ua dlejnum. 3Mauxes muab taagnrho tej khoom kws cov Yixalayees coj tuaj ua lub Tsevntaub dlawbhuv rua puab. Tabsis cov Yixalayees tseem naj taagkig nqaa khoom fij tuaj rua Mauxes. 4Tes cov txivneej kws txujteg zoo kws ua dlejnum txhaj moog cuag 5Mauxes hab has rua nwg has tas, “Cov tuabneeg nqaa khoom tuaj ntau tshaaj qhov kws peb xaav tau coj lug ua tegnum kws tug TSWV tau xaaj rua peb ua lawm.”

6Yogle ntawd, Mauxes txhaj xaaj rua cov pejxeem thoobplawg huv lub yeej kuas tsi xob nqaa khoom tuaj ua lub Tsevntaub dlawbhuv ntxiv lawm; yogle ntawd, cov pejxeem txhaj tsi nqaa tuaj lawm. 7Cov khoom kws puab xub nqaa tuaj, tseem ntau tshaaj qhov kws puab xaav tau lug ua lub tsev ntawd lawm hab.

Ua Tug TSWV Lub Tsevntaub Sisntsib

(Tsiv Dlim 26:1-37)

8Cov txivneej kws ua lub Tsevntaub Sisntsib puavleej yog cov kws txujteg zoo nkaus xwb. Puab muab kaum dlaim ntaub maag zoo-zoo kws xuas xuv xav, xuv tsaamxem, hab xuv lab xaws ua dluab khelunpees rua. 9Cov ntaub ntawd puavleej luj sisluag, ntev 12 mev hab dlaav 12 mev. 10Puab muab tsib dlaim lug xaws ua ib dlaig taag maam rov muab tsib dlaim kws u lug xaws ua ib dlaig hab. 11Puab muab ntaub xav xaws ua ib cov ntsej tis lawv tug ntug thoobplawg dlaim ntaub ob saab ntug nrau. 12Tes puab muab tsibcaug lub ntsej tis rua thawj dlaim, hab muab tsibcaug lub tis rua dlaim thib ob kuas sisncaag zog. 13Hab puab muab kub ntaus ua tsibcaug lub khawb lug khawm ob dlaim ntaub ua ib dlaig.

14Tes puab muab tej ntaub plaub tshis xaws ua kaum-ib dlaim ntaub lug vuv lub Tsevntaub. 15Puab xaws cov ntaub ntawd sisluag zog, ntev 13 mev hab dlaav 2 mev. 16Puab muab tsib dlaim lug xaws ua ib dlaig hab muab rau dlaim kws u lug xaws ua dlua ib dlaig. 17Puab muab tsibcaug lub ntsej tis rua tog taw tom nuav, hab ua tsibcaug lub ntsej tis rua tog taw tom u. 18Puab muab tooj ntaus ua tsibcaug lub khawb khawm ob dlaim ntaub ua ib dlaig vuv lub tsev. 19Puab tseem vuv ob txheej ntxiv tuaj saab sau, ib txheej yog muab cov tawv laug yaaj kws zaas lab hab ib txheej yog muab cov tawv kws zoo heev.

20Puab muab ntoo kubtwg lug ua cov taab kws sawvntsug txheem lub Tsevntaub. 21Txhua tug taab sab 4 mev hab dlaav 66 xaatimev, 22muab ob saab npoo qhais ua qwb dla sisdlhos, kuas cov taab ntawd sisdlhos uake. 23Puab ua neegnkaum tug taab rua saab qaabtse 24hab muab plaubcaug pluaj nyaj ua taw tag cov taab, ob pluaj tag ib tug taab, kuas ob tug taab ntawd txhaj sisdlhos ruaj. 25Puab muab neegnkaum tug taab txheem lub Tsevntaub saab qaumtsev, 26hab muab plaubcaug pluaj nyaj ua cov tag taw, ob pluaj tag ib tug taab. 27Muab rau tug taab txhus rua tomqaab lub Tsevntaub saab nubpoob, 28hab txhus ob tug rua ob lub kaumtsev. 29Ob tug taab kws nyob ntawm kaumtsev, muab sisdlhos huv taw nto plawg rua sau. Ob tug taab ntawm ob lub kaumtsev puavleej ua zoo ib yaam nkaus. 30Yogle ntawd, txhaj muab yim tug taab hab kaum-rau tug taw pluaj nyaj, ob pluaj tag ib tug taab.

31Puab muab ntoo kubtwg ua kaum-tsib tug laag, muab tsib tug ua taab rua saab phaabntsaa Tsevntaub saab peg, 32muab tsib tug ua taab rua saab phaabntsaa saab nraag, hab muab tsib tug ua taab rua saab hauvmum tomqaab kws nyob saab nubpoob. 33Tug laag nruabnraab, yog tug kws yuam lub Tsevntaub saab phaabntsaa tom nuav moog ti nkaus tom u. 34Puab muab kub vuam cov taab hab muab cov khawb kub khawm cov taab rua ntawm cov nqaaj; cov nqaaj ntawd puavleej muab kub vuam huv tuabsi.

35Dlaim ntaub thaiv, mas puab muab ib dlaim ntaub maag zoo heev kws xuas xuv xav, xuv tsaamxem, hab xuv lab, lug xaws ua dlaim ntaub thaiv hab xaws cov dluab khelunpees rua ntawm dlaim ntaub ntawd. 36Puab muab ntoo kubtwg ua plaub tug ncej kws dlai dlaim ntaub, muab kub vuam cov ncej ntawd huv tuabsi, hab muab tej khawb kub lug khawm rua. Tes puab muab nyaj ntaus ua plaub dlaim taw tag plaub tug taw ncej ntawd. 37Puab muab ib dlaim ntaub maag zoo heev kws yog xuas xuv xav, xuv tsaamxem, hab xuv lab lug xaws ua paajntaub txaij nraug zeeg, lug ua dlaim npug lub qhovrooj kws nkaag rua huv lub Tsevntaub. 38Puab ua tsib tug ncej dlai dlaim ntaub ntawd, muab khawb khawm rua, hab muab kub vuam cov hau ncej hab tej hlua paav ncej, hab muab tooj ua tsib dlaim taw tag tsib tug ncej ntawd.

Currently Selected:

Tsiv Dlim 36: HNJ2022

Highlight

Copy