Tsiv Dlim 32

Tug Mlom Nyuj Kws Yog Kub

(2 Kevcai 9:6-29)

1Thaus cov tuabneeg pum tas Mauxes nyob sau roob ntev loo hab tsi pum nwg nqeg rov lug, puab txawm sissau tuaj cuag Aloos hab has rua nwg tas, “Peb tsi paub sov muaj xwm dlaabtsi rua tug Mauxes kws coj peb tawm huv tebchaws Iziv lug lawm; yogle ntawd, koj cale tsim ib tug nyuas vaajtswv#32:1: ib tug nyuas vaajtswv; lossis tej nyuas vaajtswv. lug ua tug coj peb.”

2Aloos teb puab has tas, “Cale moog hle mej tej quaspuj tej tub, hab tej ntxhais tej qhwsntsej kub, hab nqaa tuaj rua kuv.” #Tegnum 7:40 3Yogle ntawd, puab txhaj hle taagnrho puab tej qhwsntsej kub nqaa tuaj rua Aloos. 4Aloos muab cov qhwsntsej kub ntawd moog hlawv huv lub yeejvub kuas yaaj, hab muab nchuav ua ib tug mlom txiv thaav nyuj.

Puab has tas, “Ibtsoom Yixalayees, tug nuav yog peb tug nyuas vaajtswv kws coj peb tawm huv tebchaws Iziv lug!” #1Vaaj 12:28; Tegnum 7:41

5Tomqaab ntawd, Aloos ua ib lub thaaj rua ntawm tug mlom nyuj ntawd hauvntej hab tshaajtawm rua suavdlawg has tas, “Pigkig peb yuav ua ib pluag nojhaus ua tug TSWV tsaug.” 6Taagkig thaus kaajntug txoog puab txhaj coj tsaj tuaj tua hlawv fij theej txhoj hab muab dlua ib cov tua noj ua kev sis raugzoo. Cov pejxeem txhaj nyob quastsawg noj tsau haus qaug, sawv dlha seevcev hab sisdleev. #1Klt 10:7

7Tug TSWV has rua Mauxes has tas, “Koj cale maajnroog nqeg rovqaab moog, ruaqhov koj cov pejxeem kws koj tau coj tawm huv tebchaws Iziv lug, tau ua txhum hab tso Kuv tseg lawm. 8Puab tub muab tej kws Kuv tau xaaj rua puab tsotseg taag lawm; puab txhaj muab kub nchuav ua ib tug mlom txiv nyuj hab cale moog pe tug mlom ntawd, hab cale muab khoom fij rua tug mlom ntawd. Puab has tas tug nuav yog puab tug nyuas vaajtswv kws coj puab tawm huv tebchaws Iziv lug! 9Kuv paub tas cov tuabneeg nuav tawv ncauj npaum lecaag. 10Zagnua, tsi xob cheem Kuv. Kuv npautawg rua puab heev, Kuv yuav ua kuas puab raug kev puamtsuaj. Tes Kuv yuav tsaa koj hab koj caajceg ua ib tsaav tuabneeg tseemceeb.”

11Tabsis Mauxes thov tug TSWV kws yog nwg tug Vaajtswv has tas, “Tug TSWV, Koj tub tau siv Koj lub zug hab lub fwjchim coj puab tawm huv tebchaws Iziv lug, vim lecaag Koj yuav chim rua Koj tsaav tuabneeg ualuaj? 12Vim lecaag txhaj ca cov Iziv muaj lug has tau has tas Koj coj Koj tsaav tuabneeg tawm huv tebchaws Iziv lug, yog Koj muaj homphaj coj puab lug tua povtseg tom tej roob hab ua kuas puab puamtsuaj tu noob moog? Thov Koj hloov sab hab tsi xob npautawg, thov tsi xob tso kev puamtsuaj lug rua Koj tsaav tuabneeg. 13Thov Koj ncuntsoov Anplahaas, Ixaj, hab Yakhauj kws yog Koj cov tubkhai. Ncuntsoov tej lug kws Koj tau cogtseg lawm has tas Koj yuav pub rua puab muaj caajceg coob ib yaam le cov nubqub sau ntuj hab Koj yuav muab lub tebchaws kws Koj coglug tseg rua puab caajceg, ua puab tug moog ibtxhis le.” #Chiv 23:16-17; Chiv 17:8 14Yogle ntawd, tug TSWV txhaj hloov sab hab tsi tso kev puamtsuaj lug rua Nwg tsaav tuabneeg le kws Nwg tau has lawm. #Teev 14:13-19

15Mauxes txawm nqeg sau roob lug, nwg nqaa ob dlaim txag zeb kws sau tej lug xaaj rua ob saab, saab nuav hab saabnrau, nrug nwg lug. 16Vaajtswv yog tug txua ob dlaim txag zeb hab txaug tej lug xaaj rua ntawm ob dlaim txag zeb ntawd.

17Thaus Yausuas nov cov tuabneeg qw uatsuj uatsaug, nwg has rua Mauxes has tas, “Kuv nov zoole muaj suab tsuvrog nyob rua huv lub yeej.”

