Tsiv Dlim 24

Lub Homthawj Nas Rua Vaajtswv Cov Lug Cogtseg

1Tug TSWV has rua Mauxes has tas, “Koj cale tuaj cuag Kuv sau roob nuav, coj Aloos, Nadas, Anpihus hab cov Yixalayees cov thawjcoj xyaacaum leej nrug koj tuaj; thaus mej tseem nyob dleb tsawv, mej cale pehawm Kuv. 2Tsi pub lwmtug le, tsuas pub koj tuableeg txaav tuaj ze Kuv xwb. Txwv tsi xob pub cov pejxeem nce tuaj rua sau roob nuav hlo le.”

3Mauxes txhaj coj tug TSWV tej lug hab tej kevcai lug pav qha rua cov pejxeem, tes taagnrho cov pejxeem ua ibtsaug teb tas, “Peb yuav ua txhua yaam lawvle tug TSWV has.” 4Mauxes sau tug TSWV tej lug xaaj huv tuabsi ca. Nub tomqaab thaus sawvntxuv, nwg moog teeb ib lub thaaj rua tim taw roob, hab muab kaum-ob lub pobzeb lug teeb, lawvle cov Yixalayees kaum-ob xeem. 5Tes nwg khaiv cov tub hluas Yixalayees kuas moog hlawv tej khoom fij hab tua nyuj hlawv fij ua kev sis raugzoo rua tug TSWV. 6Mauxes muab cov ntshaav nyuj ibnraab tso rua huv cov phab hab muab ibnraab nchus rua sau lub thaaj. 7Tes nwg muab Phoo Ntawv teev lug Cogtseg, kws sau txug tug TSWV tej lug xaaj, lug nyeem rua cov pejxeem noog. Cov pejxeem teb tas, “Peb yuav noog hab ua txhua yaam lawvle tug TSWV tau xaaj tseg rua peb lawm.”

8Tes Mauxes muab cov ntshaav kws nyob huv cov phab nchus rua cov pejxeem hab has tas, “Nuav yog cov ntshaav coglug kws tug TSWV muab ua lub cim rua mej lawvle cov lug xaaj nuav.” #Math 26:28; Malak 14:24; Lukas 22:20; 1Klt 11:25; Henpl 10:29; Henpl 9:19-20

9Mauxes, Aloos, Nadas, Anpihus, hab cov Yixalayees xyaacaum leej thawjcoj txhaj nce moog sau roob 10hab puab pum cov Yixalayees tug Vaajtswv. Qhov chaw kws Nwg tsuj ntawd zoole pua cov hlaws xafais, kws xav zoole lub ntuj. 11Vaajtswv kuj tsi ua lecaag rua cov Yixalayees cov thawjcoj; puab pum Vaajtswv, hab puab txawm nojhaus uake.

Mauxes Nce Moog Sau Roob Xinais

12Tug TSWV has rua Mauxes has tas, “Koj cale nce tuaj cuag Kuv sau roob hab nyob ntawd tog, Kuv yuav muab ob dlaim txag zeb kws muaj taagnrho Kuv tej kevcai hab tej lug xaaj kws Kuv tau sau lug qha puab rua koj.” 13Mauxes hab Yausuas, kws yog tug paab Mauxes, obtug txawm sawvkev moog; Mauxes txawm pib nce moog#24:13: Mauxes txawm pib nce moog; Ib phoo ntawv qub-qub thaus u sau has tas obtug txawm pib nce moog. rua sau Vaajtswv lub roob. 14Mauxes has rua cov thawjcoj tas, “Mej nyob ntawm lub yeej nuav tog txug thaus wb rovqaab lug. Aloos hab Hawj obtug nrug mej nyob ntawm nuav; yog mej leejtwg muaj plaubntug dlaabtsi los kuas moog cuag obtug.”

15Thaus Mauxes nce moog sau Roob Xinais, txawm muaj fuab tsaus nti pus lub roob ca. 16Tug TSWV tug tshwjchim nyob sau lub roob ntawd, hab pus fuab tsaus nti tau rau nub. Nub thib xyaa tug TSWV txhaj hu huv tauv fuab tuaj rua Mauxes. 17Tug TSWV tug tshwjchim ci ntsaa-ab zoo ib yaam le nplaimtawg cig laamlug sau roob lug rua cov Yixalayees pum. 18Mauxes txawm nkaag moog rua huv tauv fuab hab nce moog rua sau roob lawm. Nwg moog nyob sau roob tau plaubcaug nub plaubcaug mo. #2Kev 9:9

Currently Selected:

Tsiv Dlim 24: HNJ2022

Highlight

Copy