Popular Bible Verses from Tsiv Dlim 32

Share

Thaus cov tuabneeg pum tas Mauxes nyob sau roob ntev loo hab tsi pum nwg nqeg rov lug, puab txawm sissau tuaj cuag Aloos hab has rua nwg tas, “Peb tsi paub sov muaj xwm dlaabtsi rua tug Mauxes kws coj peb tawm huv tebchaws Iziv lug lawm; yogle ntawd, koj cale tsim ib tug nyuas vaajtswv lug ua tug coj peb.”

Tug TSWV has rua Mauxes has tas, “Koj cale maajnroog nqeg rovqaab moog, ruaqhov koj cov pejxeem kws koj tau coj tawm huv tebchaws Iziv lug, tau ua txhum hab tso Kuv tseg lawm. Puab tub muab tej kws Kuv tau xaaj rua puab tsotseg taag lawm; puab txhaj muab kub nchuav ua ib tug mlom txiv nyuj hab cale moog pe tug mlom ntawd, hab cale muab khoom fij rua tug mlom ntawd. Puab has tas tug nuav yog puab tug nyuas vaajtswv kws coj puab tawm huv tebchaws Iziv lug!

Tomqaab ntawd, Aloos ua ib lub thaaj rua ntawm tug mlom nyuj ntawd hauvntej hab tshaajtawm rua suavdlawg has tas, “Pigkig peb yuav ua ib pluag nojhaus ua tug TSWV tsaug.” Taagkig thaus kaajntug txoog puab txhaj coj tsaj tuaj tua hlawv fij theej txhoj hab muab dlua ib cov tua noj ua kev sis raugzoo. Cov pejxeem txhaj nyob quastsawg noj tsau haus qaug, sawv dlha seevcev hab sisdleev.

Nub tomqaab Mauxes has rua cov pejxeem has tas, “Mej tau ua ib qhov kev txhum luj heev. Tabsis zagnua kuv yuav rov moog cuag tug TSWV sau roob dlua; seb kuv puas yuav moog thov tau tug TSWV zaamtxim rua mej.”