18Mauxes teb tas, “Lub suab ntawd tsi zoole lub suab qw kws muajyeej lossis lub suab quaj kws swb; tabsis nwg yog lub suab hunkauj.”

19Thaus Mauxes lug ze lub yeej, nwg pum tug mlom nyuj hab pum cov tuabneeg dlha seevcev lomzem xauvnpo, ua rua nwg npautawg heev. Nwg txhaj muab ob dlaim txag zeb ntawm nwg teg laim ntsoog tawg taag rua ntawm taw roob. 20Nwg coj tug mlom nyuj kws puab nchuav ntawd moog hlawv, muab zum ua moov tshauv, muab tov dlej, hab muab yuam rua cov Yixalayees haus. 21Mauxes nug Aloos has tas, “Cov tuabneeg nuav ua lecaag rua koj, es koj txhaj coj puab ua kev txhum luj npaum le nuav?”

22Aloos teb tas, “Koj tsi xob chim rua kuv; koj yeej paub tas cov tuabneeg nuav lub sab nyam ua kev phem npaum lecaag. 23Puab has rua kuv tas, ‘Peb tsi paub sov muaj xwm dlaabtsi rua tug Mauxes kws coj peb tawm huv tebchaws Iziv lug lawm; yogle ntawd, koj cale tsim ib tug nyuas vaajtswv lug ua tug coj peb.’ 24Kuv txhaj has kuas puab nqaa puab tej saw kub kws puab muaj hab hle puab tej qhwsntsej kub tuaj rua kuv. Kuv txhaj coj moog laim nroog rua huv qhovcub, tes txawm cale ua tau tug mlom nyuj nuav!”

25Mauxes pum tas, Aloos tsi tswj cov tuabneeg hab tso puab ua tej kev txaajmuag taabmeeg rua tej yeebncuab luag hab saib tsi taug puab. 26Yogle ntawd, Mauxes txhajle moog sawv ntawm roojvaag kws moog huv lub yeej hab qw has tas, “Leejtwg kws tuaj tug TSWV tog cale lug rua ntawm kuv nuav!” Taagnrho xeem Levis txawm sau nthwv lug vij Mauxes, 27tes Mauxes has rua puab tas, “Tug TSWV kws yog tsaav tuabneeg Yixalayees tug Vaajtswv xaaj kuas mej txhua tug nyag nqaa nyag raab ntaaj hab pib ntawm lub roojvaag nuav moog kuas thoobplawg lub yeej nuav, muab mej tej kwvtij, tej phoojywg, hab mej tej tuabneeg zejzog tua povtseg kuas taag.” 28Cov Levis noog Mauxes lug; nub ntawd puab txhaj muab cov txivneej tua tuag kwvlaam le 3,000 leej. 29Mauxes has rua cov Levis has tas, “Nubnua mej tau tsaa mej#32:29: Tej cov ntawv qub-qub thaus u sau has tas Nubnua mej tau tsaa mej; phoo lug Henplais has tas Cale tsaa mej nubnua; lossis Mej tau raug tsaa nubnua. ua cov povthawj hlub ua tug TSWV tegnum lug ntawm qhov kws mej muab mej tej tub hab tej kwvtij tua povtseg, yogle ntawd, nubnua tug TSWV txhaj foom koobmoov rua mej.”

30Nub tomqaab Mauxes has rua cov pejxeem has tas, “Mej tau ua ib qhov kev txhum luj heev. Tabsis zagnua kuv yuav rov moog cuag tug TSWV sau roob dlua; seb kuv puas yuav moog thov tau tug TSWV zaamtxim rua mej.” 31Mauxes txhaj rov moog cuag tug TSWV hab thov has tas, “Cov tuabneeg nuav tau ua ib qhov kev txhum luj kawg le. Puab muab kub lug nchuav ua ib tug nyuas vaajtswv hab txawm cale pe tug nyuas vaajtswv ntawd. 32Thov Koj zaam puab tej kev txhum; tabsis yog Koj zaam tsi tau, nua tes thov Koj rhu kuv lub npe tawm huv phoo ntawv kws Koj tub sau Koj tsaav tuabneeg tej npe rua lawm.” #Nnkauj 69:28; Tshwm 3:5

33Tug TSWV teb tas, “Tug twg kws ua txhum rua Kuv, tug ntawd Kuv txhaj yuav rhu nwg npe tawm huv Kuv phoo ntawv moog xwb. 34Taamsim nuav koj cale rovqaab moog, es coj cov pejxeem moog nyob rua qhov chaw kws Kuv tub qha rua koj lawm. Ncuntsoov tas Kuv tug timtswv yuav moog ua mej ntej coj mej kev, tabsis thaus txug lub sijhawm kws Kuv txavtxim, Kuv yuav txavtxim rua puab vim puab tej kev txhum.”

35Tug TSWV txhaj tso kaab mob phem lug rua cov pejxeem, ruaqhov puab yuam Aloos muab kub nchuav ua ib tug mlom nyuj rua puab pe.

Currently Selected:

Tsiv Dlim 32: HNJ2022

Highlight

Copy